Read Poqomchi Est 4 Bible Online

Est 4 - Poqomchi bible

Est 4

¹Noq xrib'iraj i Mardoqueo chib'ih jariik i k'ahchi' ruk'ulariik xuxih i ruso' chi riij xukoj i q'as wach itz'ihy chi riij, xutukej chaaj chi riij, xooj rub'ehuj paam i tinamit rajimam riib', k'erik chii' ruum ruti'kiil ruk'ux.

²Eh xponik ko chi chii' i ru puertahiil i rupaat i reey. Xa re' la' ma' xokik taj ruum ma' inye'arik ta q'ab' chi kiokik i koq ar i kikojom q'as wach itz'ihy chikiij.

³Eh chupaam taqe tinamit ruchopom naah i reey Asuero xponik rib'iral i k'uhb'aal xukoj. Ruum i re' xchalik koq'iim runimaal ruti'kiil kik'ux i aj Judío. Eh xkian kitiij chi ma' kianam ta kiwa' kihaa', ma' k'isiin taqe i xkiyok'aa' kiib' pan chaaj, eh xkikoj q'as wach itz'ihy chikiij.

⁴Re' taqe ixoq, eh re' taqe winaq i kapuun kikamanik ruuk' ixoq reey Ester xkiq'or reh chib'ih jariik i k'ahchi' rub'anam i Mardoqueo yohb'aal wach noq xchalik ruti'kiil ruk'ux i Ester. Eh xutaq'aaj reje i holohaq itz'ihy reh i Mardoqueo reh noq chi naa rukojom chi riij chi naa resam i q'as wach itz'ihy chi riij, eh re' reh ma' xuk'ul taj.

⁵Eh re' ixoq reey Ester xuyuq'eej ruuk' i Hatac jinaj keh i kapuun re' wo' ruye'em i reey chi kamanik ruuk' i Ester xutaq'aaj chi rilariik i Mardoqueo, eh chi naa rupahqaam reh chib'ih i k'ahchi' ruk'ulariik, chib'ih reet noq k'ahchi' rub'anam i je' re'.

⁶Eh re' Hatac xooj wo' chi q'orob'jiik i Mardoqueo wilik ar pamb'eeh chik chii' i ru puertahiil i rupaat i reey.

⁷Re' Mardoqueo xuq'or reh i Hatac chu'nchel i k'ahchi' ruk'ulariik. Eh xuq'or reh nik' k'ihaal i tumiin naa ruye'em i Amán aha' inmoralik wii' i rutumiin i reey, wila' xutaq'aaj kikanteesjiik chu'nchel i aj Judío.

⁸Eh xuyeew reh Hatac i huuj xpuhkuljik Susa re' tz'ihb'amaj wii chi naa rusachariik kiwach i aj Judío. Eh chi naa ruq'asam i huuj reh ixoq reey Ester, reh chi nee runab'eej i k'ahchi' kik'ulum. Eh xutaq'aaj ruq'orariik reh i Ester chi ohoq ruq'oreej i reey Asuero, reh chi neerupahqaaj rukuyb'al reh chi nee ta tiruketelaaj kiwach i aj Judío, re' taqe i ruch tinamitaal i Ester.

⁹Eh re' Hatac xsutinik wo' chik reje ruuk' i Ester, eh xuq'or reh chu'nchel i xq'orarik reh ruum i Mardoqueo.

¹⁰Re' Ester xutaq'aaj wo' chik reje i Hatac ruuk' i Mardoqueo reh chi naa ruq'orom reh taqe i q'orik wili:

¹¹Chu'nchel i kikamanik ruuk' i reey, chu'nchel patim chupaam taqe i ju'jun chi tinamit wilkeeb' chi ri'sil i rajaawriik i reey keht'al chi ruq'or i k'uhb'aal chi naa rukanteesjiik awach i xanaakokiik i koq chi ru puerta i reey chi ma' yuuq'imaj ta ruum i reh atoob' ta winaq atoob' ta ixoq. Xa re' wo' neekiko'ljik wila' re' reey xujosaj taxaaj i rukarote oro, rehtaliil chi ma' naa ta kikanteesjiik. Eh re' hin xik'ik chik i lajeeb' ru ka'winaq q'iij chi ma' hin ta chik ruyuq'eem ruuk' i reey.

¹²Re' Hatac xponik wo' ruq'or reh i Mardoqueo taqe i xuq'or i Ester.

¹³Eh re' Mardoqueo je' wili i xutaq'aaj reje ruq'orariik reh i Ester: Re' hat maakapaaj chi naa ako'ljiik ma' ruum ta chi parupaat i reey wilkaat ruum chi hat aj Judío i hat naa wo' akimiik wila' xojkimik i hoj.

¹⁴Wila' re' hat ma' xta xa a'n yu'naak, re' hin weht'al chi wilik naa ruko'liniik keh i quch aj Judío xa re' la' tokoom naa kichaliik. Xa re' la' re' hat, awuch'ihil taqe i awach keh awajaaw naa taq akimiik. Ruq'iij ruum chi xat ponik chi hat ixoq reey reh chi naakooj ako'leem chuwach i ti' k'axik wili, inki.

¹⁵Eh re' Ester je' wili i xutaq'aaj reje ruq'orariik reh i Mardoqueo:

¹⁶Re' hat chamol kiwach i aj Judío wilkeeb' Susa. Neenaq'or keh chi neenkian kitiij chi wiij chi ma' kianam ta kiwa' kihaa', chuwach ixib' q'iij, ixib' aq'ab'. Eh je' wo' re' i naa nub'anam i hin wuch'ihil taqe ixoq kikamanik wuuk', chi riij i re' nee kinooj chi k'utaaj ruuk' i reey atoob' ta ma' ruk'ul ta chuwach i k'uhb'aal chi je' re' i naa nub'anam. Wi xirukansaj, kirukansaj wo' pee re', inki i Ester.

¹⁷Eh re' Mardoqueo xooj reje, xub'an chu'nchel i xq'orarik reh ruum i Ester.