Read Poqomchi Est 7 Bible Online

Est 7 - Poqomchi bible

Est 7

¹Re' i reey Asuero ruch'ihil i Amán xiooj chupaam i ninq'iij ruyejaam wach i Ester.

²Eh noq wilkeeb' chik paninq'iij, uk'ik chik riis uuva inki a'n xupahqaaj wo' chik i reey reh i Ester chi je' wili: Yu'naak cha q'or weh chib'ih inawaaj, re' hin neenuyeew aweh. Wila' xapahqaaj yejaal-oq weh i ye'aab' nuchopom naah re' hin neenuyeew aweh, inki.

³Re' Ester ixoq reey je' wili ruchaq'weesjiik xb'aan: Wila' re' hat reey xtinawaaj a'nam otob'il weh, wila' kinak'ax, xa re' wo' nupahqaaj aweh chi maayeew tii q'ab' chi nee kinkanteesjik i hin, eh chi nee kikanteesjik i wuch tinamitaal.

⁴Ruum re' hin wuch'ihil taqe i wuch tinamitaal xoj k'ayjik chik pankimik, reh chi naa rusachariik qawach, wita naq xa chi mosojik xoj k'ayjik ma' xta naq i neenuq'or aweh, inki.

⁵Re' i reey Asuero xupahqaaj reh i Ester chi je' wili: ¿Awach k'ahchi' rukapeb'iniik reh i yiib' wach na'ojb'al re' re'? ¿Awach i winaq re' re'? inki.

⁶Re' Ester je' wili i xuq'or: Re' inixowanik qawach, re' i Amán wili i yiib' wach runa'ojb'al, inki. Eh noq xrib'iraj i Amán chi je' re' xanoq wo' siikrik ruum ruyo'jiik chuwach i reey, eh chuwach ixoq reey.

⁷Re' reey Asuero xwuktik chaloq yohb'aal wach i ruk'aah xelik cho chupaam i ye'aab' k'ahchi' wii' i ninq'iij, xchalik i tikooj wii' i uhtz'ub' wilik chi chii' i rupaat i reey. Eh re' Amán noq xukoj rehtaal chi naa rukanteesjiik ruum i reey xkahnik cho chupaam i paat, ar xupahqaaj rukuyb'al reh i Ester chi neenkolob'jik, reh chi ma' nee ta naq inkanteesjik.

⁸Re' Amán pachlik i koq chupahqaljiik rukuyb'al chuwach i Ester ja'lik chupaam i holohik tzunaab', re' i k'ahchi' keeb' wii' chi ninq'iij, eh noq xokik wo' chik i koq i reey xponik rureq chi je' re' noq wilik i Amán je' wili xuq'or reh: ¿Je' inche nawaaj inche achopom i Ester ixoq reey panupaat? inki. Noq xuq'or chi je' re' i reey xkichop i Amán xkib'ur inaq'wach.

⁹Eh re' Harbona, jinaj keh i kapuun kikamanik ruuk' i reey je' wili i xuq'or: Chupaam i rupaat i Amán wilik jinaj i chee' jihk'b'al iib', hoob' ru ka'winaq b'ara runajtiil naah, re' xuyejaa' i reh jihk'b'al naq reh i Mardoqueo. Re' i winaq q'e' holohik inq'orik chawiij i hat reey inki. Re' reey Asuero je' wili chaq'wik xub'an: Chajihk'aaj taq ar i reh, inki.

¹⁰Je' re' noq ar xkijihk'aaj chi ralaq i Amán chupaam i xuyejaa' chi jihk'b'al naq reh i Mardoqueo. Ruuk' i re' xjot'ik wach i ruk'aah i reey Asuero.