Read Poqomchi Est 5 Bible Online

Est 5 - Poqomchi bible

Est 5

¹Noq xik'ik ixib' q'iij re' Ester xutiq'aa' reje riib' chi korik xukoj reje i ruso' chi ixoq reey, xokik i koq chi chii' i rupaat i reey, eh xokik i koq chupaam i paat tz'unlik wii' i reey, re' i wilik chuk'ulwaach i puerta.

²Eh noq re' reey xrilow wach i Ester chi chii' i paat, ma' k'isiin ta xsuuqb'ik ruk'ux, xujosaj johtoq taxaaj i rukarote oro wilik pan q'ab'. Re' Ester xujil i koq riib' xutz'aj i ju' rukarote i reey.

³Re' reey xupahqaaj reh i Ester chi je' wili: ¿Chib'ih inawaaj ixoq reey Ester? Wila' xapahqaaj yejaal-oq weh i ye'aab' nuchopom naah, re' hin xa nee wo' i nuyeew aweh, inki.

⁴Eh re' Ester je' wili xuq'or: Wila' ruk'ul ak'ux i hat reey i nupahqaaj otob'il aweh chi nee tiooj yu'naak awuch'ihil i Amán chupaam i ninq'iij nuyejaam wach cha weh, inki.

⁵Re' reey je' wili i xuq'or: Chayuq'eej taq cho weh chi jumehq'iil i Amán reh chi nenooj qa'an aha' wilik iraaj ixoq reey Ester, inki. Re' reey ruch'ihil i Amán xiooj chupaam i ninq'iij ruyejaam wach i Ester.

⁶Eh noq uk'ik chik riis uuva inki a'n chupaam i ninq'ijinik, re' reey je' wili i xuq'or reh i Ester: Chapahqaaj weh chib'ih inawaaj re' hin neenuyeew aweh, eh wila' xapahqaaj yejaal-oq weh i ye'aab' nuchopom naah re' hin xa nee wo' nuyeew aweh, inki.

⁷Eh re' Ester je' wili ruchaq'weesjiik xub'an: Re' nukapaaj i hin, re' waaj i hin, re' wili:

⁸Wila' re' hat inawaaj rub'aan i neenupahqaaj aweh, wila' nawaaj a'nam otob'il weh ti chaloq wo' chik i iqal awuch'ihil i Amán chupaam i ninq'iij nuyejaam taq wach cha weh. Eh re' hin i iqal neenuq'or aweh aha' wilik inapahqaaj weh i hat reey, inki.

⁹Re' Amán xelik cho chupaam i ninq'iij re' re' chi suq suq ruk'ux. Xa re' la' yohb'aal wach i ruk'aah noq xrilow wach i Mardoqueo chi tzunlik i koq chi chii' i ru puertahiil i rupaat i reey ma' ruk'utz'aa' ta riib' chuwach, ma' k'uyu'jik ta k'isinoq noq i rilow chi nik'ik chuwach.

¹⁰Eh re' Amán chupaam i junk'aam re' re', ma' xuk'uhtaaj taj chi q'e' rixow wach i Mardoqueo, xa re' la' noq xponik parupaat xuyuq'eej ruuk' i Zeres i rehk'een, xuyuq'eej ruuk', re' taqe ramigo.

¹¹Re' Amán xuyeew runimaal wach, xuk'utjaaj keh i rub'ehomal, chi ruk'ihaal taqe rak'uun rixq'uun, eh chi sik'ooj wach ruum i reey. Eh xuk'utjaaj keh chi ma' k'isiin ta ye'arik runimaal wach ruum i reey, chi xa re' wo' reh xiik' naah nimaal wach i rukamaj chikiwach chu'nchel i raj kamanoom i reey.

¹²Eh xuq'or wo' keh chi je' wili: Xa re' wo' hin xiruyuq'eej i Ester ixoq reey chupaam i ninq'iij ruyejaam wach reh i reey. Eh xiruyuq'eej wo' chik haa' chi ruch'ihil i reey chupaam i ninq'iij naa rub'anam eqal

¹³Xa re' la' chu'nchel i re' xama' xta nokik wii' weh noq inwilow i Mardoqueo aj Judío chi tzunlik chii' ru puertahiil i rupaat i reey, inki Amán.

¹⁴Eh re' Zeres i rehk'een, ruch'ihil taqe ramigo, je' wili xkiq'or reh: Chataq'aaj ruyejeb'jiik jino'q i jihk'b'al iib' hoob' ru ka'winaq b'ara runajtiil naah, eh i iqal wahq'eq neenapahqaaj ree reey Asuero chi ar neerujihk'aaj chi ralaq i Mardoqueo, reh chi suq ak'ux noq nee ti okik chi ninq'ijinik awuch'ihil i reey, inki taqe reh. Re' Amán xuk'ul ruk'ux xq'orarik reh, xutaq'aaj wo' ruyejeb'jiik jihk'b'al iib'.