Read Poqomchi Sal 119 Bible Online

Sal 119 - Poqomchi bible

Sal 119

¹Atoob' keh i re' korik inki a'n pan kik'achariik. Eh inkik'am naah i ruk'uhb'aal i QaJaaw Dios.

²Atoob' keh inki a'n chu'nchel i ruq'or i ruk'uhb'aal. Eh inkisik' chu'nchel i kánima.

³Ma' nkian taj i yiib' wach na'ojb'al, inkik'am la' i rub'eeh i QaJaaw Dios.

⁴Re' hat QaJaaw Dios aq'orom chi ajwaal wach chi naa rub'aan taqe i ruq'or aak'uhb'aal.

⁵Re' hin holohik ta naq neekinb'anik reh chi neenub'an i taqe ruq'or aak'uhb'aal.

⁶Eh wila' xnub'an chu'nchel i ruq'or aak'uhb'aal ma' xta neekink'ixik wii'.

⁷Eh noq nureqem chik chi riij aak'uhb'aal, naa kaat nuloq'em ruuk' i rukorkiil wach i wánima.

⁸Re' hin neenub'an chu'nchel i ruq'or taqe aak'uhb'aal. Xa re' la' makinakanaa' chi wutkeel.

⁹¿Nik' wach noq nee rureq i saq wach k'acharik i k'ijool? Xa re' wo' chi neerub'an taqe i ruq'or aq'oral.

¹⁰Eh re' hin chu'nchel nuk'ux xatnusik' maayeew q'ab' chi neenukanaa' runimjiik taqe aak'uhb'aal.

¹¹Re' hin numolom pan wánima taqe aq'oral reh chi ma' nee ta chik kimahkunik chawach.

¹²QaJaaw Dios, re' hat xiik' naah aaloq'il. Cha k'uhtaaj tii weh taqe aak'uhb'aal.

¹³Re' hin naa nuq'orom rib'iral chu'nchel aak'uhb'aal aq'orom chaloq.

¹⁴Re' hin insuuqb'ik nuk'ux chub'aan i ruq'or taqe aak'uhb'aal, ma' xata je' rukab' i ruyeew chu'nchel i b'ehomal.

¹⁵Eh naa nutijem riij chi korik aak'uhb'aal, eh naa nuk'amam naah ruuk' animjiik.

¹⁶Re' hin insuuqb'ik nuk'ux ruum taqe aak'uhb'aal eh ma' jaruuj naa rusahchiik panuk'ux aq'oral.

¹⁷Jaaw, chayeew pee nuk'achariik i hin, hin awaj kamanoom. Reh chi neenub'an taqe i ruq'or aak'uhb'aal.

¹⁸Eh cha teh inukapeb'aal reh chi neenureq chi riij chi re' aak'uhb'aal xiik' naah loq'il.

¹⁹Re' hin xa hin ik'al b'eeh ayu' wach ak'al, ruum aj re', maakeb'aa' tii chi nuwach taqe aak'uhb'aal.

²⁰Re' hin chu'nchel q'iij inyot'ik i wánima chi rotoowjiik rureqariik chi riij chi korik, aak'uhb'aal.

²¹Re' hat xaq'il taqe inkinimb'isaj kiwach, re' taqe i kiq'eb'em kiib', eh kikanaam runimjiik aak'uhb'aal.

²²Jaaw kinako'leej tii chuwach i kijosq'iil taqe i ki-ixowanik nuwach, ruum re' hin i nunimaj taqe aak'uhb'aal.

²³Eh wilik taqe i nimaq wach kina'ojb'al inkaaj nujot'ariik. Xa re' la', re' hin, i hin awaj kamanoom re' taqe aak'uhb'aal naa nutijem riij.

²⁴Re' hin q'e' nsuuqb'ik nuk'ux chi riij taqe aak'uhb'aal, ruum re' taqe re' inkojwik nuna'ojb'al.

