Read Poqomchi Est 3 Bible Online

Est 3 - Poqomchi bible

Est 3

¹Koq'uun chik re' i reey Asuero xuyeew rajaawriik i Amán rak'uun i Hamedata re' ruuk' taqe Agagueo xukoj chi k'amal kib'eeh taqe i wilkeeb' chi taaq'anik chupaam i ju'jun chi tinamit.

²Eh chu'nchel i kikamanik ruuk' i reey inkixuk'aa' kiib' inkik'utzaa' i kinaah chuwach i Amán, ruum je' re' i ruq'orom i reey. Xa re' la' re' Mardoqueo reh ma' ruxuk'aa' ta riib' ma' xuk'utzaa' tee naah chuwach i Amán.

³Re' taqe i raj kamanoom i reey xkipahqaaj reh i Mardoqueo chi je' wili: ¿Chib'ih reet noq ma' nanimaj taj i k'uhb'aal xuq'or i reey? inki taqe.

⁴Eh k'ih pech xkipahqaaj reh i Mardoqueo chib'ih reet noq ma' rub'an taj i ruq'or i reey. Eh re' Mardoqueo xama' x-ib'irinik ta wo' chikiwach, eh xkiq'or reh i Amán chi re' Mardoqueo ma' ruxuk'aa' ta riib' chuwach ruum kiq'or reh chi aj Judío, xkaaj kinab'eem mi nee ruq'or chuwach i Amán chi aj Judío.

⁵Noq xunab'eej i Amán chi re' Mardoqueo ma' ruxuk'aa' ta riib' ma' ruk'utz'aa' tee naah chuwach noq i nik'ik yohb'aal wach noq xchalik ruk'aah.

⁶Eh noq xrib'iraj i Amán chi re' i Mardoqueo aj Judío ma' xraaj ta rukansam xa chi rutkeel i Mardoqueo xukapaaj chi xti ruk'ul chi junkimiik taqe chu'nchel i aj Judío wilkeeb' chi ri'sil i rajaawriik i reey Asuero.

⁷Eh chupaam i peet poh Nizán i b'ih chupaam irukab'laaj haab' rokiik chi reyil i Asuero, xkisik' riij chuwach i Amán i poh i q'iij i Amán. Noq kiq'ijem chik riij i q'iij xkahnik chik chi chupaam i oxlaj rub'eeh irukab'laaj poh reh irukab'laaj haab' rokiik chi reyil i Asuero naa rub'anam ikaansanik i Amán, re' i poh re' re' Adar i b'ih.

⁸Re' Amán je' wili i ruq'or reh i reey Asuero: Chu'nchel i tinamit achopom naah i hat reey ma' kian ta jinaj wach kik'ux ruuk' taqe i junch'uq. Eh ma' eliik ta wach i k'uhb'aal inkinimaj reh reh inkinimaj. Eh ma' kian taj inaq'or, ruum aj re' ma' ruk'ul taj chi nee kik'acharik chi ri'sil awajaawriik.

⁹Wila' ruk'ul ak'ux i hat reey chakoj jino'q i k'uhb'aal nee ruq'or chi neensahchik kiwach i aj Judío. Re' hin neenuk'am chaaweh ik'inaq wuq'uub' siento miil libra chi tumiin re' ruuk' i plata reh chi neen kiyeew panye'aab' reh i kimol wiik tumiin, inki Amán.

¹⁰Eh re' reey Asuero xresaj i rulopq'aaq' ju' q'ab' xuyeew reh i Amán rehtalil chi xuyeew i rajaawriik, re' inixowanik kiwach i aj Judío.

¹¹Eh je' wili xuq'or reh: Neerub'an chi neenamol chi aweh i tumiin re' re', Neerub'an chi neena a'n kuuk' i tinamit re' re' nik' wach inawaaj, inki reey.

¹²Eh chupaam i oxlaj rub'eeh i peet poh reh i haab' re' re' xtaq'ab'jik kik'amariik taqe i raj tz'ihb' i reey. Eh xkitz'ihb'aaj i k'uhb'aal je' rukab' i xuq'or i Amán, eh xkitaq'aaj reje keh taqe i wilkeeb' chi taaq'anik chupaam i ju'jun chi tinamiit, i ju'jun chi ye'aab' i wilkeeb' chi ri'sil i rajaawriik i reey. Eh re' k'uhb'aal re' re' xkitz'ihb'aaj chupaam i kiq'oral i ju'jun seht chi tinamit. Re' huuj re' re' tz'ihb'jik parub'ihnaal i reey Asuero, eh xkikoj wo' hoq i rehtaliil rulopq'aaq' i reey chuwach i huuj.

¹³Eh re' taqe i kikamanik ruuk' i reey xkik'am reje i huuj re' re' chupaam i ju'jun chi tinamit wilik chi ri'sil i rajaawriik i reey. Eh aha' ta chik ma' x-ib'irjik i ruq'or i k'uhb'aal chi naa kikanteesjiik chu'nchel i aj Judío chupaam i oxlaj rub'eeh irukab'laaj poh Adar i b'ih, junojiik noq naa rusahchiik kiwach i aj Judío chi nimaq chi kok' taq chi winaq chi ixoq, eh chi naa rehchaljiik i chib'ih keh.

¹⁴Re' i k'uhb'aal xukoj i reey Asuero xutaq'aaj ruq'orariik panhuuj chupaam i ju'jun chi tinamit reh chi naa kikowem kik'ux chuk'ulariik i re' chupaam i q'iij xuq'or i reey.

¹⁵Eh re' taqe i kikamanik ruuk' i reey xkipuhkaaj lom chi jumehq'iil i huuj, je' rukab' i xuq'or i reey. Re' k'uhb'aal xukoj i reey xpuhkuljik ruq'orariik chupaam chu'nchel i tinamit Susa. Noq re' reey Asuero ruch'ihil i Amán uk'ik inki a'n chu'nchel i wilkeeb' chupaam i tinamit Susa xiik' naah ti'kiil kik'ux.