Read Poqomchi Can 3 Bible Online

Can 3 - Poqomchi bible

Can 3

¹Noq wirik i nub'an panuyokaab' xnusik' i winaq, q'e' i nuk'ax pan wánima xnusik', xa re' la' xama' xnureq ta wo' hoq.

²Eh je' wili i xnuq'or: Re' hin naa rojiik nusik'im chi junsuut i tinamit pantaq b'eeh i winaq q'e' i nuk'ax pan wánima, kinki. Eh xinooj wo' chusik'ariik, xa re' la' xama' xnureq ta wo' hoq.

³Eh xinkireq i kicha'jinik reh i tinamit, je' wili i xnuq'or keh: ¿Mi xawilow taq wach weh i q'e' i nuk'ax pan wánima? kinki keh.

⁴Xa kore' wo' junk'aam wik'sam taqe i re' noq xponik nureq i q'e' i nuk'ax pan wánima. Eh nuchop reje chi q'ab' ma' kota chik woq'taaj korehtaal xnuk'am i koq parupaat i nutuut re' i xin-aasjik wii'.

⁵Hat taq ixoq aj Jerusaleem pankib'ihnaal ixoq keej, i kok' ixoq keej wilkeeb' pantaq ch'ahn, inuq'or taq aweh chi ma' jot' taq i koq paruwiriik ixoq q'e' i nuk'ax, konik' pa' neenwuktik paruk'ux i reh.

⁶¿Awach injohtik i chaloq chupaam i ye'aab' chiq yuuq' chalik i rub'an wuuk' xa je' chik rukab' i sib' xan je' chik k'ohonkiil i mirra, i insensia, i pooq iq'oom?

⁷Re' reey Salomón xk'ulik iloq tzunlik chupaam i ruxoyimaj paam kareta oxk'ahl chi winaq kow kiib' chi kixilak i aj Israel incha'jinik reh.

⁸Chu'nchel i re' kitijem kiib' chi q'aq'inik, wilik kiq'aslaj ch'ihch' nah kituuq, ko'lb'al reh i reey ruum yohb'aal i b'ehik chaq'ab'.

⁹Re' i reey Salomón xuyejaa' jinaj i ruxoyimaj paam kareta re' ruuk' i chee' inchalik Líbano ruyej-aal.

¹⁰Re' taqe i rutz'u'kaal re' ruuk' i plata, re' ye'aab' reh i riij re' ruuk' i oro, re' i tzunaab' i kaq itz'ihy i b'urb'al wach, re' i paam ruuk' k'axooj xkixoyej taqe i holohaq ixoq aj Jerusaleem.

¹¹Eleen taq chaloq i hat ixoq aj Sión chawil taq xk'uloq i reey Salomón, wilik ru corona kojooj cho reh ruum i rutuut noq xub'an kaxáro chupaam i q'iij noq xwihik rusuqkiil i ránima.