²⁵Q'e' ti' wilkiin, xanaa chik nukimiik noq i wik'raaj. Jaaw kinako'leej tii, je' rukab' aaq'orom weh.

²⁶Eh nuq'or aweh nik' wach i nuna'ojb'al, eh re' hat xayeew weh i xnupahqaaj aweh. Eh cha k'uhtaaj weh taqe aak'uhb'aal.

²⁷Chayeew nuna'ojb'al reh chi neenureq chi riij taqe aak'uhb'aal. Reh chi nutijem riij taqe i xiik' naah loq'il inak'uhtaaj.

²⁸Re' hin xa re' chikoq'iki nub'an. Chayeew rukowiil nuk'ux, je' rukab' aaq'orom weh.

²⁹Eh inwaaj chi neenawesaj chi nuwach taqe chukuj q'orik. Chaketelaaj nuwach kinatijej ruuk' taqe aak'uhb'aal.

³⁰Re' hin xnusik' chik i korik laj b'eeh ruum aj re', xa re' chik i ruq'or taqe aak'uhb'aal i nub'an.

³¹QaJaaw Dios re' hin i nub'an taqe inaq'or. Ruum ma' nwaaj taj chi neenak'uhtaaj nuk'ixb'ilaal.

³²Re' hin i nuyeew nuk'ux chub'aan taqe i ruq'or aak'uhb'aal, ruum q'e' insuuqb'ik i wánima.

³³QaJaaw Dios cha k'uhtaaj weh i rukorkiil taqe aak'uhb'aal reh chi nee nunimaj korehtaal i weliik ayu' wach ak'al.

³⁴Chayeew tii nuna'ojb'al reh chi nee nub'an chu'nchel nuk'ux taqe i ruq'or aak'uhb'aal.

³⁵Chak'am nub'eeh ruuk' taqe aak'uhb'aal ruum xa ruuk' wo' re' neenureq rusuqkiil nuk'ux.

³⁶Eh xa re' chik taqe aak'uhb'aal neenub'an. Ma' nee ta nuyeew nuk'ux chinaah i b'ehomal.

³⁷Eh chawesaj i naq'nuwach chinaah i xama' xta ruk'am chaloq. Chayeew la' rukowiil nuk'ux reh chi neenuk'am aab'eeh.

³⁸Chayeew wee hin, i hin awaj kamanoom i aq'orom cho chi naa aye'em keh i kiyohlinik aweh.

³⁹Eh chawesaj chi nuwach i nub'ajariik inki a'n re' inchalik nuyo'jiik ruum. Re' taqe i ruq'or aak'uhb'aal korik.

⁴⁰Re' hin xa nwotow chik rub'aan taqe i ruq'or aak'uhb'aal. Chayeew rukowiil nuk'ux, ruum re' hat korik wach ak'ux.

⁴¹QaJaaw Dios, chaketelaaj nuwach kinako'leej tii je' rukab' aaq'orom cho weh.

⁴²Chi je' re' nee kinchol ruchaq'weesjiik imb'ajwik weh, ruum re' hin nuch'ikaam nuk'ux ruuk' aq'oral.

⁴³Maayeew q'ab' chi neenukanaa' ruq'orariik i korik, ruum re' hin chinaah taqe aak'uhb'aal nuye'em nuk'ux.

⁴⁴Re' hin inwaaj nub'anam panuk'achariik chi juneliik taqe i ruq'or aak'uhb'aal.

⁴⁵Eh ma' xta neenq'ilwik weh, ruum k'ahchi' nuk'amam naah taqe aak'uhb'aal.

⁴⁶Re' hin naa nuq'orom rib'iral aak'uhb'aal keh taqe i reey, ma' nee ta kink'ixik chuq'orariik.

⁴⁷Eh re' hin q'e' nuk'ax taqe aak'uhb'aal, eh q'e' suq nuk'ux chi riij.

⁴⁸Q'e' nuk'ax, eh inwootwaaj rub'anariik i ruq'or taqe aak'uhb'aal, eh xa re' chik i re' i nukapaaj riij.

