Read Poqomchi Gen 49 Bible Online

Gen 49 - Poqomchi bible

Gen 49

¹Re' Jacob xuyuq'eej taqe ruuk' i rak'uun, je' wili xuq'or keh: Kim taq ayu', chajil taq chaawiib' wuuk' naa nuq'orom taq weh chib'ih taq i naa ak'ulum na'chub'an.

²Chajil taq chaawiib', eh chab'iraj taq naa nuq'orom aweh taq i hat wak'uun, i hin taq awajaaw Jacob, eh Israel i nub'ihnaal.

³Re' hat Rubén, hat i aasb'ees wak'uun, eh noq xat wihik chee hat xti ko wilik wansil chi korik. Re' hat, hat naq i k'amal b'eeh chikiwach taqe achaaq', eh nim wo' naq awajaawriik chikiwach i keh.

⁴Re' hat je' akab' i kowlaj rooq ha', xama' xta chik impab'anik reh, ruum re' hat xat wirik ruuk' i wixoqil nah nuyokaab' xak'uhtaaj nuk'ixb'ilaal. Ruum i re', ma' hat ta chik k'amal b'eeh chi kixilak aachaaq'.

⁵Eh re' hat Simeón, i hat Leví je' taq akab' i josq'laj chikop, ruum re' taq ach'ihch' wilik awuuk', reh kanteesb'al inkamanik wii'.

⁶Re' hin ma' nwaaj ta wihik taq chaxilak noq naa ayejaam taq wach chib'ih taq i naa a'nam, ruum re' taq i hat noq yohb'aal taq wach aak'aah, xakansaj taqe i kiristianu', eh xahop wo' taq i kooq i imas wakax reh chi ma' xib'ehik ta chik.

⁷Re' taq i hat xayeew taq awiib' panti' k'axik ruum aajosq'iil, ruum xti yiib' taq wach xat b'anik. Re' i QaJaaw Dios naa rutukem kiwach taq aawiih aamaam chi kixilak taqe i aj Israel.

⁸Re' hat Judá, re' taqe aawas naakiye'em runimaal awach, eh naa a'nam keh awach taqe i naa ki-ixowaniik awach, re' taqe aawas achaaq' naakiye'em awajaawriik.

⁹Re' hat Judá hat wak'uun je' akab' i rak'uun i kaq b'ahlam q'e' kowriib'. Re' reh i ruchop i chikop, eh i ruk'ux i koq. Chi riij i re', i rupach'aa' riib' wach ak'al, xa je' chik mama' kaq b'ahlam, xama' awach ta chik inokik ruuk' ruum i rujosq'iil, je' aj re' i naa a'nam i hat.

¹⁰Re' hat Judá ma' awach ta naa resaniik reh awajaawriik, ma' awach ta wo' naa ruq'uchwiik reh aab'axtoon k'uhtb'al reh awajaawriik. Korehtaal la' ink'ulik i xti ehchan reh i b'axtoon re' re', re' i naa runimjiik kuum i tinamit.

¹¹Re' hat je' naa waraa' uuva naa ab'ak'am i rak'uun aab'uuruux, eh je' naa ruuk' vino, je' naa ruuk' riis uuva naa atz'ajam chu'nchel aso'.

¹²Re' hat Judá re' naq'awach, xa je' chik kaqiil wach i vino, eh re' taqe aweeh, je' naa xasaq chik, je' saqiil i lecha.

¹³Eh re' hat Zabulón, ar naa apatiniik chi chii' i palaw, je' naa re' hat naa ab'eesaniik reh taqe i nimaq barco wilkeeb' ar, re' ye'aab' naa achopom naah, ko ar naa rik'iik chaloq pank'ula't reh i ye'aab' Sidón.

¹⁴Re' hat Isacar je' akab' jino'q i b'uurux aj ihqoom eh inokik chi hi'lik parukoraal.

¹⁵Re' b'uurux i rilow chi holohik i ruye'aab' inokik chi hi'lik, eh noq inye'arik ahl laj ihq chi riij xa eeh wo' ruq'or. Je' wo' re' i naa a'nam i hat awuch'ihil taqe awiih aamaam, xa eeh taq i naa aq'orom noq naa taq aminariik pankowlaj kamanik.

¹⁶Re' hat Dan naa akahniik chi q'ataj q'orik chikinaah aatinamiit, re' junch'uq keh i tinamit Israel.

¹⁷Re' hat Dan hat josq' naa rub'anam je' akab' i aaq' i ruyeew riib' chii' b'eeh, i rutiiw i rooq i kawáyu, eh i ruq'eb' chaloq i winaq iqlik chi riij.

