Read Poqomchi Esd 4 Bible Online

Esd 4 - Poqomchi bible

Esd 4

¹Eh noq re' taqe i nixowanik kiwach i aj Judá, i aj Benjamín xkib'iraj rib'iral chi re' taqe i xi sutinik cho pan tokoom tinamit k'ahchi' wo' chik kiyejaam i rupaat i Dios i qaDios i hoj, hoj aj Israel.

²Re' keh xiooj ruuk' i Zorobabel ruuk' i Josúa, kuuk' k'amal kib'eeh i ju'jun chi patineel je' wili i xkiq'or: Re' hoj inqaaj chi nee taq tiqatow chi rutinamiit i rupaat i Dios, ruum re' hoj inqayeew wo' ruloq'il taq aaDios je' rukab' i na a'n taq i hat. Eh inqaq'asaj wo' qamayiij chuwach i Dios, xa re' wo' rokiik cho chi reyil Asiria i Esar-hadón re' i xtaaq'anik cho qeh ayu', inki taqe.

³Eh re' i Zorobabel, i Josúa, ruch'ihil taqe i k'amal kib'eeh i ju'jun ch'uq chi patineel je' wili i chaq'wik xkian: Ma' chih taj ma' nee ta ruyeew riib' chi nee taq ti okik haa' chub'anariik wili. Re' i rupaat i qaDios i hoj, i hoj aj Israel, xa re' hoj aj Israel naa qayej-aniik reh ruum je' re' i xuq'or i Ciro kireey i aj Persia, inki taqe.

⁴Je' re' noq re' taqe i aj ixowaal wilkeeb' chupaam i ye'aab' re' re' xtohq'ik kiyojom kik'ux taqe i aj Judá reh chi naa ruchaliik kiyo'jiik reh naq chi naa kikanaam ruyejeb'jiik i rupaat i QaJaaw Dios.

⁵Re' taqe i aj ixowaal xkiyeew rutumiin taqe i kitaaq'anik chupaam i tinamit reh naq chi ma' naa ta kiye'em q'ab' keh i aj Israel chi naa kiyejaam i rupaat i Dios. Eh re' taqe i aj taq'oom xkinimaj i xkiq'or i aj ixowaal nik' najtiil xwihik chi reyil i Ciro ar Persia korehtaal chik xokik chi reyil i Dario ar Persia.

⁶Eh noq xokik chi reyil ar i Asuero re' taqe i aj ixowaal xkitz'ihb'aaj i kimahk taqe i aj Judá, eh taqe i aj Jerusaleem.

⁷Noq re' chik i Artajerjes wilik chi reyil Persia, re' Bislam, re' i Mitrídates, re' Tabeel, je' wo' kuch'ihil xkitz'ihb'aaj jinaj i huuj pan kiq'oral i aj arameo, eh xkiq'asaj pan kiq'oral i aj Persa, eh xkiq'asaj reh i Artajerjes.

⁸Eh re' i Rehum i kajaaw i soldado, re' i Simsai i aj tz'ihb', xkitz'ihb'aaj jinaj i huuj kojb'al kimahk i aj Jerusaleem xkiq'asaj reh i Artajerjes.

⁹Chupaam i q'iij re' re', wilik i xkitz'ihb'aaj reje jinaj i huuj i Rahum i kajaaw soldado, re' i Simsai, re' i aj tz'ihb', kuch'ihil taqe i q'atal q'orik, je' wo' taqe i kitaaq'anik chinaah i Persia, re' taqe i aj Erec, re' taqe i aj Babilonia, re' taqe aj Susa, iraaj ruq'orom chi re' taqe i aj elamita.

¹⁰Eh kuch'ihil taqe i tokoom tinamit xitaq'ab'jik cho chi wihik Samaria ruum i Asnapar nim rajaawriik. Eh ruch'ihil taqe i k'amal b'eeh wilkeeb' chi juntar i nim ha' Éufrates.

¹¹Eh je' wili i ruq'or chupaam i huuj xkiq'asaj: Hat reey Artajerjes re' hoj, i hoj awaj kamanoom wilkooj ayu' chi juntar i nim ha' inqataq'aaj rusuqkiil ak'ux.