⁴⁹K'oloq panak'ux aaq'orom chaloq chi naa a'nam wuuk' i hin, i hin awaj kamanoom. Reh chi neenwuy-eej.

⁵⁰Eh re' aq'orom cho weh chi naa a'nam wuuk' inye'wik rusuqkiil nuk'ux noq ti' nuk'ux. Ruuk' i re' i nayeew rukowiil nuk'ux.

⁵¹Re' taqe i nimaq kiwach inki a'n kiib' xak'ahchi' keeb' chi nub'ajariik. Xa re' la', re' hin ma' nukanaam ta runimjiik aak'uhb'aal.

⁵²QaJaaw Dios, re' hin ink'ulik panuk'ux taqe aak'uhb'aal aq'orom cho najtir, ruuk' taqe re' insuuqb'ik nuk'ux.

⁵³Ruum aj re', inchalik nuk'aah chikinaah i yiib' wach kina'ojb'al, ruum inkiq'eb' chi riij kik'ux taqe aak'uhb'aal.

⁵⁴Re' hin inutz'uyej wach aak'uhb'aal noq wilkiin chupaam i ye'aab' wili i xa ik'ik weh chupaam.

⁵⁵QaJaaw Dios re' hin tik'ulik panuk'ux pantaq chaq'ab', ruum aj re', inwaaj numolom aak'uhb'aal.

⁵⁶Re' aawotob'il wili ruk'ul chi weh ruum k'ahchi' nunimam taqe aak'uhb'aal.

⁵⁷QaJaaw Dios, xa re' wo' hat titoob'inik weh, ruum aj re', naa nub'anam i ruq'or aq'oral.

⁵⁸Re' hin chu'nchel nuk'ux i nupahqaaj aawotob'il, chaketelaaj tii nuwach, je' rukab' aaq'orom weh.

⁵⁹Eh xnukoj rehtaal chi ma' holohik taj i nuna'ojb'al, ruum i re', xnunimaj wo' chik taqe aak'uhb'aal.

⁶⁰Atoob' naak ma' xnucham ta wiib', jumehq'iil wo' chik xtohq'ik nub'anam i ruq'or taqe aak'uhb'aal.

⁶¹Eh re' taqe i yiib' wach kina'ojb'al inkikotej wiij. Xa re' la', re' hin ma' nsahchik ta panuk'ux aak'uhb'aal.

⁶²Eh yejal aq'ab' kinwuktik chi t'ioosjik aweh, ruum re' aak'uhb'aal xti korik.

⁶³Re' hin i nub'an jinaj wach nuk'ux kuuk' i kiyohlinik aweh. Eh inki a'n taqe i ruq'or aak'uhb'aal.

⁶⁴QaJaaw Dios re' ketelinik wachiis i na a'n ink'utinik chi junsuut i wach ak'al. Ruum aj re' cha k'uhtaaj weh taqe aak'uhb'aal.

⁶⁵Jaaw re' hin, i hin awaj kamanoom eliik i na a'n otob'il weh, je' rukab' aq'orom weh.

⁶⁶Eh chayeew tii nuna'ojb'al reh chi neenureq chi riij i holohik. Ruum re' hin, ch'iklik nuk'ux ruuk' taqe aak'uhb'aal.

⁶⁷Korik, noq komajaa' inuk'ul i ti' k'axik xa chib'ih naq jariik kinq'ehb'ik wii'. Eh yu'naak i nunimaj chik aq'oral.

⁶⁸Re' hat q'e' hat atoob', xa re' holohik i na a'n. Re' hin inwaaj chi nee nak'uhtaaj weh taqe aak'uhb'aal.

⁶⁹Re' taqe nimaq kiwach inki a'n kiib' inkitz'aq wach numahk. Xa re' la' re' hin, chu'nchel nuk'ux k'ahchi' kiin i ruq'or taqe aak'uhb'aal.