¹⁸Jaaw k'ahchi' wuy-eem chi nee kinako'leej.

¹⁹Re' hat, Gad je' wo' taqe awiih aamaam naa naq kianam aweh taqe i soldado, eh noq naa rojiik kuxoq, re' chik i hat naa ab'aniik keh.

²⁰Re' hat Aser je' wo' taqe awiih aamaam holohik ye'aab' naa kiwihiik wii', naa ruwihiik awa' ahaa' chi korik, eh re' hat naa aye'wiik kiwa' kihaa' i naa kiwihiik chi reyil.

²¹Re' hat Neftalí naa a'nam je' rukab' i rub'an ixoq keej, xama' xta nq'ilwik reh xa aha' inooj eh xa holohaq chik taqe i rak'uun.

²²Re' hat José naa a'nam chi je' rukab' i juniwal chee' wilik chii' rooq ha' ma' k'isiin taj i wach i ruyeew, eh re' taqe q'ab' i rumujej reje naah i tz'aq' wilik ar.

²³Re' hat ma' naa ta kaajwaam awach taqe i kikansanik ruuk' flecha, naa kaajwaam akanteesjiik, ma' naa ta k'achariik chi suq kuum.

²⁴Re' hat kow awiib' chuko'ljiik awiib', re' QaJaaw Dios nim rajaawriik naa ruye'wiik rukowiil aawooq aq'ab'. Re' wo' hoq i nuDios i nunimaj i hin Jacob, re' wo' hoq ink'amwik rub'eeh inko'linik reh i Israel i rukab' nub'ih naa rutoob'iniik aweh.

²⁵Re' nuDios i hin, hin awajaaw naa rutoob'iniik aweh, re' reh naa rukuxisaniik aweh, ruum q'e' nim rajaawriik. Naa kaat rukuxisam cho ruuk' i rotob'il inchalik pan taxaaj, naa kaat rukuxisam ruuk' i chaamlaj palaw, naa wo' kaat rukuxisam ruuk' taqe i raasb'al ha', xa aha' naakeliik cho panak'al.

²⁶Re' hin, i hin awajaaw ma' k'isiin i rotob'il i Dios xnupahqaaj cha naah i hat reh juneliik ma' xata je' najtiil naah i yuuq', ma' xata je' rukab' xkipahqaaj chi nunaah taqe i numaam wati't i hin. Re' i rotob'il i Dios wili, naa ak'ulum i hat José, re' i xnusik' chaawach chi kixilak taqe aawas.

²⁷Re' hat Benjamín, naa a'nam aweh je' rukab' i rub'an i josq'laj xojb' kowahq'eq i ruk'ux taqe i chikop i rukansaj pantaq xq'eq, intohq'ik rupuhkaam taqe i ruqox, inki i Jacob.

²⁸Re' taqe i kab'laj chi ak'uunb'ees wili re' wo' taqe i kab'laj ch'uq chi tinamit Israel. Je' re' i xuq'or keh chi kiju'junaal i kab'laj chi rak'uun noq xupahqaaj i rotob'il i Dios chikinaah.

²⁹Eh re' i Jacob je' wili i xuq'or keh taqe i rak'uun: Re' hin ach ma' k'ih laj q'iij k'achalkiin, inwaaj chi ar taq naakiin rojiik amuq'aam aha' muhqinaq taqe cho wii' i numaam wati't chupaam jinaj i muq'uumb'al wilik chupaam i ruye'aab' i winaq Efrón, re' aj heteo.

³⁰Re' wilik ar paruyuq'ul i Canaán iraaj ruq'orom chi re' jul k'otooj ar Macpela, ma' najt ta reje chuwach i ye'aab' Mamre. Re' i ye'aab' xuloq' i numaam Abraham, re' wo' ruuk' i ruye'aab' i winaq Efrón, reh chi ar naakimuhqiik taqe awach reh i numaam Abraham.

³¹Ar muhqinaq i numaam Abraham, je' wo' hoq i rehk'een Sara. Ar wo' muhqinaq i wajaaw Isaac, je' wo' hoq i rehk'een Rebeca, eh ar wo' numuq'aam i Lea.

³²Re' i ye'aab' re' re', ruch'ihil i jul muq'uumb'al kamnaq k'otooj panab'aj wilik ar, kuuk' taqe i aj Het loq'ooj, inki i Jacob reh taqe i rak'uun.

³³Eh noq re' Jacob xukohlaaj kik'uhb'aljiik taqe i rak'uun, xuyok'aa' wo' chik qohoq riib' wach ruch'aht, eh ar xkimik. Xooj taqe rureq i rumaam rati't kamnaq taqe chaloq.