¹²Re' hat qajaaw reey inqaaj chi neenanab'eej chi re' taqe i aj Judío xi elik cho chupaam aatinamiit xi k'uloq Jerusaleem xtohq'ik wo' chik kiyejaam i tinamit yiib' wach kina'ojb'al, ma' kinimanik taj, xtohq'ik wo' chik kiyejaam i koraal tz'aq, xtohq'ik wo' chik kikojom i raa'.

¹³Re' i hat reey inqaaj chi neenanab'eej chi wila' xkiyejaa' wo' chik chi korik i tinamit, wila' xkiyejaa' wo' chik i koraal tz'aq chi riij, re' taqe i tinamit ma' xta chik i neenkaaj kitojom riij. Wila' xkian i je' re' ma' k'isiin i tumiin nee naq'eb' i hat qareey.

¹⁴Ruum chi re' hoj, k'ahchi'kooj atoob'eem ma' xata naa qilom chi ma' naa ta kinimam aak'uhb'aal i hat reey. Ruum aj re' inqataq'aaj ruq'orariik aweh taqe wili.

¹⁵Re' hat qajaaw reey neerub'an chi neenasik' chupaam i huuj, ar neenareq chib'ih i xk'ularik cho chikiwach aamaam awati't. Ar neenareq chi re' taqe i tinamit Jerusaleem xa keh chi ma' kinimanik taj, eh ma' holohik taj i kina'ojb'al. Re' re' k'axik i ruk'am cho cha weh i hat, je' wo' chi keh i tinamit ruum yiib' wach i kina'ojb'al, re' re' sacharik wach i kitinamiit najtir.

¹⁶Re' hoj qajaaw reey inqaq'or aweh chi wila' xkorjik wo' chik chi korik i tinamit, eh wila' xkorjik wo' chik i koraal tz'aq chi riij. Eh ma' nee ta chik inkaaj wihik chi ri'sil awajaawriik taqe i wilkeeb' ayu' chi juntar i nim ha' Éufrates, inki taqe reje panhuuj.

¹⁷Noq xrib'iraj chi je' re' i reey Artajerjes, je' wili i xutaq'aaj ruq'orariik keh: Re' hin nutz'ihb'aaj i huuj wili reh i Rehum i kajaaw soldado, reh i Simsai i aj tz'ihb', keh i kuch'ihil wilkeeb' Samaria, je' wo' keh i wilkeeb' chi juntar i nim ha'. Re' ta naq i suq kiil k'uxliis neen wihik taq awuuk'.

¹⁸Re' huuj taq xataq'aaj cho weh x-ilarik chik wach chi nuwach.

¹⁹Eh xnutaq'aaj ruq'orariik chi xsik'arik panhuuj, xkan wo' ar chi re' taqe i tinamit re' re' xama' inkinimaj ta wo' taqe i reey wihinaq taqe chaloq najtir, eh inkiq'at wach i kiq'oral i reey.

²⁰Eh Jerusaleem xi wihik wo' naq chee reey xti wilik kajaawriik, xwihik kajaawriik chi taaq'anik chikinaah i tinamit wilkeeb' ar chi juntar i nim ha' Éufrates, inkitoj riij chu'nchel i xa chib'ih jariik i wilik keh.

²¹Je' re' noq re' hin i nuqor taq aweh i hat jinaj i k'uhb'aal chi cha q'or taq keh i winaq re' re' chi kipab'aa' i kamanik, kikanaa' ruyejeb'jiik i tinamit kore' chik i hin naa nuq'oriik jaruuj inkorjik.

²²Inwaaj i hin chi nee taq i na a'n chi korik i nuq'or taq aweh, maa yeew taq q'ab' chi nenooj chi nimaal i ti' k'axik chi qanaah i hoj i wilkooj chi reyil, inki reje.

²³Eh noq x-ilarik wach i huuj xutaq'aaj reje i reey Artajerjes chuwach i Rehum, chuwach i Simsai i aj tz'ihb', chikiwach i kuch'ihil. Re' keh kajimam kiib' xiooj Jerusaleem, pank'aah xkiq'or reh taqe i aj Judío chi kipab'aa' i kamanik xkitoq'aa' rub'aan.

²⁴Je' aj re' noq xkikanaa' i kamanoom ruyejeb'jiik i rupaat i Dios ar Jerusaleem. Korehtaal chik xponik parukab' haab' rokiik chi reyil i Dario ar Persia.