Read Poqomchi Sal 16 Bible Online

Sal 16 - Poqomchi bible

Sal 16

¹WaJaaw nuDios, kinacha'jeej tii, ruum xa awuuk' wo' hat inusik' ko'lb'al wiib'.

²Aweh hat nuq'orom chi je' wili: Xa re' wo' hat i waJaaw. Eh ma' awach ta chik jino'q i q'e' atoob' wuuk' chi je' rukab' i hat, kinki.

³Re' taqe korik wach kik'ux chunimjiik i Dios, i wilik kisantohiil ayu' wach ak'al, re' re' kiye'wik rusuqkiil nuk'ux.

⁴Eh q'e' ti' i naakik'ulum taqe ikiloq'inik reh taqe i xa tiyoox. Eh re' hin ma' jaruuj neenuyeew chi numayiij i rukik'eel chikop chikiwach taqe i kitiyoox, ni xata neenuyeew kiloq'il ruuk' nuchii'.

⁵WaJaaw nuDios, re' hat ti ye'wik weh chib'ih jariik inwaaj. Eh i nayeew weh chi manlik aawotob'il, panaq'ab' wilik i nuk'achariik.

⁶Q'e' holohik xinelik, ruum xiik' naah holwochiil i nuye'aab' xayeew, eh xiik' naah chihojal i nukooch xayeew weh.

⁷Eh re' hin naa nuloq'em i QaJaaw Dios, ruum re' reh ink'amwik nub'eeh. Eh xti rukoj nuna'ojb'al atoob' ta pantaq chaq'ab' wilkiin.

⁸Re' hin eliik k'ahchi' wilom wach i waJaaw ma' hin ta rukanaam, xa eliik k'ahchi' kiin rutob'eem, reh chi ma' xta neenyojwik nuk'ux.

⁹Ruum aj re', re' wánima, re' nuti'jolal, i nukapeb'aal xiik' naah suq kiil kik'ux. Ruum xa ruuk' chik i Dios naa nuye'em nuk'ux.

¹⁰Re' hat waJaaw ma' naa ta akanaam i nuti'jolal panjul, naa la' awuksam chaloq. Eh ma' naa ta wo' aye'em q'ab' chi naa ruq'ahiik panjul i ruti'jolal i Santolaj Awak'uun.

¹¹Re' hat naa ak'uhtaniik weh i rub'eeh i juneliik k'acharik. Eh wilik jinaj i runimaal rusuqkiil nuk'ux, ruum xa awuuk' wo' hat wilik i rusuqkiil k'uxliis reh juneliik.