⁷⁰Re' taqe re' tz'aplik i kikapeb'aal, raaj i hin q'e' nsuuqb'ik nuk'ux ruuk' aak'uhb'aal.

⁷¹Chi wee hin ma' xta reet chi xinayeew panti' k'axik. Ruum chi je' re' neenureq chi riij taqe aak'uhb'aal.

⁷²Chi wee hin xiik' naah loq'il aak'uhb'aal xinatijej wii' chuwach i ruk'ihaal oro, i ruk'ihaal plata.

⁷³Re' hat xatyej-anik weh, re' hat xat ye'wik nuk'achariik. Ruum aj re', inwaaj chi nee nayeew nuna'ojb'al reh chi neenutijej taqe aak'uhb'aal.

⁷⁴Re' taqe i kiyohlinik aweh naa rusuuqb'iik kik'ux, noq naakiinkilom chi ruuk' aq'oral inuch'ikaa' nuk'ux.

⁷⁵QaJaaw Dios, re' hin weht'al chi re' hat parub'ehel ti q'atwik q'orik. Ruum aj re', rub'ehel noq kow xinaq'il.

⁷⁶Ruuk' i ruketeljiik nuwach xa a'n ma' k'isiin ta nsuuqb'ik nuk'ux. Je' rukab' aq'orom cho weh chi naa a'nam wuuk', i hin awaj kamanoom.

⁷⁷Chak'uhtaaj tii weh aawotob'il reh chi konee kink'acharik. Ruum re' taqe aak'uhb'aal inye'wik rusuqkiil nuk'ux.

⁷⁸Neeta naq inkik'uhtaaj kik'ixb'ilaal i nimaq kiwach. Ruum re' keh xa nkitz'aq wach i numahk, re' hin re' taqe aak'uhb'aal i nutijej riij.

⁷⁹Eh jinaj ta naq wach kik'ux wuuk' i kiyohlinik aweh, ruum keht'al chib'ih ruq'or taqe aak'uhb'aal

⁸⁰Eh korik ta naq wach i wánima chunimjiik taqe aak'uhb'aal reh chi ma' xta neekink'ixik wii'.

⁸¹Re' hin xanwaaj chik chi naakiin ako'leem. Ruum inuch'ikaam nuk'ux ruuk' aak'uhb'aal.

⁸²Re' hin xa kinook chik iil reh taqe aq'orom rib'iral weh, je' wili i nuq'or: ¿Jaruuj i ruyeew rusuqkiil nuk'ux? kinki.

⁸³Atoob' ta hin chik riji' winaq xama' xta chik kinokik wii', re' aak'uhb'aal ma' jaruuj insahchik panuk'ux.

⁸⁴Jaaw ¿Ko nik' chik najtiil naawuy-eem? ¿Ko jaruuj i nayeew taqe chutojariik i kimahk i ki-ixowanik nuwach?

⁸⁵Re' taqe i nimaq kiwach i ma' kinimanik ta reh aak'uhb'aal, inkisik' chi riij i nukanteesjiik.

⁸⁶Jaaw kinatoob'eej tii ruum re' hin inkixowaaj nuwach chi ma' xta numahk. Weht'al i hin chi re' taqe aak'uhb'aal korik i ruq'or.

⁸⁷Ach naq k'isiin ma' xinkesaj ayu' wach ak'al, xa re' la', re' hin xama' xnukanaa' ta wo' runimjiik taqe aak'uhb'aal.

⁸⁸Chaketelaaj tii nuwach chayeew pee nuk'achariik. Chi je' re' ko neenub'an taqe aak'uhb'aal aq'orom ruuk' aachii'.

⁸⁹QaJaaw Dios re' aq'oral wilik chi juneliik. Eh ar choplik cho chi korik pan taxaaj.

⁹⁰Re' rukorkiil wach ak'ux wilik chi juneliik, re' hat xat ye'wik reh paruye'aab' i wach ak'al, eh xkahnik paruye'aab'.

