Read Poqomchi Gen 6 Bible Online

Gen 6 - Poqomchi bible

Gen 6

¹Noq xi k'ihaaxb'ik i tinamit chinaah i wach ak'al xwihik cho kixq'uun.

²Eh noq xkilow taqe i rak'uun i Dios chi q'e' taqe holohaq ixoq xkisik' wach chi kixilak ixoq re' re', reh chi xkian kaxáro kuuk'.

³Re' i QaJaaw Dios je' wili i xuq'or: Re' hin ma' naa ta nuye'em i Wuxlab'al chi juneliik kuuk' i tinamit ruum xa tiwik taqe. Je' re' noq, xa jinaj siento ruuk' juninaq haab' naa nuye'em kik'achariik, inki.

⁴Eh chupaam taqe q'iij re' re', noq re' taqe i rak'uun i Dios xkian kaxáro kuuk' taqe i kixq'uun i tinamit reh chi xwihik kak'uun kixq'uun kuuk', je' wo' koq'uun wilik taqe i winaq i nimaq kooq xik'u'loq. Re' keh xwihik wo' kak'uun kixq'uun, re' chik taqe keh q'e' kow kiib' noq xooj kuxoq.

⁵Noq xrilow i QaJaaw Dios chi ma' k'isiin i yiib' wach na'ojb'al inki a'n i tinamit chinaah i wach ak'al, eh xa re' chik i ma' holohik taj inkikapaaj rub'aan,

⁶xyoj ruk'ux chi xuyejaa' i winaq chinaah i wach ak'al. Ma' k'isiin ta xchalik ruti'kiil ruk'ux.

⁷Ruum i re', je' wili i xuq'or i QaJaaw Dios: Re' hin naa nusacham kiwach i tinamit i nutz'uhkrisam chinaah i wach ak'al, je' wo' chu'nchel i chikop, chi je' xa kijukem kiib' noq kib'ehik, chi je' kirupinik pan taxaaj, q'e' intiib'ik i nuk'ux inki a'n ma' ta naq xnutz'uhkrisaj taqe, inki.

⁸Eh re' QaJaaw Dios xponik chuwach i runa'ojb'al i Noé.

⁹Re' wili inq'orarik chi riij i Noé. Re' Noé korik wach ruk'ux, juneliik xunimaj i QaJaaw Dios, chupaam i q'iij re' re' xa re' wo' reh wilik chi kixilak i tinamit xk'acharik chi korik chi je' rukab' iraaj i QaJaaw Dios.

¹⁰Re' Noé ixib' i rak'uun xi wihik, je' wili kib'ihnaal: Sem, Cam, Jafet.

¹¹Chu'nchel i wilkeeb' wach ak'al xa re' chik i yiib' wach na'ojb'al inki a'n chuwach i QaJaaw Dios, xa re' chik i ma' holohik taj inki a'n

¹²Re' QaJaaw Dios xrilow chi re' i wach ak'al nujinaq chi yiib' wach na'ojb'al, ruum chu'nchel i tinamit xa re' chik i yiib' wach inki a'n

¹³Eh re' i QaJaaw Dios je' wili i xuq'or reh i Noé: Re' hin xchalik chik panuk'ux chi naa nusacham kiwach i tinamit wach ak'al, ruum kuum i keh xnujik i yiib' wach na'ojb'al wach ak'al. Eh junsachariik kiwach ruuk' i wach ak'al naa nub'anam.

¹⁴Re' hat naa-ayejaam jino'q kanowa paat re' ruuk' i chee' gofer naa akojom. K'ih tahs paam naa a'nam, eh naa-ayulem chupaam, naa-ayulem chi riij i je' q'ool re' ruuk' inkan panak'al.

¹⁵Eh je' wili nimaal naa a'nam: Re' rooq jinaj siento ruuk' lajeeb' roxk'ahl b'ara naa aye'em reh, eh re' wach ho'oob' ru ka'winaq b'ara i naa aye'em reh, eh re' i runajtiil naah ho'lajuuj b'ara i naa aye'em reh.

¹⁶Eh ixib' ch'iht naa a'nam, nee nakanaa' jino'q i ru ventana k'isiin ma' jinaj b'ara ruuk' i runajtiil naah i paat. Eh nee nakanaa' jino'q i ru puertahiil panjojol.

¹⁷Ruum re' hin naa nutaq'aam qohoq jino'q i runimaal jab' chinaah i wach ak'al, ruuk' elal ha' naa nutz'apam kinaah chu'nchel i k'achareel wilkeeb' sut i wach ak'al. Je' re' noq chu'nchel i wilkeeb' wach ak'al naa kikimiik.

¹⁸Eh awuuk' i hat wilik i naaqayejaam wach, re' hat naa awokiik pan kanowa paat, awuch'ihil awehk'een, awuch'ihil taqe awak'uun, eh awuch'ihil taqe i kehk'een awak'uun.

¹⁹Eh naa wo' akojom taqe awuuk' pan kanowa paat jar b'uhr wach chi chikop i wilkeeb' sut i wach ak'al. Eh chi k'uhlaal taqe naa akojom, jinaj imaas, jinaj i xq'un, reh chi nee kiko'ljik chuwach i kimik je' rukab' i hat.

²⁰Naa wo' akojom taqe awuuk' chi k'uhlaal jar b'uhr kiwach taqe i chikop. Re' taqe i chikop kirupinik pan taxaaj, taqe i chikop xa ruuk' paat taqe ehchaal, taqe i chikop xa kijukem kiib' noq kib'ehik, reh chi ma' naa ta kikimiik.

²¹Eh jar b'uhr wach i k'uxumb'al wilik naa wo' amolom awuuk' pan kanowa paat, reh chi nee taq inak'uxlaaj awiib' i hat, eh nee wo' nak'uxlaaj chu'nchel i chikop, i nuchjik i Noé ruum i Dios.

²²Re' Noé xub'an wo' chu'nchel nik' wach i xq'orarik reh ruum i QaJaaw Dios.