Read Poqomchi 1 Cron 12 Bible Online

1 Cron 12 - Poqomchi bible

1 Cron 12

¹Re' taqe wili i winaq xi chalik ruuk' i David chupaam i ye'aab' Siclag noq korukeb'aam riib' ar chuwach i Saúl rak'uun i Cis. Re' taqe i winaq wili kow kiib', re' taqe i xtoob'inik reh chi q'aq'inik.

²Re' taqe re' wilik kuuk' taqe i kutb'al reh i flecha. Eh inkikut wo' ab'aj ruuk' tolo'x, kikutwik ruuk' rusak'aaj kiq'ab' je' wo' ruuk' rutz'eet kiq'ab'. Re' taqe re' ma' tokoom ta taqe ruuk' i Saúl, re' ruuk' taqe i riih rumaam i Benjamín je' wili kib'ihnaal:

³Re' Ahiezer i peet k'amal kib'eeh, re' rukab' re' Joás rak'uun taqe i Semaa aj Gabaa taqe. Re' taqe wili i soldado re' Jeziel, re' Pelet rak'uun taqe i Azmavet, re' Beraca re' Jehú, aj Anatot taqe.

⁴Re' Ismaías aj Gabaón kow riib' chi kixilak i lajeeb' ru ka'winaq k'amal kib'eeh i soldado. Chi riij i re', re' Jeremías, Jahaziel, Johanán, Jozabad aj Gedera.

⁵Re' Eluzai, Jerimot, Bealías, Semarías, Sefatías aj harufita.

⁶Re' Elcana, Isías, Azareel, Joezer, Jasobeam, re' ruuk' taqe i riih rumaam i Coré.

⁷Re' Joela, re' i Zebadías, re' taqe i rak'uun i Jeroham aj Gedor taqe.

⁸Eh wilik taqe i riih rumaam i Gad xkian jinaj wach kik'ux ruuk' i reey David noq wilik cho chupaam i paat ko'lemb'al iib' wilik panchiq yuuq'. Eh re' taqe winaq wili kow kiib' chi q'aq'inik. Eh wilik pan kiq'ab' taqe i ko'lemb'al kiib' nimaq pulato ch'ihch', taqe i kiq'as ju' ch'ihch'. Eh xa josq' chik i kiwach xa je' chik wach kaq b'ahlam, xti kichol elik je' rukab' noq kielik i keej pantaq ch'ahn.

⁹Re' taqe re' je' wili kib'ihnaal: Re' peet Ezer, re' rukab', Obadías, re' roox Eleab.

¹⁰Re' rukaaj Mismaná, re' roo' Jeremías,

¹¹Re' ruwaaq, Atai, re' ruwuuq' Eliel.

¹²Re' ruwahxaaq Johanán, re' rub'eleej Elzabad.

¹³Re' ru lajeeb' Jeremías, re' rujunlaaj Macbani,

¹⁴Re' taqe wili ink'amwik kib'eeh taqe i ki soldado i riih rumaam i Gad. Re' ma' q'e' ta kow riib' xa jinaj siento chi soldado i ruk'am rub'eeh. Eh re' xti kow riib' jinaj miil chi soldado i ruk'am rub'eeh.

¹⁵Re' taqe re' xiq'atwik wach i nim ha' Jordán paruq'ijil jab' noq elik i rub'an i ha' chupaam i peet poh reh i haab' re' re'. Eh xkikaaj taqe chu'nchel i wilkeeb' wach k'ixkaab', chi je' wilkeeb' reje pareelb'aal q'iij, chi je' wilkeeb' reje parookb'aal q'iij.

¹⁶Eh wili taqe i riih rumaam Benjamín, taqe i riih rumaam i Judá ki a'n jinaj wach kik'ux ruuk' i David wilik chupaam i ye'aab' ko'lemb'al iib'.