⁹¹Chu'nchel i re' xa ko pan kiye'aab' wo' wilkeeb' yu'naak, je' rukab' i xaq'or keh. Eh chu'nchel i re' awaj kamanoom taqe.

⁹²Wi ta ma' xuk'am cho rusuqkiil nuk'ux aak'uhb'aal, xin kimik naq chik chupaam i ruti'kiil nuk'ux.

⁹³Re' hin ma' jaruuj neensahchik panuk'ux taqe aak'uhb'aal ruum ruuk' taqe re' xayeew nuk'achariik.

⁹⁴Jaaw kinako'leej tii ruum re' hat ti ehchanik weh. Eh k'ahchi' nub'anam i ruq'or taqe aak'uhb'aal.

⁹⁵Re' i yiib' wach kina'ojb'al xa kuy-eem chik nik' naakiin kikansam. Eh re' hin, re' aak'uhb'aal wilik panuk'ux.

⁹⁶Eh chu'nchel i xa chib'ih jariik insahchik kiwach. Eh re' taqe aak'uhb'aal i hat ma' jaruuj naa rusahchiik kiwach.

⁹⁷Re' hin ma' k'isiin ta nuk'ax aak'uhb'aal, chu'nchel i q'iij inutijeej riij.

⁹⁸Re' taqe aak'uhb'aal xuyeew nuna'ojb'al chi korik. Ruum aj re', q'e' chik wilik nuna'ojb'al chikiwach i ki-ixowanik nuwach.

⁹⁹Eh q'e' chik wilik nuna'ojb'al chikiwach i kitijiniik weh ruum xa re' chik taqe aak'uhb'aal i nutijej riij.

¹⁰⁰Eh q'e' wilik nuna'ojb'al chikiwach i mama' winaq. Ruum re' hin, i nunimaj i ruq'or taqe aak'uhb'aal.

¹⁰¹Re' hin xnuq'eb' chi riij nuk'ux chu'nchel i yiib' wach b'eeh, reh chi naa nub'anam i ruq'or aq'oral.

¹⁰²Eh ma' nukanaa' ta runimjiik taqe aak'uhb'aal ruum re' hat xatk'uhtanik weh.

¹⁰³Re' aq'oral, ma' k'isiin ta suq kiil i ruq'or. Ma' xata je' ki'iil i riis kaab' chi wee hin.

¹⁰⁴Re' hin re' taqe aak'uhb'aal xkojwik nuna'ojb'al, ruum aj re', q'e' inwixow wach chu'nchel i yiib' wach chi b'anarik.

¹⁰⁵Eh jinaj saqum chi weh aq'oral ruum re' i re' ink'uhtanik weh chib'ih i naa nub'anam.

¹⁰⁶Re' hin xnuq'or i korik chi naa nub'anam i ruq'or taqe aak'uhb'aal. Eh koruman chi naa nub'anam.

¹⁰⁷QaJaaw Dios, re' hin q'e' ti' i nuk'ux. Chakuy chayeew tii nuk'achariik je' rukab' aaq'orom weh.

¹⁰⁸QaJaaw Dios, chak'ul tii weh i numayiij i nuq'or aweh ruuk' nuchii'. Eh cha k'uhtaaj weh chi korik taqe aak'uhb'aal.

¹⁰⁹Korik re' hin xa eliik wilkiin paruyohb'alil i kimik, xa re' la' re' hin, ma' sahchik ta panuk'ux aak'uhb'aal.

¹¹⁰Re' i yiib' wach kina'ojb'al xa nkisik' chik chi riij nukanteesjiik. Eh re' hin ma' nukanaa' ta taqe aak'uhb'aal.

¹¹¹Re' aak'uhb'aal xnuk'ul chi je' jinaj nukooch reh juneliik, ruum re' i re' inye'wik rusuqkiil i wánima.

¹¹²Re' hin chu'nchel i wánima naa nub'anam i ruq'or taqe aak'uhb'aal, korehtaal i weliik ayu' wach ak'al.

