Read Poqomchi Ecl 7 Bible Online

Ecl 7 - Poqomchi bible

Ecl 7

¹Noq holohik rib'iral jino'q xiik' naah chihojal chuwach ink'ohnik laj iq'oom Eh q'e' wo' chihooj i kimik, chuwach i aasjik.

²Eh q'e' wo' chihooj ojik chupaam i paat wilik wii' i kamnaq, chuwach ojik chupaam i paat k'ahchi' wii' i ninq'ijinik. Ruum re' i kimik k'ahchi' ruye'em i k'achareel, awach i kok'achlik inchol rukapaam riij.

³Eh q'e' wo' chihoojoq'ik chuwach i se'eel ruum ruuk' i ruti'kiil k'uxliis i ruyeew ruman i rukowiil qak'ux.

⁴Re' wilik runa'ojb'al ar wilik reje i rukapeew chupaam i paat wilik wii' kamnaq. Eh re' i ma' xta runa'ojb'al ar wilik reje i rukapeew chupaam i paat wilik wii' i ninq'ijinik.

⁵Q'e' chihooj chi neenib'irjik i q'ilooj i rub'an i wilik runa'ojb'al, chuwach chi neenqayeew ruloq'il inki a'n i ma' xta kina'ojb'al.

⁶Re' rusuqkiil ruk'ux i ma' nimanik taj xa junik'iik, xa je' rukab' noq ink'ahtik i chiq k'ix chi ri'sil jino'q i xun. Re' taqe re' xama' xta ruk'am chaloq.

⁷Re' wilik runa'ojb'al, re' rub'anariik i ti' k'axik, re' ruk'ulariik i tumiin chi riij i ma' korik taj inyojwik reh i runa'ojb'al.

⁸Q'e' chihooj i rukuxeesjiik jino'q i chib'ih jariik chuwach i rutik'ib'jiik. Eh q'e' chihooj chi xa hat kuyuul chuwach chi q'e' hat kow neena a'n awiib'.

⁹Maa nchalik ak'aah chi jumehq'iil ruum xa re' wo' taqe i ma' xta kina'ojb'al inchalik kik'aah chi jumehq'iil.

¹⁰Re' hat ma' naa ta q'orom chi je' wili: ¿Chib'ih reet noq re' taqe i q'iij ik'inaq chaloq q'e' chihooj chuwach taqe i q'iij yu'naak? mat ko'q. Ruum xa re' taqe i ma' xta kina'ojb'al kiq'orik reh i je' re'.

¹¹Re' i holohik laj na'ojb'al q'e' chihooj chi keh i k'achareel ayu' wach ak'al, jinaj kooch chi keh.

¹²Re' holohik laj na'ojb'al inkamanik chi toob'al reh i ju'jun, je' wo' hoq i tumiin. Xa re' la' re' wilik runa'ojb'al i ruko'leej riij i ruk'achariik.

¹³Chakoj rehtaal i ruyejaam chaloq i Dios, ¿Mi wilik jino'q i neen ye'wik chi korik i yok yok noq xukanaa'?

¹⁴Nik' ma' xta reet wilkaat cha a'n rusuqkiil. Eh nik' ti' wilkaat xa chak'ulaa', cha kapaaj riij chi re' suq laj wihik, i ti' laj wihik re' wo' i Dios inye'wik reh. Re' ju'jun ma' reht'al taj i naa ruchaliik chinaah.

¹⁵Re' i kiib' chi na'ojb'al wili wilom panuk'achariik xama' xta ruk'am chaloq: Re' chi re' taqe i korik wach kik'ux kikimik reje chi jumehq'iil, eh chi re' taqe i ma' holohik ta kina'ojb'al inajtb'ik rooq i kik'achariik.

¹⁶Korik-oq wach ak'ux, xa re' la' ma' wik'saj naah. Eh wilik-oq ana'ojb'al, xa re' la' maawik'saj naah, ¿Chib'ih neerutiq aweh chi xa nee nakansaj awiib'?

¹⁷Mo'-oq i nik'ik naah i yiib' wach na'ojb'al i na a'n. Eh maa wik'saj naah amemil. ¿Chib'ih neerutiq aweh chi nee tikimik noq komajaa' i rureq i ruq'ijil?

¹⁸ma' xta reet chi neena a'n i wili, eh ma' nee ta wo' inakanaa' rub'an i jinaj. Awach i ruyohleej i Dios naa reliik korik chuwach i naa rub'anam.

¹⁹Re' holohik laj na'ojb'al i ruyeew rukowiil ruk'ux i wilik runa'ojb'al, ma' xata je' rukab' i neen kiyeew i lajeeb' chi ajaab'ees wilkeeb' chupaam i jino'q i tinamit.

²⁰Xti korik wo' hoq chi ma' xta jino'q i winaq xti korik wach ruk'ux, eh chi ma' ta nee rutz'a'j ruuk' i mahk chi jumpech.

²¹Maa nimaj chu'nchel i neenkiq'or aweh i tinamit, reh chi ma' nee ta nab'iraj amoso wixuq'or i ma' holohik taj chawiij.

²²Ruum re' hat xti aweht'al wo' hoq chi k'ihpech xaq'or i ma' holohik taj chi riij i tokoom.

²³Chu'nchel i wili xtohq'ik nusik'im chi riij ruuk' na'ojb'al, xa re' la' chik imb'anik reh xama' xta wo' nuna'ojb'al.

²⁴Re' taqe wili xiik' nah k'ayewal chi reqarik chi riij, ma' awach ta neenreqwik chi riij.

²⁵Re' hin xnusik' chi riij chi naa nureqem i nuna'ojb'al reh chi naa nureqem chi riij i wili. Eh xwilow chi ma' holohik taj chi q'e' neenamin awiib' chub'aan inawaaj rub'aan, je' wo' rub'aan memil laj na'ojb'al.

²⁶Eh re' hin jinaj i q'e' ti' xnureq ma' xata je' ti'kiil noq ink'ularik kimik. Re' ixoq ma' holohik ta runa'ojb'al noq i ruq'unej i winaq korehtaal i nq'ehb'ik pan q'ab' i rukoj xirob' parub'eeh xa re' i ruloq'ej i Dios neeruko'leej riib' pan q'ab', eh re' i aj mahk neenq'ehb'ik pan q'ab'.

²⁷Noq xnusik' chi riij nik' wach noq wilkeeb' i chib'ih jariik. Re' hin i weht'al q'orik chi korik, xnureq chi riij taqe i na'ojb'al wili:

²⁸Re' chi xakomajaa' wo' nureq i k'ahchi' nusik'im, chi kixilak i jinaj miil chi winaq jinaj ti holohik runa'ojb'al xnureq. Eh chi kixilak taqe i jinaj miil chi ixoq ma' jino'q i holohik runa'ojb'al xnureq.

²⁹Re' hin re' wili i xwilow: Re' chi re' Dios xuyejaa' taqe winaq chi naa kianam i korik, xa re' la' re' chik i keh xkisik' i ma' holohik ta laj b'eeh.