Read Poqomchi 1 Cron 17 Bible Online

1 Cron 17 - Poqomchi bible

1 Cron 17

¹Noq re' reey David wilik chik chupaam i paat i rub'an wii' taaq'anik je' wili i xuq'or reh i Natán jalal ruq'oral i Dios: Chakoj rehtaal re' hin wilkiin chupaam jinaj i paat korjinaq ruuk' i chee' chakaltee', eh re' i ruloq'laj kaxa i QaJaaw xa chupaam i itz'ihy naah paat wilik, inki.

²Eh re' Natán je' wili i xuq'or: Re' hat cha a'n taqe chu'nchel inawaaj rub'aan, ruum re' Dios wilik awuuk' chatoob'jiik, inki.

³Eh xa chupaam wo' aq'ab' re' re' q'orob'jik chee Natán ruum i Dios je' wili xq'orarik reh:

⁴Hiy ruuk' i David i waj kamanoom cha q'or reh re' QaJaaw Dios je' wili i ruq'or: Re' hat David ma' re' tee hat naa ayej-aniik reh i nupaat naa nuwihiik wii'.

⁵Re' hin xti korik i nuq'or chi ma' jank'al ta kimpatinik chupaam jino'q i paat, i wesam taqe chaloq i nutinamiit Israel, ar Egipto, eh xink'uloq ayu' yu'naak. Re' hin xa pan itz'ihy kinaah paat wo' kinwihik.

⁶Re' hin nik' najtiil xwuch'ihleej taqe chaloq i nutinamiit Israel. Re' taqe i xnukoj chi taaq'anik chikinaah i aj Israel ma' nik' ta xnuq'or keh chi naa kiyejaam jino'q nupaat chee' chakaltee' naa rukorjiik wii'.

⁷Je' re' noq cha q'or reh i waj kamanoom David chi re' hin i Dios nim wajaawriik je' wili i nuq'or reh: Re' hin xat wesaj cho chi cha'jinik tentzun, reh chi xat nupab'aa' chi reyil chinaah i nutinamiit Israel.

⁸Re' hin xintoob'inik aweh xa aha' pa' xat ponik. Eh xnuq'asaj taqe panaq'ab' i ki-ixowanik awach. Xnuyeew awajaawriik je' rukab' i kajaawriik i winaq, xti wilik kajaawriik wilkeeb' wach ak'al.

⁹Eh xnuyeew wo' kiye'aab' i nutinamiit Israel reh chi ar naakipatiniik chupaam i kiye'aab' chi suq kik'ux. Reh wo' hoq chi ma' awach ta neenjot'wik keh, eh ma' awach ta neenquchwik i chib'ih keh, je' rukab' imb'aan keh pampeet.

¹⁰Xa re' wo' noq xnupab'aa' taqe chaloq i q'atal q'orik chikinaah i nutinamiit Israel xtohq'ik cho ti' k'axik keh. Eh re' hat yu'naak naa kaat nuhi'lisam, ma' naa ta chik kaat kijot'om i ki-ixowanik awach, i nuq'or wo' aweh i hin, hin Dios chi naa nuye'em awak'uun, awixq'uun.

¹¹Eh noq naa ruponiik i q'iij noq naa akimiik reje naa rojiik taqe areqem aamaam awati't. Re' hin jinaj keh awak'uun naa nukojom chajilow, chi reyil.

¹²Eh re' reh naa ruyej-aniik i nupaat. Eh re' hin naa nukojwiik reh chi reyil chi juneliik.

¹³Re' hin naa nukahniik chi hin raJaaw, eh re' reh naa rukahniik chi wak'uun. Re' hin ma' naa ta nukanaam ruketeljiik wach, je' rukab' noq xnukanaa' ruketeljiik kiwach i xwihik cho chi reyil peet chawach i hat.

¹⁴Re' hin naa nuye'em rajaawriik chinaah i nutinamiit naa wo' nuye'em rajaawriik chi juneliik chi reyil. Eh naa ruwihiik jino'q awiih aamaam naa rokiik chi reyil, tiko'q reh, inki i Dios.

¹⁵Eh re' Natán jalal ruq'oral i Dios xooj wo' ruuk' i David xooj ruq'or reh chu'nchel i xq'orarik reh, je' wo' hoq i xk'uhtjik reh.

¹⁶Noq xrib'iraj i David chi je' re' xokik i koq chupaam i itz'ihy naah paat chi tiij chuwach i QaJaaw Dios je' wili xuq'or: ¿Chib'ih nub'anam i hin chib'ih kianam i wak'uun wixq'uun chi xayeew weh awotob'il wili?

¹⁷QaJaaw Dios re' hat ma' xata re' wili xaq'or la' wo' hoq chi re' taqe i wiih numaam i hin, hin awaj kamanoom naa kiwihiik chi reyil chi juneliik. QaJaaw Dios chawach i hat hin jinaj winaq wilik rajaawriik.

¹⁸¿Chib'ih chik jariik i nupahqaaj chi riij i nuloq'il xayeew? Re' hat aweht'al chik nik' wach i nuna'ojb'al i hin, hin awaj kamanoom.

¹⁹QaJaaw Dios ruum chi q'e' kinak'ax panawánima hin awaj kamanoom xa a'n wuuk' i runimaal wach na'ojb'al wili. Reh chi naa ruk'utiniik taqe i runimaal awajaawriik.

²⁰QaJaaw Dios ma' xta chik jino'q Dios chi je' rukab' i hat, eh ma' awach ta neemb'anik i na a'n je' wo' rukab' i qib'iram cho rib'iral.

²¹Eh ma' jino'q i tinamit wach ak'al chi je' rukab' aatinamiit Israel. QaJaaw Dios re' hat xat ko'linik cho keh reh chi xakoj taqe chi aatinamiit. Re' hat xa a'n taq i nimaq wach ma' ilooj taj i nimaq wach sahchb'al k'uxliis re' noq xawesaj taqe i tokoom tinamiit pan kiye'aab' aatinamiit. Eh xawesaj taqe cho ar Egipto.

²²Re' hat xasik' kiwach i aj Israel, reh chi xi kahnik chi aatinamiit taqe chi juneliik. Eh chi re' hat xat kahnik chi ki Dios.

²³QaJaaw Dios nee ta tii na a'n cho chi juneliik i xaq'or weh, i hin, hin awaj kamanoom. Neeta naq inwihik kajaawriik taqe i wiih numaam chi reyil je' rukab' i xaq'or weh.

²⁴Neeta naq inye'arik runimaal wach ab'ihnaal chi juneliik. Eh nee ta naq inq'orarik rib'iral chi re' hat i Dios nim awajaawriik qaDios i hoj, hoj aj Israel. Neeta naq i nacha'jeej taqe chi juneliik i wiih numaam chi reyil, i hin, hin awaj kamanoom.

²⁵QaJaaw Dios re' hat xayeew weh chi naab'jik chi naa nuwihiik chi reyil. Eh chi re' taqe i wiih numaam naa akojom chi reyil chi juneliik. Je' aj re' noq re' hin, hin awaj kamanoom k'ahchi' kiin chi tiij chawach.

²⁶Re' hat Jaaw, hat Dios aq'orom rib'iral chi naa aye'em weh aawotob'il, i hin, hin awaj kamanoom.

²⁷QaJaaw Dios i nupahqaaj aweh chi chakuxisaj taqe chi juneliik i wiih numaam i hin, hin awaj kamanoom ruum xaq'or chi naa ruwihiik kajaawriik chi juneliik chawach. Ruum aq'orom chi naa kiin akuxisam hin, eh je' wo' taqe i wiih numaam, inki David.