Read Poqomchi 1 Cron 29 Bible Online

1 Cron 29 - Poqomchi bible

1 Cron 29

¹Eh chi riij i re' je' wili i xuq'or i David keh i tinamit kimolom kiib': Xa re' wo' hoq i wak'uun Salomón xsik'arik wach ruum i QaJaaw Dios. Atoob' ta komajaa' k'ih i ruhab'ul nim wach i kamanik naa rub'anam. Ruum ma' re' ta rupaat jino'q i reey naa ruyejaam rupaat la' i QaJaaw Dios i naa ruyej-aam.

²Re' hin xnuchop nuk'ux chi molariik wach taqe naa rukamaniik reh i rupaat i nuDios. Xnumol wach i oro reh i naa rukorjiik ruuk' oro, i plata reh i naa rukorjiik ruuk' plata, i q'an ch'ihch' reh i naa rukorjiik ruuk' q'an ch'ihch', i xach'ihch' reh i naa rukorjiik ruuk' i xach'ihch'. Eh numol wo' wach i chee' reh i naa rukorjiik ruuk' chee', je' wo' hoq i holohaq ab'aj ónice, je' wo' taqe i ab'aj k'ih tz'aaq, i q'eq ab'aj, taqe ab'aj xa reh reh wach kika'yik, taqe i holohoaq ab'aj marmol.

³Atoob' ta xnumol kiwach chu'nchel wili chi yejemb'al reh i rupaat i Dios. Re' hin ruum chi q'e' i nuk'ax i rupaat i Dios naa nuq'asam i oro, i plata weh naq i hin chi yejemb'al reh i rupaat i Dios.

⁴Re' hin naa nuq'asam i kiib' miil ruuk' kiib' siento kintaal i manlik oro. Eh hoob' miil ruuk' oxk'ahl kintaal i manlik plata, esamaj i ruch'uwa'iil wach. Re' taqe re' naa rokiik i koq chib'urb'al wach i rutz'aqiil taqe i paat.

⁵Eh re' oro, re' i plata naa rukamaniik keh i naakiyej-aniik reh i xa chib'ihjariik ruuk' oro, ruuk' plata. Eh raaj taq i hat, ¿Mi ma' k'ulik taq panak'ux chi naa taq aye'em amayiij yejemb'al reh i rupaat i Dios? inki i David.

⁶Eh re' taqe i k'amal kib'eeh i ju'jun ch'uq chi patineel, taqe k'amal kib'eeh i ju'jun ch'uq chi aj Israel, taqe i k'amal kib'eeh i nimaq ch'uq chi soldado, taqe i k'amal kib'eeh i ki-ilwik reh i chib'ih i wilik reh i reey xkiyeew wo' kimayiij nik' k'ihaal i xchalik pankik'ux.

⁷Eh ixib' miil ruuk' waxiqiib' siento kintaal ruuk' lajeeb' roxk'ahl kintaal i oro xkiyeew chi yejemb'al reh i rupaat i Dios, eh lajeeb' miil i tumiin oro, eh i wuquub' miil kintaal ruuk' kiib' siento ruuk' oxk'ahl kintaal i plata, eh oxlaj miil kintaal ruuk' kiib' siento kintaal i q'an ch'ihch'. Eh kab'laj ru kajwinaq miil ruuk' waqiib' siento kintaal i xach'ihch'.

⁸Eh je' wo' taqe i wilik i holohaq ab'aj kuuk' xkiq'asaj chi yejemb'al reh i rupaat i Dios, eh kiq'asaj reh i Jehiel re' rak'uun i Gersón, re' i molwik reh i tumiin, reh i rupaat i Dios.

⁹Re' taqe tinamit ma' k'isiin ta xsuuqb'ik kik'ux ruum xkiyeew reh i QaJaaw nik' k'ihaal i xchalik pankik'ux.

¹⁰Eh je' wo' i reey David ma' k'isiin ta xsuuqb'ik ruk'ux xuloq'ej i QaJaaw Dios chikiwach i tinamit kimolom kiib' ar, je' wili xuq'or: Neeta naq inye'arik aloq'il chi juneliik i hat QaJaaw Dios nim awajaawriik. Hat ruDios chee Israel re' qamaam qati't i hoj.

¹¹QaJaaw Dios re' hat aweh i ajaawriik, i loq'il, i loq'inik. Eh i ruk'ul chi naa ruye'ariik runimaal awach, aloq'il, ruum chu'nchel i xa chib'ih jariik aweh taqe. Chi je' wilkeeb' pan taxaaj, chi je' wilkeeb' wach ak'al. Eh wilik runimaal awajaawriik. Xa re' wo' hat wilik runimaal awach chikiwach chu'nchel.

¹²Eh re' wo' hat ti ye'wik reh i b'ehomal, i loq'il. Re' hat, hat q'oreel chinaah chib'ih wilik. Eh re' kowiil i awajaawriik panaq'ab' wilik, hat wo' ti ye'wik i runimaal wachiis, je' wo' hoq i awajaawriik.

¹³Ruum aj re', re' hoj QaJaaw qaDios inqayeew runimaal wach, ruloq'il asantolaj b'ihnaal.

¹⁴¿Mi wilik wajaawriik i hin? ¿Mi wilik rajaawriik i nutinamiit chi qayeew taqe aweh chu'nchel i wili? Xti korik wo' hoq chi re' hoj ma' xta wilik qeh, re' i xqayeew aweh re' wo' hat xat ye'wik qeh.