¹⁷Eh re' reey David xelik cho chi kik'ulariik je' wili xuq'or keh: Wila' suq kiil k'uxliis i nak'am taq cho weh, wila' hat taq to'ool weh xat chalik, neenuk'ulaa' chi neen qa'an jinaj wach qak'ux taq awuuk'. Eh wila' xa re' taq inawaaj chi nee taq kinaq'asaj pan kiq'ab' i ki-ixowanik nuwach, atoob' ta ma' xta numahk. Re' ta naq i Dios inkinimaj chaloq taqe aamaam awati't neen ye'wik taq aweh chutojariik taq amahk, inki.

¹⁸Re' Amasai i k'amal kib'eeh i lajeeb' ru ka'winaq chi soldado wilik ruuk' i Santolaj Uxlab'al je' wili i xuq'or: Re' hoj wilkooj awuuk', hoj aweh David hat rak'uun i Isaí. Suuqb'oq ak'ux, suq kiil k'uxliis wih-oq awuuk' i hat suuqb'oq wo' kik'ux i kitoob'inik aweh, ruum re' aaDios xtoob'inik aweh, inki. Eh re' reey David xuk'ul wo' taqe ruuk', xukoj taqe chi kixilak i k'amal kib'eeh soldado.

¹⁹Eh wilik taqe i riih rumaam i Manasés xiooj kikoj kiib' pan jinaj wach k'uxliis ruuk' i reey David, noq k'uch'ihil taqe i aj filisteo xooj chi q'aq'inik ruuk' i ru soldado i Saúl, xama' xkitob'eej ta wo' hoq i David ruum re' i ki soldado i aj filisteo ma' nkaaj ta ojik haa' chi q'aq'inik chi riij. Ruum xkikapaaj i keh chinee-oq inkiq'asaj kiib' chi kixilak i ru soldado i Saúl.

²⁰Eh noq ojik i rub'an i reey David ar Siclag, re' taqe i riih rumaam i Manasés xi okik haa' ruuk' je' wili kib'ihnaal: Adnas, Jozabad, Jediael, Micael, Jozabad jinaj chik Eliú, Ziletai re' taqe re' k'amal kib'eeh i nimlaj ch'uq chi ki soldado i riih rumaam i Manasés.

²¹Re' taqe re' xitoob'inik reh i reey David chi q'aq'inik kuuk' taqe i kiokik chi i leq' chupaam i ye'aab' re' re'. Ruum chu'nchel i xtoob'inik reh re' re', kow kiib' re' keh xi kojarik chi k'amal kib'eeh taqe i soldado.

²²Eh eqal eqal imponik i to'ool reh i reey David korehtaal xi ponik chi k'ih laj soldado, eh korik wo' hoq chi xi ponik chi ruk'ihaal soldado.

²³Je' wili kik'ihaal taqe i wilik kitz'a'amb'aal taqe i k'amal kib'eeh taqe i kow kiib' chi q'aq'inik xkian jinaj wach kik'ux ruuk' i David ar Hebrón reh chi xkipab'aa' i David chi reey chi jilow i reey Saúl, je' rukab' i ruq'orom i QaJaaw Dios.

²⁴Re' taqe i riih rumaam i Judá waqiib' miil ruuk' waxiqiib' siento chi winaq kow kiib' chi q'aq'inik kiyohq'eem kinimlaj pulato ch'ihch', eh kiyohq'eem kiq'as ju' ch'ihch'.

²⁵Eh re' taqe i riih rumaam i Semeón wuquub' miil ruuk' jinaj siento chi winaq taqe kow kiib', wilik kitz'amb'aal, eh kiyejaam kiib' chi q'aq'inik.

²⁶Eh re' taqe i riih rumaam Leví kijib' miil ruuk' waq'iib' siento chi winaq taqe.

²⁷Eh re' taqe i riih rumaam i Aarón ixib' miil ruuk' wuquub' siento chi winaq taqe. Re' Joiada i k'amal kib'eeh.

