Read Poqomchi Can 4 Bible Online

Can 4 - Poqomchi bible

Can 4

¹Re' hat ixoq q'e' tinukax chi weh xiik' naah aholwochiil, xti hat holohik. Re' taqe i naq'awach, je' rukab' inaq'wach paloma chupaam i b'urb'al awach, eh xa q'eq b'utz'ik chik i rismaal anaah, xa je' chik rukab' i kiij i kaprax kiqajik cho wach yuuq' Galaad.

²Re' taqe aweeh xasaq chik, xa je' chik saq'iil i kiij i tentzun kore' xkian kitiin panha', kore' xyok'arik i rismaal kiij. Eh laach i kiha'lak'uun, inwihik, ma' jino'q keh i ma' nak'unanik taj.

³Eh xa kaq chik i xaq aachii' xa je' chik iq'omamaj ruuk' i kaq laj iq'oom yohb'aal wach holwochiil ti q'orik. Eh re' pantaq awach xa je' chik kaq'iil paam granado ink'utinik chupaam i b'urb'al awach.

⁴Re' i awalaq, je' holwochiil inajt naah paat xuyejaa' chee David, re' inkich'ilaa' wii' i jinaj miil chi pulato ch'ihch' re' inkiko'leej wii' kiib' i kow kiib'.

⁵Re' i kab'chel ach'uuch' je' kikab' i kok' ixoq keej laach noq ki-aasjik wilkeeb' chupaam i uhtz'ub'.

⁶Eh noq naa ruchaliik rusaq'iik noq naa rokiik chee saqum, re' hin nawojiik chinaah i yuuq' wilik wii' i mirra, i wilik wii' i Insensia.

⁷Re' hat ixoq q'e' ti nuk'ax chi weh, xti manlik wach aawooq aq'ab'.

⁸Kim wuuk' i hat wehk'een, taq chupaam i ye'aab' Líbano taq chinaah i yuuq' Amana rub'ihnaal, je' wo' chinaah i yuuq' Senir wilik ar Hermón, re' inkikeb'aa' wii' kiib' i kaq b'ahlam, re' wo' inkikeb'aa' wii' kiib' taqe i nimaq winaq b'ahlam.

⁹Re' hin xti ch'ilojik chawiij i wánima wehk'een je' hat wanaab' noq wilkaat, xa ruuk' i jun iil xa a'n weh xanoq wo' xinok'rik chawiij ruum ma' k'isiin holwochiil aakarena wilik chawalaq.

¹⁰Hat weh k'een, hat wanaab' noq wilkaat, ma' k'isiin ta holwochiil noq kinaq'acheej, ma' xata je' suq kiil i riis uuva. Xiik' naah k'ohonkiil awach ma' xata je' k'ohonkiil chu'nchel ink'ohnik laj iq'oom

¹¹Re' aq'oral i nelik cho xaq aachii' wehk'een xa je' chik ki'iil i riis kaab', xa je' chik suq kiil lecha. Re' aso' xiik' nah k'ohonkiil wach xa je' chik k'ohonkiil iq'oom inchalik Líbano.

¹²Re' hat wehk'een, je' hat wanaab' noq wilkaat, je' akab' i uhtz'ub' kojooj pan koraal, je' akab' i k'achlik ha' kotimaj riij chi tz'aq.

¹³Re' hat je' akab' i ye'aab' wilik wii' i granado q'e' suq i ruwachuj, je' akab' i ye'aab' wilkeeb' wii' uhtz'ub' Alhen-a rub'ihnaal.

¹⁴Je' akab' i ye'aab' i nelik wii' ink'ohnik laj Nardo, i Azafrán, nimaq rooq wach chee' canela. Eh i nelik wii' i insensia, i mirra, i áloes, eh chu'nchel ink'ohnik laj iq'oom

¹⁵Re' hat je' akab' i ye'aab' wilik wii' uhtz'ub', je' wo' akab' i raasb'al k'achlik ha' inb'ehik chee rooq ar Líbano.

¹⁶Neeta naq inchalik i teew pantz'eet pansak'aaj reh i rookb'aal q'iij nee ta naq inik'ik hupinoq chinaah i je' ye'aab' wilik wii' i tik. Re' hat winaq, q'e' ti nuk'ax chi weh kim ruuk' i je' tik chak'ux aweh i suq laj wach.