¹¹³Eh ma' imponik ta chi nuwach taqe i xak'ul inki a'n kiwach. Eh re' aak'uhb'aal q'e' nuk'ax.

¹¹⁴Re' hat titoob'inik weh, re' hat ti ko'linik weh, eh ruuk' aq'oral nuch'ikaam i nuk'ux.

¹¹⁵Re' taq i hat yiib' taq wach ana'ojb'al cha kanaa' taq nujot'ariik ruum re' hin inwaaj nub'anam i ruq'or taqe i ruk'uhb'aal i nuDios.

¹¹⁶QaJaaw Dios chayeew nukowiil je' rukab' aaq'orom weh, reh chi konee kik'acharik. Eh ma' ta naq neenooj chi re' chi ma' re' i ch'iklik wii' nuk'ux.

¹¹⁷Kinatoob'eej reh chi nee nuko'leej wiib', chi je' re' neenub'an i ruq'or taqe aak'uhb'aal.

¹¹⁸Re' hat ma' imponik ta chawach inkikanaa' taqe aak'uhb'aal. Ruum re' keh ma' xta kamaj i kikapeb'aal.

¹¹⁹Re' hat inasach kiwach i yiib' wach kina'ojb'al ruum xa je' taqe sohk' chawach, ruum aj re', re' hin q'e' nuk'ax taqe aak'uhb'aal.

¹²⁰Re' hin xa kinb'arb'otik chik ruum nuyo'jiik chawach, ruum ma' k'isiin ta kinyo'jik ruum i q'ataj q'orik i na a'n.

¹²¹Eh juneliik re' i korik, re' i rub'ehel i nub'an, maa kinakanaa' pan kiq'ab' taqe i ki-ixowanik nuwach.

¹²²Kinatoob'eej tii, reh chi ma' xta neenuk'ul i hin, hin awaj kamanoom. Eh maayeew q'ab' chi neenkian ti' k'axik weh i nimaq kiwach.

¹²³Re' hin xakinokik chik iil chi naa kiin ako'leem. Eh chi naa kiin awesam chupaam i ti' k'axik, je' rukab' aq'orom weh.

¹²⁴Chaketelaaj nuwach i hin, hin awaj kamanoom, cha k'uhtaaj weh chi korik taqe aak'uhb'aal.

¹²⁵Re' hin, hin awaj kamanoom chayeew nuna'ojb'aal, ruum re' hin inwaaj nureqem chi riij i ruq'or taqe aak'uhb'aal.

¹²⁶QaJaaw Dios, ruq'ijil chik chi naa ak'uhtaam aajosq'iil, ruum ma' nkinimaj ta chik aak'uhb'aal.

¹²⁷Ruum aj re', re' hin q'e' nuk'ax taqe aak'uhb'aal, ruum xiik' naah loq'il chuwach i manlik oro.

¹²⁸Re' hin xnukoj rehtaal taqe aak'uhb'aal chi xa re' wo' re' i korik chikiwach taqe i xa chib'ih jariik. Ruum aj re', xnuq'eb' chi riij nuk'ux chu'nchel i ma' korik ta laj na'ojb'al.

¹²⁹Re' taqe aak'uhb'aal chi wee hin xiik' naah holwochiil, ruum aj re', i nuyeew nuk'ux chunimjiik.

¹³⁰Eh ruuk' i ruch'ob'ariik rub'ehel aq'oral i na a'n inasihq'eej kina'ojb'al, eh inatijej taqe i ma' xta kina'ojb'al.

¹³¹Re' hin xank'ahb'ik chik i nuchii', ruum xa nwotow chik rureqariik chi riij taqe aak'uhb'aal.

¹³²QaJaaw Dios, kinatoob'eej tii, chaketelaaj nuwach, je' rukab' noq inaketelaaj kiwach i kik'axwik aweh.

¹³³Chak'am nub'eeh ruuk' aq'oral, maayeew q'ab' chi nee ruq'at nuwach i yiib' wach na'ojb'al.