²⁸Eh re' Sadoc i komanlik ak'un kow riib' chi q'aq'inik kiib' ru ka'winaq chi winaq i ruch'ihil re' taqe i k'amwik kib'eeh i awach reh i rajaaw.

²⁹Eh re' taqe i riih rumaam i Benjamín ma' tokoom ta wo' taqe ruuk' i Saúl ixib' miil chi winaq taqe. Chupaam i q'iij re' re' kochiriij naq i Saúl wilkeeb'.

³⁰Eh re' taqe i riih rumaam Efraín juninaq miil ruuk' waxiqiib' siento chi winaq taqe i kow kiib' chi q'aq'inik, eh wilik kib'iral chi wilik kajaawriik chi kixilak i awach keh.

³¹Eh re' i xi elik cho chi kixilak taqe i yejaal i ch'uq reh i riih rumaam i Manasés waxaqlaj miil chi winaq taqe. Re' keh xsik'arik kiwach chi xooj kipab'aa' i David chi reey.

³²Eh re' taqe i riih rumaam i Isacar kiib' siento chi winaq k'amal kib'eeh. Re' ruuk' taqe i wilik kina'ojb'al keht'al chib'ih i naa ki a'nam i kuch aj Israel. Aha' wilik inkiq'or i keh re' wo' inki a'n i kuch kitinamitaal.

³³Eh re' taqe i riih rumaam i Zabulón lajeeb' roxk'ahl miil chi winaq taqe kiyejaam kiib' kow kiib' chi q'aq'inik, wilik kitz'amb'aal chi korik. Eh ma' rub'an ta kiib' kik'ux noq kiooj chi q'aq'inik.

³⁴Eh re' taqe i riih rumaam Efraín jinaj miil chi kajaaw soldado, kuch'ihil taqe i wuqlaj ru ka'winaq miil chi soldado wilik kinimaq pulato ch'ihch', wilik kiq'as ju' ch'ihch'.

³⁵Eh re' taqe i riih rumaam i Dan kiyejaam kiib' chi q'aq'inik waxiqiib' ru ka'winaq miil ruuk' waqiib' siento chi winaq taqe.

³⁶Eh re' taqe i riih rumaam i Aser ka'winaq miil chi winaq kiyejaam kiib' chi q'aq'inik.

³⁷Eh chi juntar i nim ha' Jordán xi chalik jinaj siento miil ruuk' juninaq miil chi winaq re' taqe i riih rumaam i Rubén i riih rumaam i Gad, eh haa' taqe i yejaal ch'uq reh i riih rumaam i Manasés, eh k'ih b'uhr wach i tz'a'amb'al reh q'aq'inik wilik kuuk'.

³⁸Chu'nchel i winaq wili kiyejaam kiib' chi q'aq'inik kitusum kiib', eh chu'nchel i kik'ux noq xiooj Hebrón chupa'ab'jiik i David chi reyil chikinaah i aj Israel. Eh xkian jinaj wach kik'ux chu'nchel i aj Israel chupa'ab'jiik i David chi reyil.

³⁹Eh chu'nchel i re' ixib' q'iij xi wihik ar ruuk' i David, ar xkian kiwa' kihaa' ruum re' taqe i kuch tinamitaal xiyej-anik kiwa' kihaa'.

⁴⁰Eh je' wo' taqe i tinamit ma' najt ta wilik ar, je' wo' taqe i riih rumaam i Isacar, taqe i riih rumaam i Zabulón, taqe i riih rumaam i Efraín xkik'am chaloq i kiwa' kihaa', chikiij taqe b'uurux, taqe cameyo, taqe b'ooyax, taqe i tentzun, taqe imas wakax. Eh xkik'am wo' chaloq arina, i ma' kow ta laj kaxlanwi'k higo korjinaq wii', chiqiij laj uuva, raax uuva k'ih i xkik'am chaloq ruum jinaj runimaal suq kiil k'uxliis ar Israel.