Read Poqomchi Gen 42 Bible Online

Gen 42 - Poqomchi bible

Gen 42

¹Re' Jacob xrib'iraj rib'iral chi wilik i trigo pan tinamit Egipto, je' wili i xuq'or keh taqe i rak'uun: ¿Chib'ih reet noq xak'ul taq inawil awiib' chawach?

²Re' hin xkiq'or weh chi wilik i trigo pan tinamit Egipto. Hiy taq ar chaloq' taq cho qatrigo, reh chi ma' nee ta qoh kimik ruum wi'jaleel, inki.

³Eh chi riij i re' lajeeb' wo' keh i ras i José xiooj chi loq'ariik ki trigo ar Egipto.

⁴Xa re' la' re' Jacob ma' xuyeew ta q'ab' chi xooj haa' i rak'uun Benjamín, re' i xti ruchaaq' i José ruum ma' chih inche ruk'ul chaloq i wak'uun, inki paruk'ux.

⁵Re' i Jacob Israel i rukab' b'ih xiooj taqe i lajeeb' chi rak'uun chi kixilak taqe i xiooj chi loq'ariik i ki trigo ar Egipto, ruum chupaam taqe q'iij re' re' xwihik wo' wi'jaleel chupaam chu'nchel i ruyuq'ul i Canaán.

⁶Eh re' i José wilik chi ajaab'esil chinaah i tinamit Egipto chupaam taqe q'iij re' re'. Re' reh ink'ayinik ki trigo nik' nimaal i kiooj k'oloq ar chi loq'oj trigo. Eh noq xiooj k'oloq ruuk' taqe i ras, xkik'utzaa' qohoq i kinaah, korehtaal xponik kitz'a'j wach aak'al ruuk' i yejal kiwach.

⁷Re' i José xunab'eej kiwach taqe i ras, xa re' la' re' reh je' tii chik ma' xunab'eej kiwach xub'an riib', eh ruuk' i kowlaj q'orik xupahqaaj keh chi je' wili: ¿Raaj taq i hat aha' taq ti chalik? inki. Re' hoj paruyuq'ul i Canaán qoh chalik, xoj chalik ayu' chuloq'ariik i qatrigo, inki taqe.

⁸Re' José reh xunab'eej kiwach taqe i ras, eh re' keh ma' xkinab'eej ta k'isinoq wach i kichaaq'.

⁹Chi riij i re', xk'ulik paruk'ux i José aha' wilik i xrilow paruwiriik chikiij taqe i ras, je' wili i xuq'or keh: ¿Raaj taq i hat chib'ih taq aab'eeh chalik a'an? Xa hat oon taq tahal reh i ¿chib'ih i k'axik k'ahchi' ruk'ulariik chupaam i tinamit wili? inki.

¹⁰Ma' chih taj jaaw, re' hoj qeht'al chi q'e' nim awajaawriik chi qawach, re' hoj xa chi loq'ariik k'isinoq qatrigo xoj chalik reh chi neen qa'an qawa'.

¹¹Re' hoj xa jinaj chi winaq i qajaaw eh korik wach qak'ux chiquncheel, ma' jank'al ta nqa'an i tahooj je' rukab' inaq'or, inki taqe.

¹²Re' José je' wili i chaq'wik xub'an: Ma' korik ta taq inaq'or, re' taq i hat xa hat taq tahal reh chib'ih i k'axik k'ahchi' ruk'ulariik chupaam i tinamit ayu', inki wo' chik.

¹³Re' taqe i ras je' wili chaq'wik xkian: Re' hoj, hoj kab'laj chi qiib' xa jinaj chi winaq i qajaaw. Ar hoj patim paruyuq'ul i Canaán. Re' qachaaq' xkahnik cho ruuk' i qajaaw pampaat, eh re' chik i qachaaq' jinaj, najtir i nelik chi qaxilak, inki taqe.

