Read Poqomchi 1 Cron 22 Bible Online

1 Cron 22 - Poqomchi bible

1 Cron 22

¹Re' David je' wili xuq'or: Ayu' naa rukorjiik i rupaat i QaJaaw Dios, eh ayu' wo' naa rukorjiik i artaal naa kik'atam wii' i kimayiij i quch aj Israel, inki.

²Chi riij i re', re' David xutaq'aaj rumolariik kiwach taqe i tokoom tinamit patim Israel. Wilik taqe i xupab'aa' chi sehkanik wach ab'aj xkamanik chi yejemb'al reh i rupaat i QaJaaw Dios.

³Eh xutaq'aaj wo' ruyejeb'jiik i ma' k'isa kalawux, je' wo' taqe ch'ihch' xkamanik chi chopb'al riib' i puerta reh i ookb'al. Eh ma' k'isiin wo' hoq i q'an ch'ihch' xkiyejaa' ma' pajooj ta rahliil.

⁴Eh re' taqe i aj Sidón, i aj Tiro ma' k'isiin i holohaq chee chakaltee' xkik'am cho reh i David.

⁵Re' David je' wili xuq'or: Re' rupaat i Dios naa rukorjiik chi nim chi q'e' holohik, eh chi naa kiye'em ruloq'il chu'nchel i tinamit wach ak'al. Re' wak'uun Salomón ko k'isa k'un majaa' ta chih ruhab'ul, re' hin naa numolwiik kahnoq wach chib'ih i naa rukamaniik, inki. Je' aj re' noq re' David xuyejaa' kahnoq wach chu'nchel noq komajaa' inkimik.

⁶Chi riij i re' xutaq'aaj ruk'amariik i Salomón i rak'uun xuq'or reh chi re' reh naa ruyej-aniik reh i rupaat i QaJaaw i ki Dios i ruch aj Israel.

⁷Eh je' wili xuq'or reh i rak'uun: Wak'uun, re' hin xnukapaaj naq chi re' hin naa nuyej-aniik reh i rupaat i QaJaaw i qaDios.

⁸Xa re' la', re' QaJaaw Dios je' wili i ruq'orom weh: Re' hat ma' k'isiin ikaansanik a'nam, eh ma' k'isiin i q'aq'inik a'nam, ruum aj re' ma' naa ta nuye'em q'ab' aweh chi re' hat naa ayej-aniik reh i nupaat.

⁹Xa re' la' jinaj awak'uun naa ruwihiik q'unil ruuk. Eh re' hin naa nuye'em q'ab' chi re' taqe i nixowanik wach chinaah i wach ak'al naakik'amaam chi k'acharik pansuqkiil. Ruum aj re' Salomón[1] i naa rubíhnaam, naa ruwihiik chi reyil i reh ma' naa ta chik ruwihiik q'aq'inik Israel.

¹⁰Re' awak'uun re' re' naa ruyej-aniik reh i nupaat, re' reh naa rukahniik chi wak'uun, eh re' hin naa nukahniik chi raJaaw. Eh re' hin naa nuye'em rajaawriik chi naa rukahniik chi reyil chi juneliik chikinaah i aj Israel, inki weh i Dios.

¹¹Eh re' hat wak'uun re' ta naq i QaJaaw Dios neen wihik awuuk', nee ta naq ti elik korik ruuk' chib'ih i neena a'n. Eh nee ta wo' naq inayejaa' i rupaat i QaJaaw Dios je' rukab' i ruq'orom chaloq chi naa a'nam.

¹²Re' ta naq i QaJaaw Dios neen ye'wik ana'ojb'al, neenk'uhtanik aweh chi nee na a'n aha' wilik taqe i ruq'or i ruk'uhb'aal, noq nee tirukoj chi reyil chikinaah i aj Israel.

¹³Chu'nchel i neena a'n nee nelik korik chawach wila' xa a'n taqe i ruq'or i k'uhb'aal ye'ooj reh i Moisés xq'orarik keh i aj Israel wila' xa a'n i ruq'or aweh i QaJaaw Dios. Chachop ak'ux chub'aan mat yo'jik maa rub'an kiib' ak'ux.

¹⁴Re' hin xnuchop nuk'ux chi rumolariik wach taqe i naa rukamaniik chi yejemb'al reh i rupaat i Dios. Xnumol wach i waqiib' ru kajwinaq miil kintaal i oro, eh waqiib' siento ruuk' oxk'ahl miil i kintaal i plata. Eh xnumol wach i ruk'ihaal i q'an ch'ihch' je' wo' hoq i xach'ihch' ma' pajooj ta rahliil, eh xnumol wo' wach taqe chee', taqe ab'aj, eh re' hat naa atiqim naah.

¹⁵Eh re' hat ma' k'isiin taqe i awaj kamanoom, wilik taqe i sehkan wach ab'aj, wilik taqe i aj tz'aqool, wilik taqe i aj sehk. Eh xiik' naah kik'ihaal i kichol i xa reh reh wach chi kamanik.

¹⁶Eh wilik chik i oro, i plata, i q'an ch'ihch', i xach'ihch', ma' pajooj ta k'ihaal, neerub'an chi nee tiokik chi kamanik. Re' ta naq i QaJaaw Dios neentoob'inik aweh chub'anariik, inki David.

¹⁷Re' David xuq'or keh i k'amal kib'eeh i aj Israel chi naa kitob'eem i Salomón i rak'uun.

¹⁸Eh je' wili xuq'or keh: Re' taq i aaWaJaaw aaDios wilik taq awuuk', ruye'em taq aweh i rusuqkiil k'uxliis, xa aha' yuuq. Re' reh xye'wik chi ri'sil i wajaawriik chu'nchel i tinamit wilkeeb' pan qa ye'aab'. Re' qa ye'aab' chi ri'sil rajaawriik i QaJaaw Dios wilik, eh chi ri'sil taq awajaawriik i hat, hat taq rutinamiit.

¹⁹Yu'naak taq i hat cha chop taq ak'ux chi rusik'ariik taq aaWaJaaw aaDios. Je' re' noq cha chop taq ak'ux chi rutinamiit i rupaat i Dios reh chi neen q'ahxik cho ayu' i kaxa molik wii' i ruk'uhb'aal i QaJaaw Dios. Eh nee wo' inq'ahxik cho parupaat i Dios taqe i kulk taqe xa chib'ih jariik inkamanik ar, inki i David.