¹³⁴Kinako'leej chupaam i ti' k'axik inki a'n weh i aj ixowaal, ruum re' hin inwaaj nub'anam i ruq'or taqe aak'uhb'aal.

¹³⁵Jaaw suq tii wilariik cha a'n i hin, hin awaj kamanoom. Eh cha k'uhtaaj weh chi korik taqe aak'uhb'aal.

¹³⁶Re' hin ma' k'isiin oq'ik i nub'an, ruum ma' imponik ta panaq'kiwach aak'uhb'aal.

¹³⁷QaJaaw Dios, re' hat korik wach ak'ux, je' wo' hoq aak'uhb'aal korik wo' hoq.

¹³⁸Eh chu'nchel i ruq'or taqe aak'uhb'aal manlik wach, eh korik.

¹³⁹Re' hin inchalik nuk'aah chikinaah taqe i ki-ixowanik nuwach, ruum xsahchik pankik'ux taqe aak'uhb'aal.

¹⁴⁰Re' hin, i hin awaj kamanoom weht'al chi re' aq'oral saq wach ruum aj re' q'e' nuk'ax.

¹⁴¹Re' hin ma' re' ta nkiwii' chi xama' xta wajaawriik, eh chi ixowaal nuwach, ma' jaruuj insahchik panuk'ux taqe aak'uhb'aal.

¹⁴²Re' rukorkiil wach ak'ux wilik chi juneliik, re' aak'uhb'aal xti korik.

¹⁴³Re' hin ma' k'isiin taj i ti' inuk'ul, xa nyot'ik chik i wánima i rub'an, xa re' chik taqe aak'uhb'aal inye'wik rusuqkiil nuk'ux.

¹⁴⁴Re' taqe aak'uhb'aal juneliik korik i ruq'or, chayeew la' nuna'ojb'al, reh chi nee nuk'achareej i ruq'or.

¹⁴⁵QaJaaw Dios, chu'nchel nuk'ux i nupahqaaj awotob'il. Kinab'iraj tii, reh chi neenub'an i ruq'or taqe ak'uhb'aal.

¹⁴⁶Re' hat tinuq'o'reej kinatoob'eej tii reh chi neenub'an i ruq'or taqe aak'uhb'aal.

¹⁴⁷Re' hin xakomajaa' wo' insaq'ik noq i nupahqaaj awotob'il. Ruum ch'iklik nuk'ux ruuk' aq'orom weh.

¹⁴⁸Eh noq inwik'raaj wiib' panuwiriik chaq'ab' intohq'ik nutijem riij i ruq'or taqe aak'uhb'aal.

¹⁴⁹QaJaaw Dios, chab'iraj i nuq'oral chaketelaaj tii nuwach. Chayeew nuk'achariik ruuk' i rukorkiil wach ak'ux.

¹⁵⁰Re' taqe i ki-ixowanik nuwach xa re' i yiib' wach inki a'n Eh ma' nkaaj ta runimjiik aak'uhb'aal.

¹⁵¹QaJaaw Dios re' hat ma' najt ta wilkaat quuk'. Eh chu'nchel taqe aak'uhb'aal korik.

¹⁵²Re' hin xa najtir wo' intohq'ik cho nureqem chi riij i ruq'or taqe aak'uhb'aal. Eh weht'al chi re' hat xatyej-anik reh, eh reh juneliik.

¹⁵³Jaaw chawil i ti' k'axik k'ahchi' wik'iik wii' kinawesaj chupaam. Ruum re' hin, ma' sahchik ta panuk'ux taqe aak'uhb'aal.

¹⁵⁴Kinako'leej, kinawesaj chupaam i wilkiin wii'. Chayeew nuk'achariik, je' rukab' aaq'orom weh.

¹⁵⁵Eh re' taqe yiib' wach kina'ojb'al xama' jaruuj ta wo' naa ako'leem taqe, ruum ma' inkinimaj taj i ruq'or taqe aak'uhb'aal.