¹⁴Eh re' José je' wili i xuq'or: Re' hin i nuq'or wo' taq chik aweh chi xa hat taq tahool.

¹⁵Ruuk' i wili naa qanaab'eem mi korik taq inaq'or, re' hin parub'ihnaal i reey i nuq'or taq aweh i korik chi ma' nee ta taq ti elik reje chupaam i tinamit wili wila' ma' xataq'aaj taq ruk'amariik aachaaq' taq inaq'or.

¹⁶Neerub'an chi neenooj jino'q taq aweh i hat chuk'amariik, eh re' taq i hat naa pee taq akahniik pantz'ilom. Ko ar aj neenqilow re' mi korik taq i k'ahchi' aq'orom, wila' ma' korik taq inaq'or parub'ihnaal i reey neenuq'or taq aweh i korik chi xa hat taq tahal reh i tinamit wili, inki.

¹⁷Re' reh ixib' q'iij xuyeew taqe pantz'ilom taqe re'.

¹⁸Xa re' la' paroox q'iij je' wili i xuq'or keh: Re' hin inuyohleej i Dios, je' taq wili i cha a'n reh chi neenko'ljik riij taq aak'achariik:

¹⁹Wila' korik taq aweh chi korik taq wach ak'ux cha kanaa' taq jino'q awuch'ihil pantz'ilom, eh re' taq i hat chaloq' taq reje atrigo, nee taq i nak'am reje panatinamiit reh chi neenkian kiwa' taq i awach aweh.

²⁰Eh chak'am taq cho weh chi jumehq'iil aachaaq', ko ar neenqilow mi korik taq i xaq'or. Wila' ma' korik taq i xaq'or naa taq akanteesjiik, ki uchjik. Re' keh xkik'ulaa' aha' wilik i xq'orarik keh.

²¹Eh re' keh je' wili i xkiq'or chikiwach: Xti korik wo' hoq chi ma' holohik ta xoj b'anik reh i qachaaq' jinaj, ruum ma' xqanimaj ta reh noq xuq'or qeh chi naa naq qaketelaam wach, atoob' ta xqilow wo' naq chi q'e' ti' ruk'ux. Ruum i re', k'ahchi' qak'ulum i ti' k'axik wili yu'naak, inki taqe.

²²Re' Rubén i jinaj chi kixilak je' wili xuq'or: Re' hin xnuq'or wo' naq taq aweh chi ma' chih taq awuchej i qachaaq' re' re', xa re' la' re' taq i hat ma' xanimaj ta taq weh. Yu'naak aj re', naa qatojom wach i rukimiik, inki.

²³Re' keh ma' xkikoj ta rehtaal chi k'ahchi' rureqem chi riij i José aha' wilik i xkiq'or, ruum ko wilik jalal ruq'oral noq xub'an ruk'utaaj kuuk'.

²⁴Re' José xelik reje kuuk', xooj rub'an roq'iim pareh, eh noq xsutinik chaloq aha' wilkeeb' wii' xub'an chik kiq'orob'jiik chi korik. Eh xresaj iloq i Simeón chi kixilak xb'ak'arik i q'ab' chi riij chikiwach.

²⁵Chi riij i re', re' José xuq'or chi xhamarik chi trigo i kikoxtaal, eh chi suutjoq chaloq i kitumiin chi ye'aroq chaloq keh pan kikoxtaal chi kiju'junaal. Eh chi ye'aroq kiwa' reh kib'eeh, je' wo' re' i xb'aan cho keh.

²⁶Re' keh xkikoj chaloq i ki trigo chi riij i kib'uruux, xi elik cho Egipto.

²⁷Noq xi ponik chupaam i ye'aab' xi wirik wii' jinaj keh xuteh naah i rukoxtaal reh chi xuyeew ruwa' i rub'uuruux, eh i rilow wilik chi chii' i rukoxtaal i rutumiin xutoj naq wii' i trigo.

