Read Poqomchi 1 Cron 11 Bible Online

1 Cron 11 - Poqomchi bible

1 Cron 11

¹Re' taqe i aj Israel xkimol reje kiib' chi kunchelaal xiooj Hebrón chi q'orob'jiik i David, je' wili xkiq'or reh: Re' hoj quuk' q'iib' awuuk'.

²Eh jank'alnaak noq kore' i Saúl wilik chi reyil chi qanaah xa re' wo' hat ti k'amwik reje kib'eeh qaj q'aq'ineel. Re' wo' chik i hat ti' k'amwik cho keh. Re' i aaWaJaaw aaDios je' wo' wili i ruq'orom aweh: Re' hat naa ak'amwiik kib'eeh i nutinamiit, re' hat naa akahniik chi reyil chinaah, inki.

³Eh je' aj re' noq chu'nchel i k'amal kib'eeh i aj Israel xiooj ruuk' i David ar Hebrón. Eh re' reh wilik i xuyejaa' wach kuuk' chuwach i Dios. Re' keh xkijalk'iij aseite wach naah i xkipab'aa' chi kireey, je' rukab' xq'orarik keh ruum i QaJaaw Dios ruuk' chii' i Samuel.

⁴Re' David ruch'ihil taqe chu'nchel i aj Israel xooj pan tinamit Jerusaleem, Jebús wo' inkiq'or reh. Eh wilik taqe i aj jebuseo wilkeeb' chi patinik chupaam i ye'aab' re' re'.

⁵Eh re' taqe i aj jebuseo je' wili xkiq'or reh i reey David: Re' hat ma' naa ta wokiik ayu', inki taqe reh. Xa re' la' re' i David xa xichop wo' naah i ye'aab' Sión, korjinaq chi korik ko'lemb'al riib' re' rutinamiit i David.

⁶Re' reey David je' wili i ruq'orom pampeet: Awach i neenokik chi peet chub'anariik keh aj jebuseo, neenukoj chi k'amal b'eeh, inki. Eh re' Joab rak'uun i Sarvia xokik chi peet, eh xpa'ab'jik wo' chi k'amal b'eeh.

⁷Eh re' David xokik chi wihik chupaam i ye'aab' ko'lemb'al iib' korjinaq chi korik ruum aj re' rutinamiit i David i rub'ihnaal xkikoj.

⁸Re' reey David xuyejaa' wo' chik i tinamit re' re', ar xutoq'aa' reje Milo xponik ruuk' i tz'aq kotimaj wii' riij i tinamit. Eh re' i yejaal re' chik i Joab xyej-anik reh.

⁹Eh re' i reey David xak'ahchi' rutiqiik naah i rajaawriik ruum re' i QaJaaw Dios wilik ruuk' chi rutoob'jiik.

¹⁰Re' taqe i wili i k'amal kib'eeh taqe i ru soldado i David q'e' kow kiib' chi q'aq'inik, re' taqe i xitowik reh noq xwihik chi reyil, eh kuch'ihil taqe chu'nchel i aj Israel noq xkipab'aa' chi reey je' wo' rukab' i xuq'or i QaJaaw Dios keh i aj Israel.

¹¹Re' taqe wili i kib'ihnaal i ru soldado i David q'e' kow kiib': Re' Jasobeam rak'uun i Hacmoni, wilik rajaawriik chikinaah i lajeeb' ru ka'winaq chi soldado Eh re' i Jasobeam ruuk' i ruq'aslaj ch'ihch' xukansaj ixib' siento chi winaq.

¹²Re' rukab' re' i Eleazar rak'uun Dodo. Re' reh re' ruuk' taqe i awach re' i Ahod. Re' Eleazar re' i jinaj keh ixib' chi k'amal b'eeh kow kiib' chi q'aq'inik.

¹³Re' Eleazar xwihik ruuk' i David noq xub'an i q'aq'inik kuuk' i aj filisteo ar Pas-damim, re' noq xkimol chi elik i aj Israel. Eh ar naq wilik i junseht chi ye'aab' tikooj sebada chupaam.

¹⁴Eh re' i Eleazar ruch'ihil taqe i ru soldado kipab'aa' kiib' chi q'aq'inik chi yejaal i tik re' re', eh ar kian reh taqe i aj filisteo, xi elik korik ruum xitoob'jik ruum i Dios.

¹⁵Pan jinaj q'iij ixib' keh i lajeeb' ru ka'winaq k'amal kib'eeh soldado xiooj i wilik wii' i nimlaj ab'aj wilik ma' najt ta ruuk' i paat ab'aj wilik ar Adulam. Eh re' taqe i aj filisteo ar kiyejaam ki-itz'ihy naah paat wach k'ixkaab' Refaim.

¹⁶Eh noq re' reey David ar wilik chupaam i ye'aab' ko'lb'al iib' wilik taqe i aj filisteo xi okik chupaam i tinamit Belén.

¹⁷Re' David xchalik ruchiqiik chii' je' wili xuq'or: Awach ta naq jino'q neenk'amwik cho nuhaa' chupaam i jul ha' wilik panookb'al reh i tinamit Belén, inki.

¹⁸Re' taqe ixib' chi winaq kow kiib' xponik kimin kiib' chupaam i ye'aab' wilkeeb' wii' i aj filisteo. Eh xkilik i ha' chupaam i jul ha' wilik panookb'al reh i Belén xkik'am cho reh i David. Xa re' la' re' David xama' xuk'ej ta wo' hoq xujalk'iij wach ak'al chi jilow rumayiij chuwach i QaJaaw Dios.

