Read Poqomchi Can 7 Bible Online

Can 7 - Poqomchi bible

Can 7

¹Hat wehk'een xiik' inche naah holwochiil ink'utinik aawooq pan axijaab'. Re' i nah atuuq xa holohik chik xa je' chik rukab' i ruyejaa' i aj ch'eyool ruuk' oro, rutijem riib' chi korik.

²Eh re' awatz'uum xa kotokik chik xa je' chik rukab' i kulk inwihik wii' i suq laj riis uuva. Re' apaam je' rukab' i juntuhb' chi Trigo koralimaj riij chi uhtz'ub'.

³Re' kab'chel ach'uuch' je' kikab' i kok' qahxoq keej laach noq ki-aasjik.

⁴Eh re' awalaq je' holwochiil inajt naah paat Marfil ruyej-aal. Re' taqe i naq'awach je' rukab' i ye'aab' ha' wilik Hesbón ar chi chii' ookb'al Bat-rabim. Eh re' aaju' je' holwochiil inajt naah paat ar Líbano, inilwik reje Damasco.

⁵Eh re' anaah yohb'aal wach holwochiil je' rukab' i yuuq' Carmelo, re' i rismaal aanaah xa kaq lumik chik je' rukab' i ruso' i reey.

⁶Hat ixoq q'e' ti nuk'ax hat weh, xti xiik' naah aholwochiil xti ch'iklik nuk'ux awuuk'.

⁷Eh xa tijikik chik xa je' chik akab' i kalaab', re' taqe i ach'uuch' je' rukab' noq i rukutaa' riib' i wach.

⁸Re' hin inwaaj johtik chinaah i kalaab' re' re' reh chi neenooj nusik' weh i wach. Re' taqe ach'uuch' je' rukab' noq inkikutaa' kiib' i wach i uuva, eh re' aawuxlaab' xa je' chik k'ohonkiil mansano.

⁹Re' aq'oral je' rukab' i chi hoj laj riis uuva xa ch'ub'ik chik noq inqajik noq inuuk'jik qohoq.

¹⁰Re' hin, hin reh i winaq q'e' nuk'ax, xawuuk' i hin i rureq rusuqkiil ruk'ux.

¹¹Kim wuuk' i hat q'e' ti nuk'ax chi weh, taq panab'iix ar neenqik'saj chee aq'ab' chupaam i uhtz'ub'.

¹²Eh wahq'eq naa rojiik qilom mi xk'er chik i ruhtz'ub'aal mi wilik chik wach i uuva, mi xk'er chik i wach i granado. Eh ar neenqak'ax qiib' neenuyeew rusuqkiil ak'ux.

¹³Re' mandrágoras xupuhkaaj chik riib' i ruk'ohonkiil, eh chi chii' taqe i qapuerta wilik ar chu'nchel i wach i chee' ink'uxarik. Wilik taqe i kore' xsik'arik, wilik i chiqinaq chik, numolom taqe aweh i hat winaq q'e' ti nuk'ax.