Read Poqomchi Ecl 2 Bible Online

Ecl 2 - Poqomchi bible

Ecl 2

¹Re' hin je' wili xnuq'or panuk'ux: Naa nunik'eem rusik'ariik i suq laj k'achariik, kinki. Eh re' taqe i re' xwilow chi xama' xta ruk'am chaloq.

²Re' se'eel i ruyeew i wach ak'al xasah cheel laj na'ojb'al, eh xama' xta ruk'am chaloq.

³Eh re' hin sik'ij naq nuna'ojb'al i nub'an xnukapaaj naq chi naa nureqem rusuqkiil nuk'ux ruuk' i xohk'rik, xnuyeew reh i k'ahlaj ha' i nuti'jolal, i ib'al reh mi re' re' i ruk'ul chi neerub'an i winaq nik' najtiil i ruk'achariik ayu' wach ak'al.

⁴Yohb'aal wach i nimaq kamanik xnub'an ma' k'isiin taqe i nupaat xnuyejaa', eh runimaal i nu uuva xnutik.

⁵Eh nuyejaa' wo' nuye'aab' xnutik taqe i chee' ar re' ruuk' i suq inkiwachuj, eh xnutik taqe i uhtz'ub' ar.

⁶Xnuyejaa' wo' taqe i nimaq tz'aq ye'aab' ha' tz'aqtesb'al reh taqe i chee' kiwachinik.

⁷Eh re' hin xnuloq' taqe i numoso winaq, eh ixoq, xi wihik taqe i numoso pan nupaat xi-aasjik. Eh k'ih i nuwakax, i nutentzuun xi wihik, chikiwach i xwihik cho chi reyil Jerusaleem peet taqe chi nuwach i hin.

⁸Eh ma' k'isiin taqe i oro, i plata xnumol wach, je' wo' taqe i xa chib'ih jariik k'ih taq tz'aaq xkik'am cho weh i reey tokoom tinamit kichalik ma' k'isiin wo' taqe waj tz'uuy xiye'wik rusuqkiil nuk'ux chi winaq chi ixoq. Ma' k'isiin taqe i wixoqil xi wihik.

⁹Xti xiik' wo' naq naah runimaal nuwach, eh xa re' wo' naq i hin ma' k'isiin i chib'ih weh xwihik chikiwach taqe i xi wihik cho chi reyil Jerusaleem peet chi nuwach i hin. Eh ma' k'isiin wo' i nuna'ojb'al wilik.

¹⁰Eh aha' wilik ixnuk'ax wach xnub'an wo' hoq, aha' wilik ixwaaj xnuyeew wo' reh i nuti'jolal. Re' taqe i re' xuyeew weh i kowlaj kamanik xnub'an.

¹¹Eh re' hin xnukapaaj riij taqe i nub'an, je' wo' chu'nchel i kowlaj kamanik xnub'an. Ar xnukoj rehtaal chi xama' xta ruk'am chaloq, xama' xtaj ixnuk'ax ruuk' chinaah i wach ak'al wili, xaruti'kiil k'uxliis i ruyeew.

¹²Eh chi riij i re' xtohq'ik nukapaam chi riij i holohik laj na'ojb'al, je' wo' i memil laj na'ojb'al. Eh ¿chib'ih jariik i naa rub'anam i naa rokiik chi reyil noq ma' wilkiin ta chik i hin? ma' xta chik jino'q tokoom naa rub'anam xa re' wo' hoq i xnub'an i hin.

¹³Re' hin xwilow chi re' i holohik laj na'ojb'al q'e' holohik chuwach i na'ojb'al xanik' wach, je' rukab' i saqum q'e' holohik chuwach i q'equm.

¹⁴Re' wilik runa'ojb'al saqum paam i rukapeb'aal, re' i ma' nimanik taj q'equm paam i rukapeb'aal xa re' la' jinaj wach inaruk'ulum i wilik runa'ojb'al ruuk' i ma' xta runa'ojb'al.

¹⁵Re' hin je' wili i xnuq'or panuk'ux: Re' hin wilik nuna'ojb'al wila' naa nuk'ulum weh je' rukab' inaruk'ulum i ma' xta runa'ojb'al, xama' xta inki chi ma' k'isiin i nuna'ojb'al. Eh xnuq'or chi chu'nchel inqa a'n xama' xta ruk'am chaloq.

¹⁶Ruum ma' naa ta chik ruk'uliik pank'uxliis chi jumpech i wilik runa'ojb'al, i ma' xta runa'ojb'al. Ruum naa rukimiik i wilik runa'ojb'al, je' wo' hoq i ma' xta runa'ojb'al, kinki.

¹⁷Re' hin xponik i q'iij noq xwixow wach i nuk'achariik, ruum chu'nchel imb'aan ayu' wach ak'al, xati' k'axik i ruyeew chi qanaah xama' xta ruk'am chaloq, xaruti'kiil k'uxliis i ruyeew.

¹⁸Eh wixow wo' wach chu'nchel i kamanik xnub'an, chinaah i wach ak'al wili. Ruum weht'al chi chu'nchel i chib'ih weh naa nukanaam kahnoq reh i tokoom.

¹⁹Eh re' hin ma' weht'al taj mi wilik runa'ojb'al oon ma' xta runa'ojb'al i naa rehchaniik reh i xnumol wach ruuk' i kowlaj kamanik xnub'an wach ak'al. Eh re' i nunim wach na'ojb'al xama' xta ruk'am chaloq.

²⁰Noq xwilow chu'nchel i chib'ih weh xnureq ruuk' kowlaj kamanik xnub'an xaruti'kiil nuk'ux i ruyeew.

²¹Eh re' winaq wilik runa'ojb'al ruuk' rukorkiil wach ruk'ux i rub'an i kowlaj kamanik noq i rureq tz'aaq i chib'ih reh. Eh ma' reht'al taj chi re' chib'ih reh, reh i ma' rukamaneem ta wach naa rukanaam. Ar ink'utinik chi re' kamanik i rub'an xama' xta ruk'am chaloq.

²²Ruuk' i wili ink'utinik chi xama' xta rutiq reh i winaq chi nee rukansaj riib' chi kamanik ayu' wach ak'al.

²³Eh chu'nchel i ruk'achariik xati' k'axik wilik, xaruq'uhtisaj riib' chi kamanik ni xata re' chaq'ab' inhi'lik i rukapeb'aal, eh chu'nchel i re' xama' xta ruk'am chaloq.

²⁴Re' ruk'ul chi naa rub'anam i winaq, re' chi chub'an ruwa' ruhaa', chub'an rusuqkiil i chib'ih reh i rureq ruuk' i rukamaj. Re' hin xnukoj rehtaal chi chu'nchel i chib'ih qeh re' i Dios inye'wik cho reh.

²⁵Ruum ma' awach taj i neerub'an rusuqkiil chib'ih reh wila' ma' xuyeew i Dios.

²⁶Awach imponik chuwach i Dios i rub'an, inye'arik runa'ojb'al, rukapeb'aal, rusuqkiil ruk'ux. Eh re' imb'anik reh i mahk inye'arik pankowlaj kamanik ruum i Dios reh chi rumol wach i chib'ih reh, reh i tokoom i ruyeew. Re' taqe i re' xama' xta i ruk'am chaloq, xaruti'kiil k'uxliis i ruyeew.