²⁸Eh noq xrilow chi je' re', je' wili i xuq'or keh i ruch'ihil: K'oloq taq awilow i xnureq, xkisutej cho weh i tumiin xnutoj naq wii' i nutrigo wilik panukoxtaal. Eh ma' k'isiin ta xiyo'jik chikuncheel, je' wili xkiq'or: ¿Chib'ih i xub'an cho quuk' i Dios chi je' wili? inki taqe.

²⁹Noq xi ponik Canaán xkik'utjaaj reh i kajaaw Jacob chu'nchel chib'ih jariik i xkik'ul, je' wili xkiq'or reh:

³⁰Re' winaq wilik chi ajaab'esil chinaah i tinamit Egipto q'e' kow xojruq'o'reej, eh xuq'or qeh chi xa hoj ponoq tahal reh i rutinamiit.

³¹Eh re' hoj xqaq'or reh chi korik wach qak'ux chi ma' jank'al ta nqa'an i tahooj je' rukab' i xuq'or qeh.

³²Xqaq'or wo' reh chi hoj kab'laj chi qiib' eh hoj rak'uun i jinaj chi ajaab'ees chi jinaj i qachaaq' najtir i nelik chi qaxilak, eh chi re' i xti chaaq'b'ees xkahnik awuuk' ayu' Canaán.

³³Re' reh je' wili i xuq'or qeh: Ruuk' i wili neenunab'eej mi korik taq aweh chi korik taq wach ak'ux, cha kanaa' taq jino'q taq aweh i hat ayu', re' taq i hat nee nak'am taq reje kok' taq-oq atrigo, reh chi nee taq inki a'n kiwa' taq i awach aweh panapaat.

³⁴Eh xti chak'am taq cho weh aachaaq' reh chi neenunimaj chi korik taq wach ak'ux, eh chi korik chi ma' hat ta taq tahool. Chi je' re' neenwesaj reje pantz'ilom i jinaj taq aweh i hat, re' taq i hat nee wo' taq tib'ehik chupaam i tinamit wili chi ma' xta neentz'a'inik taq aweh, inki qeh, inki taqe.

³⁵Eh noq xkesaj i trigo pan kikoxtaal chi kiju'junaal inkilow wilik wo' hoq ma' najt ta chii' kikoxtaal i kitumiin pankok' koxtaal, re' ixkitoj naq wii' i trigo. Noq xkilow chi je' re', ma' k'isiin ta xiyo'jik i keh, je' wo' hoq i kajaaw.

³⁶Re' Jacob je' wili i xuq'or keh i rak'uun: Re' taq i hat k'ahchi' taq kiin akanaam chi ma' xta wak'uun, re' José najtir i nelik chi qaxilak, je' wo' hoq i Simeón, xaq'eb' wo' taq chik chaloq. Eh yu'naak inawaaj wo' chik taq aq'uchum weh i Benjamín, eh re' i naa rutiib'iik ruk'ux, re' hin, inki.

³⁷Chalik i Rubén je' wili i xuq'or reh i rajaaw: Jaaw cha taq'aaj i Benjamín, re' hin nee kincha'jinik reh, re' hin nee wo' chik ink'ulik nuq'asaj aweh. Eh wila' ma' xnuk'am chik chaaweh i Benjamín neerub'an chi nee nakansaj kab'chel i wak'uun, inki.

³⁸Re' Jacob je' wili i chaq'wik xub'an: Re' wak'uun Benjamín, ma' jaruuj taq neenutaq'aaj chawiij, re' i ras José, kamnaq wo' hoq, ach wo' re' reh wilik chi nuwach. Eh raaj chib'ih-oq i xuk'ul taq cho chawach chupaam taq aab'eeh, chib'ih taq i neena a'n, nee taq inkahnik pananaah wila' xin kimik ruum i ruti'kiil nuk'ux, ruum re' hin, xa hin wo' chik rijib', inki.