Read Poqomchi Gen 9 Bible Online

Gen 9 - Poqomchi bible

Gen 9

¹Re' QaJaaw Dios xukuxisaj i Noé, je' wo' taqe ixib' chi rak'uun je' wili xuq'or keh: Re' taq i hat naa taq ak'ihaaxb'iik, korehtaal taq inanujisaj i wach ak'al.

²Eh chu'nchel i chikop wilkeeb' wach ak'al, naa ruwihiik taq awajaawriik chikinaah, ma' k'isiin naa kiyo'jiik taq awuum. Chi je' taqe i chikop kirupinik pan taxaaj, chi je' taqe xa wach ak'al kiwihik, chi je' taqe wilkeeb' pantaq ha'.

³Re' hin nee taq i nuyeew q'ab' aweh chi nee taq inak'ux chu'nchel i chikop, reh chi nee taq inak'uxlaaj awiib'. Eh je' wo' chu'nchel jar b'uhr kiwach i chaaj.

⁴Xa re' la' jinaj i ma' nwaaj taj chi nee taq inak'ux, re' i tiwik kik' paam, ruum re' i kik' inye'wik k'acharik.

⁵Ruum re' hin xti korik taq i nuq'or aweh chi awach i xukansaj i ras ruchaaq', naa wo' nuye'em jilow ree i hin. Eh wila' xatrukansaj taq i chikop i hat, naa wo' nuye'em jilow ree hin, wila' xakansaj taq jino'q aawas achaaq' i hat, naa wo' nuye'em jilow aweh taq i hat.

⁶Wila' awach i xukansaj jino'q i ras ruchaaq', tokoom chik naa rukansaniik ree reh, ruum re' i ras ruchaaq' xukansaj nuyejaam chaloq chi je' nuwii' i hin.

⁷Eh re' taq i hat wih-oq taq k'ih-oq awak'uun awixq'uun korehtaal kinujik chinaah i wach ak'al, inki.

⁸Re' QaJaaw Dios je' chik wili i xuq'or reh i Noé ruch'ihil taqe ixib' chi rak'uun.

⁹Chab'iraj taq, re' hin naa nuyejaam wach taq awuuk' i hat chib'ih i naa nub'anam taq awuuk' i hat, je' wo' hoq chib'ih i naa nub'anam kuuk' taqe awiih aamaam.

¹⁰Je' wo' hoq chib'ih i naa nub'anam kuuk' chu'nchel i chikop xi elik chaloq pan kanowa paat. Re' taqe i chikop kirupinik pan taxaaj, taqe i chikop ruuk' paat taqe ehchaal, taqe i panch'ahn chikop, je' wo' kuuk' chu'nchel i chikop.

¹¹Re' naa nuyejaam wach taq awuuk': Re' chi re' hin ma' jaruuj chik naa nusacham kiwach i tinamit, je' wo' taqe i chikop ruuk' i elal ha', ruum ma' naa ta chik nuye'em elal ha' chi sachb'al kiwach taqe i wilkeeb' wach ak'al.

¹²Re' hin naa nukojom jinaj i rehtalil i naa nuyejaam taq wach awuuk' chi naa nub'anam reh juneliik, je' wo' hoq chib'ih i naa nub'anam kuuk' chu'nchel i chikop.

¹³Re' re' raxkojl xnukoj pan suutz', i rehtalil chi naa rojiik eloq wach i nuyejaam wach chi naa nub'anam kuuk' taqe i k'achareel wach ak'al.

¹⁴Eh noq naa nuqasam chaloq i suutz' wach ak'al, naa wo' ruk'utiniik i raxkojl nukojom pan suutz'.

¹⁵Ruuk' i re' naa ruk'uliik panuk'ux i nuyejaam wach awuuk' taq i hat. Je' wo' hoq i nuyejaam wach chi naa nub'anam kuuk' i chikop. Eh ma' naa ta chik nuye'em i elal ha' chi sachb'al kiwach taqe re'.

¹⁶Noq naa wilow wach i raxkojl chupaam i suutz', naa ruk'uliik cho panuk'ux i xqayejaa' wach awuuk' i hat. Je' wo' hoq i nuyejaam wach kuuk' chu'nchel i wilik kik'achariik chinaah i wach ak'al.

¹⁷Re' aj re' wili xkahnik chi rehtalil i nuyejaam wach chi naa nub'anam kuuk' i tinamit. Je' wo' hoq i nuyejaam wach chi naa nub'anam kuuk' chu'nchel i chikop, inki Dios reh i Noé.

¹⁸Re' taqe ixib' chi rak'uun i Noé i xi elik pan kanowa paat, je' wili i kib'ihnaal: Sem, Cam, Jafet, re' Cam rajaaw chaloq i Canaán.

¹⁹Re' aj taqe wili ixib' chi rak'uun i Noé, eh ruuk' chik i kiih kimaam i keh xnujik i tinamit chinaah i wach ak'al.

²⁰Re' Noé xtohq'ik wo' chik rab'ixeem wach aak'al, peet i reh xutoq'aa' rutikariik i uuva.

²¹Eh re' Noé pan jinaj q'iij xuk'ej reh i k'ahlaj ha' korehtaal xohk'rik, t'uslik, noq xkahnik tool chupaam i ru itz'iihy naah paat.

²²Eh noq re' Cam rajaaw i Canaán xrilow i rajaaw chi xohk'reel, eh chi t'uslik xchalik ruq'or keh kab'chel i ruchaaq' wilkeeb' rij paat.

²³Noq xkib'iraj chi je' re' i Sem ruch'ihil i Jafet xkik'am chaloq nah kitileb' i b'urb'al, ruuk' i re' xkib'ur i kajaaw. Eh kib'aq'aam reje i kiwach chi juntar noq xik'u'loq ruuk', re' inkaaj chi ma' xkilow taj chi t'uslik i kajaaw.

²⁴Noq xik'ik i ruxohk'riik i Noé xunab'eej chib'ih jariik i xb'aan reh ruum i rak'uun chaaq'b'ees.

²⁵Je' wili i xuq'or: Re' i Cam xuq'eb' i rak'uun Canaán rub'ihnaal. Je' re' noq, re' reh naa rukahniik chi xa je' chik jino'q k'isamoso kuuk' i ras kab'chel, inki.

²⁶Je' wo' chik wili i xuq'or i Noé: Re' ta naq i waJaaw i nuDios neentoob'iin reh i wak'uun Sem, eh re' Canaán nee ta nkahnik chi xa je' jino'q rumoso.

²⁷Eh nee ta naq inye'arik runimaal wach ruum i Dios i wak'uun Jafet i naa rupatiniik chupaam i ru-itz'ihy naah paat i Sem, eh re' i Canaán nee ta nkahnik chi xa je' jino'q rumoso, inki.

²⁸Noq rub'anam chik i runimaal jab', re' Noé ko ixib' siento ruuk' lajeeb' roxk'ahl haab' chik xk'acharik.

²⁹Je' re' noq, re' Noé b'elejeeb' siento ruuk' lajeeb' roxk'ahl haab' i wilik reh noq xkimik reje.