¹⁹Eh je' wili xuq'or: Re' ta naq i Dios neentoob'inik weh chi ma' nee tan wuk'ej i ha' wili ruum wixwuk'ej je' naa re' i kikik'eel i winaq wili i neen wuk'ej, ruum re' keh xkiyeew kiib' pankimik noq xponik kik'am i ha' wili, inki. Re' David xama' xuk'ej ta wo' hoq i ha'. Re' taqe wili xkian ixib' chi soldado kow kiib'.

²⁰Eh re' i Abisai ruchaaq' i Joab i k'amal kib'eeh i lajeeb' ru ka'winaq kow kiib', eh xukansaj taqe ixib' siento chi soldado, ruuk' i ruq'as ju' ch'ihch'. Ruuk' i re' xelik rib'iral chi wilik rajaawriik xureq chi je' kikab' ixib' chi soldado kow kiib'.

²¹Re' i Abisai naab'imaj wach chi kixilak i lajeeb' ru ka'winaq, eh xkahnik chi k'amal kib'eeh, xa re' la' re' rajaawriik ma' xureq ta chi je' rukab' i kajaawriik ixib' q'e' kow kiib'.

²²Eh re' Benaía rak'uun i Joida inchalik ar Cabseel, eht'alimaj wach, ma' k'isiin i nimaq wach na'ojb'al xub'an. Re' i reh xkansanik keh i kiib' chi rak'uun i Ariel aj Moab. Eh pan jinaj q'iij noq k'ahchi' chi qajik i saq suutz', re' Benaía xqajik chupaam jinaj i jul ar xukansaj jinaj i kaq b'ahlam.

²³Eh xukansaj wo' hoq jinaj i qaman winaq aj Egipto kiib' b'ara ruuk' yejaal i b'ara runajtiil i rooq wihik ruq'as ju' ch'ihch' pan q'ab' je' ruwii' i chee' reh keem. Re' i Benaías xuchop jinaj i chee' xtohq'ik ruk'ulb'ilem korehtaal xuq'uch reh i ruq'as ju' ch'ihch'. Eh ruuk' i q'as ju' ch'ihch' re' re' xukansaj i aj Egipto.

²⁴Eh ruuk' taqe i xub'an re' re' i Benaía rak'uun i Joiada xwihik i rajaawriik chi kixilak taqe i lajeeb' ru ka'winaq chi kow kiib'.

²⁵Eh xye'arik rajaawriik chi kixilak i lajeeb' ru ka'winaq chi soldado, xa re' la' ma' xureq ta chi je' rukab' i ixib' chi kiib' wilik kajaawriik. Re' reey David xukoj i Benaía chi k'amal kib'eeh i soldado incha'jinik ree reh.

²⁶Re' taqe i soldado q'e' kow kiib' je' wili i kib'ihnaal: Asael ruchaaq i Joab, Elhanan rak'uun i Dodo aj Belén.

²⁷Re' i Samot aj ar Harod Heles aj ar Pelón.

²⁸Re' Ira, rak'uun Ikes aj ar Tecoa, Abiazer aj ar Anatot.

²⁹Re' Sibecai aj ar Husat, Ilai aj ar Ahod.

³⁰Re' Maharai, Heleb rak'uun i Baana aj ar Netofa.

³¹Re' Itai rak'uun i Ribai aj ar Gabaa. Re' ruuk' taqe i riih rumaam i Benjamín. Re' i Benaía aj ar Piratón.

³²Re' Hurai inchalik chi rooq i nim ha' wilik Gaza, re' Abiel aj ar Arabá.

³³Re' Azmavet, aj ar Behurim, re' Eliaba, aj ar Saalbón.

³⁴Re' taqe rak'uun i Hasem, aj ar gizonita, re' Jonatán rak'uun i Sage aj ar Arar.

³⁵Re' Ahíam, rak'uun i Sakar, aj ar Arar, re' Elifal rak'uun i Ur.

³⁶Re' Hefer, aj ar Meker, re' Ahías aj pan tinamit Pelón.

³⁷Re' Hezro aj ar Carmel, re' Naarai rak'uun i Ezbai.

³⁸Re' Joel ruchaaq' i Natán, re' Mibhar rak'uun i Hagrai.

³⁹Re' Selec aj ar Amón, re' Naharai aj ar Beerot. Re' i Naharai re' re' ink'amwik reh i ch'ihch' inkamanik reh panq'aq'inik, rak'uun i Sarvia.

⁴⁰Re' Ira, Gareb aj ar Itra taqe,

⁴¹Re' Urías, heteo, Zabad rak'uun i Ahlai.

⁴²Re' Adina rak'uun i Siza re' ruuk' taqe i riih rumaam i Rubén. Eh re' Adina ink'amwik kib'eeh taqe i riih rumaam i Rubén. Eh k'amal wo' kib'eeh i lajeeb' ru ka'winaq chi soldado

⁴³Re' Hanán rak'uun i Maaca, Josafat aj ar Mitán.

⁴⁴Re' Uzías aj ar Astarot, re' Sama, re' Jehiel rak'uun taqe i Hotán aj ar Aroer.

⁴⁵Re' Jediael rak'uun i Simri, Joha ruchaaq' i Tizita.

⁴⁶Re' Eliel, aj ar Mahan, re' Jerebai, re' Josavía rak'uun taqe Elnaam, re' Itma aj ar Moab.

⁴⁷Re' Eliel, re' Obed, eh re' Jaasiel aj ar Mesoba taqe.