Read Poqomchi Ecl 12 Bible Online

Ecl 12 - Poqomchi bible

Ecl 12

¹Noq kowilkaat parusuqkiil ak'ijolal, k'oloq panak'ux aaDios xtz'uhkrisanik cha weh, noq komajaa' inchalik i ti' k'axik cha naah, noq komajaa' imponik i haab' noq neenaq'or chi je' wili: Ma' xta rusuqkiil i nuk'achariik, tiko'q.

²K'oloq panak'ux aaDios noq konawil i rusaqumaal i q'iij i rusaqumaal i poh, i rusaqumaal i ch'umiil, noq komajaa' ink'uloq i suutz' ink'amwik cho reh i jab'.

³Eh naa ruponiik i q'iij chi re' taqe aq'ab' inko'linik aweh xakib'arb'otik chik, eh naa rulokom riib' taqe i panawaa' i q'e' naq kow kiib'. Re' aweeh inkamanik chi k'ookb'al wach i wi'k xakiib' ixib' chik i naa rukahniik. Re' taqe naq'awach i naa rumooyriik paam.

⁴Re' taqe i axikin ma' naa ta chik rib'iram i choq'ik naa rub'anam i keeb'al, ma' naa ta chik ab'iram noq naakitz'uyiniik i kok' chikop pantaq wahq'eq. Eh ma' naa ta chik ab'iram i kitz'uuy taqe i aj tz'uuy.

⁵Eh naa chik ayo'jiik ruum i johtik yuuq', xa yo'jik chik ruuk' i b'ehik naa a'nam re' rismaal anaah naa rusaaqb'iik, re' i xama' ahl ta wo' naq ma' naa ta chik akuyum, xama' xta chik i naa awaajwaam. Ruum xailook' chik tiooj panjul chi jumpech, re' i naa rutib'iik kik'ux chawiij naa rib'irjiik i koqiim pantaq b'eeh.

⁶K'oloq panak'ux aaDios, noq komajaa' inak'ul aweh je' rukab' noq ink'up i karena plata, je' rukab' noq impaxik i xun re' ruuk' i oro, je' rukab' noq impaxik ikom chii' ha', eh noq kosuq ak'ux.

⁷Eh re' aati'jolal naa wo' chik rusutiniik chi pooq ak'al re' xkorjik cho wii'. Re' aawuxlaab'al naa wo' chik rusutiniik ruuk' i Dios re' xye'wik cho reh.

⁸Re' hin i kinq'orik i k'uhb'aal, i nuq'or chi chu'nchel imb'aan, inq'orarik wach ak'al, xama' xta ruk'am chaloq.

⁹Noq re' hin xnureq nuna'ojb'al chi korik q'e' chik xnukoj kina'ojb'al i tinamit xinkib'iraj, eh xnusik' chi riij i na'ojb'al. Eh ma' k'isiin taqe i jalwaach q'orik xnuyejaa' wach.

¹⁰Eh xnusik' chi riij i q'orik i ruk'ul chi q'orarik. Xnusik' chi riij nik' wach rutz'ihb'jiik naa nub'anam i ju'jun chi q'orik, chi re' ruq'orariik naa nub'anam.

¹¹Re' kiq'oral i holohik kina'ojb'al je' rukab' noq neench'aplojik i q'as ju' ch'ihch', oon je' rukab' noq inch'aplojik i kalawux i na'ojb'al inkiyeew i kiib' chi aj tijoom, i ruq'or i k'amal b'eeh.

¹²Hat wak'uun noq wilkaat chab'iraj i naa nuq'orom aweh re' rutz'ihb'jiik i ma' k'isa huuj ruch'ihil i ma' k'isa tijinik ma' xta ruk'am chaloq xa ruq'uhtiik i ti'jolal i ruyeew.

¹³Yu'naak kuxik chik rib'irjiik i ruq'or i huuj wili. Re' naa a'nam i hat, re' chi naa ayohleem wach i Dios chi naa animam taqe i ruk'uhb'aal ruum re' re' ruk'ul chi na a'nam.

¹⁴Ruum re' i Dios naa ruq'atam i q'orik chi qanaah ruuk' i chib'ih ixqa a'n, i xqaq'or atoob' ta holohik, atoob' ta ma' holohik, eh atoob' ta xa chi ma' eht'alimaj xqa a'n.