Read Poqomchi Ecl 10 Bible Online

Ecl 10 - Poqomchi bible

Ecl 10

¹Re' taqe i kamnaq nimaq utz' neeruchuhb'isaj i jinaj lemeta chi nk'ohnik laj iq'oom Je' wo' re' i memil laj na'ojb'al imb'aan chi jumehq'iil nee ruyoj wach i holohik laj na'ojb'al looq' chi ib'irjik.

²Re' i holohik runa'ojb'al xa re' i holohik i rukapaaj rub'aan. Eh re' i ma' nimanik taj xa re' yiib' wach i rukapaaj rub'aan.

³Re' i ma' nimanik taj, i ruk'uhtaaj chi ma' xta runa'ojb'al ruuk' chu'nchel i rukapaaj, atoob' ta ruq'or chi re' taqe i tokoom ma' kinimanik taj.

⁴Eh re' hat wila' xkaqrik i reey awuuk' maa chaq'weej xa cha kuy. Ruum ruuk' q'unil neena yejaa' i nimlaj aak'axkiil ruuk'.

⁵Re' hin jinaj wo' chik i ma' holohik taj xwilow imb'aan chinaah i wach ak'al. Re' i reey imb'anik reh re' wili:

⁶Re' chik i ma' kinimanik taj ruyeew chupaam i nim wach kamanik. Eh re' i nimaq kiwach chupaam i ma' nimaq ta wach kamanik taqe ruyeew.

⁷Eh wilik wo' pech inwilow chi re' taqe i minooj pankowlaj kamanik riij kawáyu kib'ehik. Eh re' taqe i reey chi kooq kib'ehik, je' taqe xa moso.

⁸Awach ink'otwik reh i jul xa re' wo' reh inq'ehb'ik chupaam. Eh awach impaxinik reh i tz'aq ink'uxarik ruum i aaq'.

⁹Awach impaxinik reh ab'aj i ruq'oj riib' ruuk'. Awach impaxinik reh i sii' panyohb'aal wilik ruum nee-oq i ruyok' riib'.

¹⁰Eh wila' xik'ik i ruq'asiil ikej, eh wila' ma' xjuk'arik chik q'e' chik ansil iraaj noq inkojarik. Ma' xta reet chi noq neensik'arik na'ojb'al reh chib'ih i naa rub'aan.

¹¹Re' i reht'al ruq'unjik wach i aaq' xama' xta neerutiq reh wila' xti'arik ruum i aaq' noq komajaa' ruq'unej wach.

¹²Re' ruq'oral i holohik runa'ojb'al holohik ink'amarik cho chinaah ruum. Eh re' i ruq'oral i ma' nimanik taj ti k'axik inchalik chinaah ruum.

¹³Re' reh i rutoqaa' ruq'orariik i memil laj q'orik, eh noq inooj kuxoq xiik' chik naah yib'kiil wach taqe i ruq'or.

¹⁴Re' i ma' nimanik taj ma' k'isiin ta imponik chuwach i q'orik, xa re' la' xama' reht'al ta wo' hoq chib'ih i naa ruk'ulariik na' chub'an.

¹⁵Re' taqe i ma' kinimanik taj inkikansaj kiib' chi kamanik, eh ma' keht'al taj aha' ojik inki a'n.

¹⁶Eh q'e' ketel wach i tinamit ko k'isa k'un rukojom chi ru reey. Re' taqe i k'amal kib'eeh ki-ik'ik aq'ab' pantaq ninq'ijinik.

¹⁷Eh atoob' reh i tinamit i rukoj chi ru reey i wilik ruloq'il. Re' taqe i k'amal kib'eeh paru orahiil inki a'n kiwa' kihaa' reh chi neen k'ulik i kaansil, ma' re' ta xohk'rik inkikapaaj.

¹⁸Re' i sikiil laj winaq ma' rutz'ap taj i kojweel reh i rupaat ruum i re' inq'ahik taqe i ruche'el, eh inq'ehb'ik chinaah noq inooj kuxoq.

¹⁹Eh re' i ninq'ijinik i ruyeew rusuqkiil k'uxliis re' i ruuk'jiik i riis uuva i ruyeew rusuqkiil k'uxliis. Eh ruuk' tumiin kiloq'arik.

²⁰Re' hat maa b'aj i reey ni xata naq panawánima neenab'aj. Maa q'or wo' hoq i ma' holohik ta laj q'orik chi riij i b'ehoom ni xata re' noq wilkaat cha wutkeel. Ruum wilik taqe i je' kikab' i kok' tz'ikin nenooj kiq'or reh.