¹⁵⁶QaJaaw Dios re' hat q'e' hat aj keteloom wachiis, Neeta tii nayeew nuk'achariik ruuk' i rukorkiil wach ak'ux.

¹⁵⁷Re' hin ma' k'isiin i kib'anik ti' k'axik weh re' taqe i ki-ixowanik nuwach. Eh xama' nukanaam ta wo' rub'aan i ruq'or taqe aak'uhb'aal.

¹⁵⁸Re' hin xinq'uhtik chi kilariik i yiib' wach kina'ojb'al, ruum ma' inkinimaj ta taqe aak'uhb'aal.

¹⁵⁹QaJaaw Dios, re' hat aweht'al chi q'e' i nuk'ax aak'uhb'aal. Eh nee ta tii nayeew nuk'achariik, ruum q'e' hat aj keteloom wachiis.

¹⁶⁰Chu'nchel aq'oral tz'ihb'amaj pan santo laj huuj xti manlik wach, xti korik, naa ruwihiik chi juneliik.

¹⁶¹Re' taqe i wilik kina'ojb'al k'ahchi' kianam ti' k'axik weh chi xama' xta numahk. Eh re' hin inuyohleej wach aq'oral.

¹⁶²Re' hin nsuuqb'ik nuk'ux ruuk' aq'oral, je' rukab' noq insuuqb'ik ruk'ux jino'q i ruk'ul k'ih hoq rukooch.

¹⁶³Re' hin q'e' nuk'ax aak'uhb'aal, ma' imponik ta chi nuwach taqe i chukuj q'orik.

¹⁶⁴Re' hin wuquub' pech tinuloq'ej chuwach i q'iij, ruum parub'ehel ti q'atwik q'orik.

¹⁶⁵Eh re' taqe i kik'axwik reh aak'uhb'aal, xa eliik suq kik'ux, eh ma' awach ta neenq'eb'wik keh pamahk.

¹⁶⁶QaJaaw Dios, re' hin k'ahchi' wuy-eem chi nee kinako'leej ruum re' hin k'ahchi' kiin i ruq'or taqe aak'uhb'aal.

¹⁶⁷Re' hin i nunimaj i ruq'or taqe aak'uhb'aal, eh q'e' nuk'ax chu'nchel wánima.

¹⁶⁸Korik chi nunimaj taqe aak'uhb'aal, eh i nuyeew nuk'ux chub'aan i taqe inaq'or. Eh re' hat aweht'al chu'nchel i nuna'ojb'al.

¹⁶⁹QaJaaw Dios nee ta tii nayeew weh i nupahqaaj aweh. Chayeew nuna'ojb'al, je' rukab' inaq'or weh ruuk' aq'oral.

¹⁷⁰Eh nee ta tii nab'iraj i nutiij. Eh kinako'leej je' rukab' aaq'orom weh.

¹⁷¹Re' hin juneliik naa kaat nuloq'em ruuk' nuchii', ruum xak'uhtaaj weh i rukorkiil taqe aak'uhb'aal.

¹⁷²Eh naa nutz'uyem awach ye'b'al ruloq'il aak'uhb'aal ruum re' re' manlik wach, eh xti korik.

¹⁷³Neeta naq kinatoob'eej ruuk' awajaawriik, ruum re' taqe aak'uhb'aal xnusik' wach chi naa nub'anam taqe i ruq'or.

¹⁷⁴QaJaaw Dios, inwaaj i hin chi nee kinako'leej. Ruum re' aak'uhb'aal inye'wik rusuqkiil nuk'ux.

¹⁷⁵Eh chayeew nuk'achariik, reh chi nee tinuloq'ej. Re' ta naq i rukorkiil wach ak'ux neentoob'inik weh.

¹⁷⁶Re' hin ximahkunik chawach, xa je' naq hinsah cheel laj tentzun. Kinako'leej tii hin, hin awaj kamanoom, ruum ma' insahchik ta panuk'ux taqe aak'uhb'aal.