Read Poqomchi Jer 1 Bible Online

Jer 1 - Poqomchi bible

Jer 1

¹Re' taqe i xuq'or, re' taqe i xub'an i Jeremías, rak'uun i Hilsías, re' ruuk' taqe i k'amal kib'eeh aj tiij xi patinik Anatot wilik paruyuq'ul i Benjamín.

²Re' i QaJaaw Dios xuq'oreej chaloq i Jeremías noq oxlaj haab' chik rokiik chi reyil Josías ar Judá i rak'uun Amón.

³Eh re' i QaJaaw Dios xuq'oreej i Jeremías noq xwihik chi reyil Judá Joacim rak'uun i Josías, eh noq i xwihik chi reyil ar i Sedequías rak'uun i Josías, korehtaal chik xukohlaaj i junlaj haab' chi reyil ar. Eh paroo' poh ree haab' re' re' xi k'amarik reje pan tokoom tinamit i aj Jerusaleem.

⁴Re' i QaJaaw Dios je' wili i xuq'or weh:

⁵Noq komajaa' titz'uhk'rik cho ruuk' aatuut xa weht'al wo' naq chik awach. Eh noq komajaa' ti aasjik xanoq wo' xat nukuxisaj, eh xat nupab'aa' chi hat jalal nuq'oral chupaam chu'nchel i tinamit, inki.

⁶Eh re' hin je' wili xnuq'or: Jaaw xti ma' ruk'ul taj inaq'or weh chi je' re' ruum re' hin, ko hin k'isa k'un, eh ma' kinchol ta q'orik, kinki reh.

⁷Re' i QaJaaw Dios je' wili i xuq'or weh: Re' hat maa q'or chi ko hat k'isa k'un, naa la' awojiik aha' naa kaat nutaq'aam reje. Eh re' wo' naa aq'orom naa nuq'orom aweh.

⁸Re' hat ma' awach ta aj uum naa ayo'jiik, ruum re' hin naa nuwihiik awuuk' chako'ljiik, inki.

⁹Re' QaJaaw Dios xuyub' chaloq i q'ab' xutz'aj i xaq nuchii', je' wili i xuq'or weh: Re' wili rehtalil chi xnuyeew chik taqe i nuq'oral panachii'.

¹⁰Yu'naak xat nukoj chikinaah i tinamit, chikinaah i reey. Reh chi wilik i naa asacham wach, chi wilik i naa aachuqum, chi wilik naa ayojom, chi wilik i naa awesam, chi wilik i naa ayejaam, i naa atikim, inki weh.

¹¹Re' i QaJaaw Dios je' wili i xuq'or weh: ¿Chib'ih jariik i k'achi' awilom wach? inki. Re' hin je' wili i xnuq'or: Re' hin jinaj i q'ab' chee' almendro k'achi' wilom wach, kinki reh.

¹²Re' i QaJaaw Dios je' wili i xuq'or weh: Korik i xaq'or re' re' i rehtalil chi naa nub'anam chi jumehq'iil taqe i nuq'orom chaloq, inki.

¹³Re' i QaJaaw Dios je' wo' chik wili i xuq'or weh: Yu'naak ¿Chib'ih chik jariik i k'achi' awilom wach? inki. Jinaj i xun k'ahchi' wilom wach xan rooq rotik chik i ha' chupaam xaraaj chik reje b'uulinik pantz'eet reh i rookb'aal q'iij, kinki reh.

¹⁴Re' i QaJaaw Dios je' wili i xuq'or weh: Re' re' i rehtalil chi pantz'eet reh i rookb'aal q'iij naa ruchaliik i ti' k'axik naakik'ulum taqe i Judá.

¹⁵Re' hin i Dios naa nuk'amam chaloq i tinamit wilkeeb' cho pantz'eet reh i rookb'aal q'iij, je' wo' taqe i kireey. Eh ar naa kiyejaam i kipaat panookb'al reh i Jerusaleem, ar naakilok'em reje kiib' chuwach i tz'aq kotimaj wii' riij i tinamit. Eh ar naakilok'em reje i kipaat chuwach i tinamit Judá.

¹⁶Ruum i kiyiib' wach na'ojb'al i tinamit re' re' naa nuye'em i ti' k'axik chikinaah, ruum xin kiq'eb' chi riij kik'ux, xkik'at i insensia, eh kiloq'ej taqe i tiyoox, re' ki dios i tokoom tinamit xa re' keh kiyej-anik reh.

¹⁷Re' hat Jeremías chakowej awiib' hiy cha q'or keh i tinamit re' re' chu'nchel i xnuq'or aweh, mat yo'jik kuum. Eh wila' ma' xa a'n i xnuq'or aweh naa nuye'em q'ab' chi naa ab'arb'otiik ruum ayo'jiik chikiwach.

¹⁸Yu'naak i hin naa kaat nukanaam chi je' rukab' i tinamit kotimaj riij chi tz'aq, chi je' akab' i rooq paat ch'ihch' ruyej-aal, chi je' akab' i q'an ch'ihch' inkojarik chi koraal. Reh chi nee nakuy kik'ulb'ejiik chu'nchel i tinamit wilkeeb' Judá, taqe i kireey, taqe i k'amal kib'eeh aj tiij.

¹⁹Re' keh nanaq kianam aweh ruuk' q'aq'inik, xa re' la' xama' xta wo' naa kaat kuchem, ruum re' hin naa nuwihiik awuuk' chi ako'ljiik, inki i Dios.