¹⁵Re' hoj xa je' hoj tokoom tinamit chawach ruum xa ik'ik inqa a'n chinaah i wach ak'al wili, je' rukab' noq xi-ik'ik i qamaam qati't. Re' qak'achariik, ayu' wach ak'al xa re' yu' inooj kuxoq wach xa je' nik'ik jinaj muuj.

¹⁶Loq'laj QaJaaw qaDios, re' wo' hat xat ye'wik cho qeh chu'nchel i xqamol wach wili yejemb'al reh aapaat naa rulooq'jiik wii' asantolaj b'ihnaal.

¹⁷WaJaaw nuDios re' hin weht'al chi re' hat aweht'al i wilik cho paránima i ju'jun, eh chimponik chawach i rukorkiil wach k'uxliis. Ruum aj re', re' hin ruuk' i rukorkiil wach nuk'ux i nuq'asaj aweh chu'nchel i wili. Re' hin xnukoj rehtaal chi re' aatinamiit kimolom kiib' ayu' q'e' suq kik'ux noq xkiyeew aweh i kimayiij.

¹⁸QaJaaw Dios ruDios chee i Abraham, i Isaac, i Jacob re' taqe i qamaam qati't. Chatoob'eej aatinamiit reh chi juneliik neen wihik pankanima ruye'ariik i kimayiij, je' rukab' i xkian yu'naak. Eh chi neen kiyeew i kánima awuuk'.

¹⁹QaJaaw Dios i nupahqaaj aweh chi chayeew cho rukorkiil wach ruk'ux i wak'uun Salomón reh chi neerub'an taqe i ruq'or aak'uhb'aal, je' wo' hoq i neenataq'aaj wii'. Reh chi neerub'an ruye'jeb'jiik aapaat re' i xnuchop nuk'ux chumolariik wach i naa rukorjiik wii', inki David.

²⁰Chi riij i re', re' David je' wili i xuq'or keh i tinamit kimolom kiib' ar: Yu'naak chayeew taq ruloq'il i QaJaaw Dios, inki. Eh chu'nchel i tinamit xkiloq'ej i Dios re' ki Dios chee kimaam kati't. Eh kixuk'aa' kiib' chuwach i Dios, je' wo' chuwach i reey David.

²¹Eh chi junwaar chik xkiyeew i kimayiij xkik'at chi kimayiij jinaj miil i kok' imas wakax, jinaj miil imas tentzun jinaj miil i kok' tentzun. Eh xkiq'asaj wo' chi kimayiij i riis uuva, xiik' naah k'ihaal i mayiij xkiq'asaj pankib'ihnaal chu'nchel i aj Israel.

²²Eh xkian kiwa' kihaa' chi suq kik'ux chuwach i QaJaaw Dios. Eh re' i Salomón i rak'uun i David xkipab'aa' wo' chik ruka'peech chi reey chinaah i rutinamiit, chuwach i Dios xkijalk'iij i aseite wach naah reh i rupa'ab'jiik chi reey. Eh xkipab'aa' i Sadoc chi k'amal kib'eeh i aj tiij.

²³Je' aj re' noq re' Salomón xokik chi reyil chinaah i rutinamiit i Dios chi jilow i David i rajaaw, chu'nchel i xub'an xelik korik chuwach, eh chu'nchel i aj Israel xnimanik reh i taqe i xuq'or.

²⁴Eh chu'nchel i wilik kajaawriik, je' wo' taqe i kow kiib' chi q'aq'inik, eh chu'nchel i rak'uun i reey David xkiyeew ruloq'il i reey Salomón.

²⁵Eh re' i QaJaaw Dios xuyeew runimaal wach i reey Salomón chikiwach chu'nchel i aj Israel. Xuyeew ruloq'il i Salomón chi reey, eh ma' jino'q i reey Israel i xwihik cho chi peet chuwach i reey i Salomón xuyeew ruloq'il chi je' rukab' noq xuyeew ruloq'il i reh.

²⁶Re' David rak'uun i Isaí xwihik chi reyil chinaah chu'nchel i tinamit Israel.

²⁷Ka'winaq haab' xwihik chi reyil chinaah i tinamit Israel wuquub' haab' xwihik chi reyil ar Hebrón, eh oxlaj ru ka'winaq haab' xwihik chi reyil Jerusaleem.

²⁸Eh xtirijib' chik chi korik noq xkimik reje i David k'ih laj haab' xk'acharik, xti wihik ruloq'il, rub'ehomal. Eh re' chik i Salomón i rak'uun xkahnik chi jilow chi reyil Israel.

²⁹Eh chu'nchel i xub'an i reey David noq xutoq'aa' chee rukamaj korehtaal xukohlaaj rutz'ihb'jiik rehtaliil i Samuel jalal ruq'oral i Dios rutz'ihb'aam wo' rehtaliil i Natán jalal ruq'oral i Dios, je' wo' hoq i Gad jalal ruq'oral i Dios.

³⁰Eh tz'ihb'amaj wo' rehtaliil chib'ih taqe xub'an noq xwihik chi reyil, je' wo' hoq i rajaawriik. Eh tz'ihb'amaj wo' rehtaliil taqe xuk'ul i reh, je' wo' taqe i xk'ularik Israel, je' wo' hoq i xkik'ul taqe i tokoom tinamit.