Read Poqomchi Esd 5 Bible Online

Esd 5 - Poqomchi bible

Esd 5

¹Re' taqe i jalal ruq'oral i Dios Hageo, i Zacarías rak'uun i Iddo xkiq'or reh taqe aj Judío wilkeeb' Judá, wilkeeb' Jerusaleem i xq'orarik keh ruum i qaDios i hoj, i hoj aj Israel re' i wilik kuuk'.

²Noq xkib'iraj chi je' re' i Zorobabel rak'uun i Salatiel, ruch'ihil i Jesúa i rak'uun i Josadoc xi okik wo' chik chi kamanik ruka'peech chi rutinamiit i rupaat i Dios ar Jerusaleem. Eh re' taqe i jalal ruq'oral i Dios wilik i koq kuuk' chi kitoob'jiik.

³Eh chupaam taqe q'iij re' re', re' i Tatnai re' i wilik chi taaq'anik i wilik wii' i nim ha' Éufrates ruch'ihil i Setar-boznai, haa' taqe i kuch'ihil junch'uq xi k'uloq kuuk' i kamanoom, je' wili i xkiq'or: ¿Awach taq xq'orik aweh chi xatokik wo' chik taq chi rutinamiit i rupaat i Dios, je' wo' hoq i koraal tz'aq? inki taqe.

⁴Eh xkipahqaaj wo' chi je' wili: ¿Chib'ih kib'ihnaal i k'ahchi' keeb' chi rutinamiit taqe i wili? inki taqe.

⁵Xa re' la', re' i QaJaaw Dios k'ahchi' rutoob'iniik keh i k'amal kib'eeh taqe i aj Judío, ruum aj re' ma' xkikanaa' taj i kamanik, korehtaal xkitaq'aaj reje ruq'orariik chi huuj reh i reey Dario reh chi naa ruchaq'weem chaloq mi neenkikanaa' i kamanik oon ma' nee ta nkikanaa'.

⁶Re' Tatnai re' wilik chi taaq'anik chupaam i ye'aab' wilik reje parookb'aal q'iij chi juntar i nim ha' Éufrates, ruch'ihil Setar-boznai, haa' taqe i kuch'ihil xkitaq'aaj reje ruhuuj i reey Dario.

⁷Je' wili i ruq'or chupaam: Re' hat qajaaw reey Dario re' hoj inq'ataq'aaj reje rusuqkiil ak'ux.

⁸Re' hoj inq'ataq'aaj reje ruq'orariik aweh chi xoj ponik chupaam i ye'aab' Judá xqilow chi k'ahchi' kiyejaam i rupaat i Dios nim rajaawriik, eh ruuk' i nimaq taq ab'aj, k'ahchi' kiyejaam. Eh k'ahchi' kib'urum i koq kiwach i tz'aq ruuk' taqe i holohaq chee' k'ahchi' kinik'eem kiq'iij chi kamanik, eh holohik k'ahchi' reliik chikiwach.

⁹Re' hoj xqapahqaaj keh i k'amal kib'eeh i aj Judío chi awach xye'wik q'ab' keh chi xkitoq'aa' wo' chik ruyejeb'jiik rupaat i Dios, eh chi xkikoj i koq i holohaq chee' chuwach i tz'aq.

¹⁰Eh xqapahqaaj wo' hoq chib'ih kib'ihnaal i k'ahchi' keeb' chi kamanik reh naq chi naa qataq'aam reje ruq'orariik i kib'ihnaal.

¹¹Re' keh je' wili i chaq'wik xkian: Re' hoj, hoj raj kamanoom i QaJaaw Dios nim rajaawriik chikinaah i wilkeeb' pan taxaaj i je' wo' chikinaah i wilkeeb' wach ak'al. Re' reh k'ahchi' qayejaam i rupaat, re' wo' hoq i xuyejaa' kahnoq najtir i jinaj i runimaal wach reey wihinaq cho Israel.

¹²Re' taqe i qamaam qati't xkijosaj wach i rujosq'iil i Dios wilik cho pan taxaaj, je' aj re' noq re' QaJaaw Dios xuq'asaj taqe pan q'ab' i Nabucodonosor i kireey i aj Babilonia, eh aj Caldeo. Re' i reey re' re' xyojwik reh i rupaat i Dios, eh xuk'am taqe reje i Babilonia i qamaam qati't.

¹³Eh koq'uun chik noq jinaj chik haab' i rokiik chi reyil Babilonia i Ciro xuq'or chi naa wo' chik ruyejeb'jiik chi korik i rupaat i Dios.

¹⁴Eh xuq'or wo' hoq i reey i Ciro chi xelik chaloq taqe i kulk, re' ruuk' i plata, i oro chupaam i rupaat taqe i tiyoox wilik Babilonia, re' taqe i xresaj reje i Nabucodonosor chupaam i rupaat i Dios ar Jerusaleem. Re' taqe i kulk re' re' xuq'asaj reh i Sesbasar, re' i Ciro xupab'aa' chi taaq'anik chikinaah aj Judá.

¹⁵Eh je' wili i xuq'or i Ciro reh i Sesbasar: Chawesaj taqe i kulk nenooj aq'asaj chupaam i rupaat i Dios ar Jerusaleem, neenaq'or chi ar wo' chik neen korjik i rupaat i Dios aha' xkorjik wii' pampeet, inki.

¹⁶Je' aj re' noq re' i Sesbasar xchalik Jerusaleem xukoj i raa' i rupaat i QaJaaw Dios. Ar aj xtohq'ik cho ruyejeb'jiik i rupaat i Dios, eh xakomajaa' ta wo' inkuxik ruyejeb'jiik.

¹⁷Je' re' noq re' hoj qajaaw reey inqapahqaaj aweh chi sik'aroq chupaam i huuj molik chupaam i paat i na a'n wii' i taaq'anik ar Babilonia. Ar neenasik' chi riij mi korik chi re' reey Ciro, xataaq'anik ruq'orariik chi naa wo' chik rukorjiik i rupaat i Dios. Eh inqaaj chi nee naa taq'aaj cho ruq'orariik qeh aha' wilik inawaaj chi neenqa'an, inki taqe.