Read Poqomchi Jer 13 Bible Online

Jer 13 - Poqomchi bible

Jer 13

¹Re' QaJaaw Dios je' wili xuq'or weh: Yu'naak Jeremías chaloq' jino'q i nim rooq itz'ihy b'ak'b'al pamis, re' ruuk' i lino chab'ak' reje panayejaal xa re' la' mat'aqsaj ruuk' ha', inki.

²Eh re' hin xnuloq' wo' hoq i nim rooq itz'ihy, je' rukab' i xuq'or weh QaJaaw, eh xnub'ak' wo' panuyejaal.

³Chi riij i re' xiruq'o'reej wo' chik chaloq i QaJaaw Dios je' wili i xuq'or weh:

⁴Yu'naak chak'am reje i nim rooq itz'ihy xaloq' chab'ak' panayejaal, hiy chi chii' i nim ha' Éufrates chakeb'aa' ar chupaam ruhopil ab'aj, inki.

⁵Eh re' hin xinooj wo' hoq chi chii' i nim ha' Éufrates, xnukeb'aa' wo' hoq nim rooq itz'ihy chupaam ab'aj je' rukab' i xuq'or weh i QaJaaw.

⁶Eh noq k'ih laj q'iij chik ruponiik nukeb'aam je' wo' chik wili i xuq'or weh i QaJaaw Dios: Yu'naak hiy wo' chik chi chii' i nim ha' Éufrates chak'am wo' chik chaloq i nim rooq itz'ihy re' i xnuq'or aweh chi xponik i keb'aa' ar, inki.

⁷Eh re' i hin, xinooj wo' chik chi chii' i nim ha' Éufrates xtohq'ik nusik'im panak'al i nim rooq itz'ihy, eh xnureq wo' hoq xwisaj chaloq aha' naq nukeb'aam wii' xa re' la' q'ahinaq chik xama' xta chik kamaj.

⁸Chi riij i re' je' wo' chik wili i xuq'or cho weh i QaJaaw Dios:

⁹Je' aj re' naa kikahniik i aj Judá ruch'ihil taqe i aj Jerusaleem noq naa wesam i runimaal kiwach.

¹⁰Re' i tinamit re' re' yiib' wach kina'ojb'al ma' xkian taj i xnuq'or keh. Eh ruum i rukowiil i kinaah xama' xkikanaa' ta wo' rub'aan i yiib' wach na'ojb'al wilik pankanima. Re' chik taqe i tiyoox xkinimaj, xkiloq'ej, re' keh naa kikahniik chi je' kikab' i nim rooq itz'ihy re' re' b'ak'b'al pamis xama' xta chik kamaj.

¹¹Nik' wach noq i rujit' i paam i winaq ruuk' i nim rooq itz'ihy, je' wo' naq re' noq xnuchop taqe i aj Judá i hin, i aj Israel, reh naq chi naa nakiwihiik wuuk'. Re' naq xwaaj i hin chi naa kikahniik chi manlik nutinamiit. Reh naq chi naa kiye'em chi naab'jik i nub'ihnaal, ye'b'al nuloq'il, chi naa kiye'em runimaal nuwach. Xa re' la' re' keh xama' xinkinimaj ta wo' hoq, inki Dios.

¹²Eh je' wo' chik wili i xuq'or weh: Re' hat Jeremías naa aq'orom keh tinamit chi je' wili: Re' QaJaaw i qaDios i hoj, hoj aj Israel xuq'or chi chu'nchel kikoom naakinujiik chi riis uuva, inki, tiko'q keh. Re' taqe i aj Israel je' wili i naa kiq'orom aweh: Re' hoj xa qeht'al wo' hoq chi naa runujiik i qikoom chi riis uuva, inkoq taqe.

¹³Eh re' hat je' wili i cha q'or keh: Re' QaJaaw je' wili xuq'or: Re' ikom naa runujiik chi riis uuva rujal wach i ti' k'axik je' naa nuxohk'risam taqe chu'nchel i patim chupaam i tinamit wili, chi je' taqe wilkeeb' chi reyil, je' rukab' noq xwihik chi reyil i David, chi je' taqe k'amal rub'eeh aj tiij, chi je' taqe jalal naq nuq'oral, eh chu'nchel i patim Jerusaleem.

¹⁴Re' hin jumehq'iil naa nusacham kiwach je' rukab' noq impaxik i ak'al xaro k'ul inkiq'oj kiib' chi je' taqe ajaab'ees, chi je' taqe ak'uunb'ees elik wach naa nub'anam keh. Ma' naa ta nuketelaam kiwach junsachariik kiwach naa nub'anam, inki Dios tiko'q keh, inki.

¹⁵Hat taq aj Israel, re' QaJaaw Dios kok'achi' taq kaat ruq'oreem maa niimb'isaj taq awach chab'iraj taq chib'ih i ruq'or taq aweh.

¹⁶Chayeew taq ruloq'il aaDios konee ruyeew riib' yu'naak komajaa' i ruyeew chaloq i je' runimaal q'equm, komajaa' ta nee inatoxk'iij taq aawooq chinaah taqe i je' najt kinaah yuuq' ti yo'joq kuum. Eh komajaa' wo' rusutej chi q'equm i saqum najtir intohq'ik taq awuy-eem.

¹⁷Eh wii' ma' xata nimanik taq re' hin naawoq'iim chi ma' eht'alimaj ruum taq aja'wachiil ma' k'isiin i riis naq'nuwach naa reliik noq naawilom chi naa kik'amam reje pan tokoom tinamit i rutinamiit QaJaaw Dios.

¹⁸Re' hin je' wili i xuq'or weh i Dios: Yu'naak cha q'or reh i reey chi je' wili, je' wo' reh ixoq reey: Yu'naak xelik chik awajaawriik ti tz'uun qohoq wach ak'al. Ruum xelik chik aakorona wach anaah inye'wik naq runimaal awach, tiko'q reh.

¹⁹Re' i tinamit Neguev kotimaj chik riij kuum i aj ixowaal ma' awach ta chik i neerub'an ik'ik ar. Eh chu'nchel i aj Judá xi k'amarik chik reje pankowlaj kamanik ar pan tokoom tinamit.

²⁰Re' taq i hat chawilow taq reje i aj ixowaal k'ulik inki a'n iloq pantz'eet reh i rookb'aal q'iij. ¿Aha' wilik i nutinamiit nuye'em taq aweh chi ilarik, re' naq taqe inye'wik taq aholwochiil?

²¹Eh ¿Chib'ih i naa aq'orom taq i hat aj Jerusaleem noq naa nuye'em q'ab' chi re' chik taqe i tinamit xatijej taq i hat naa kokiik chi ajaab'esil taq cha naah? Eh ma' k'isiin ta naa rutiib'iik taq ak'ux je' rukab' i ruti'kiil ixoq noq ink'ulik ruk'ux.

²²Re' taq i hat naa taq apahqaam chi je' wili: ¿Chib'ih reet inqak'ul chi je' wili? tiko'q taq. Re' hin i nuq'or chi ruum chi xiik' naah yib'kiil wach taq amahk naa taq kichopom anaah i aj ixowaal, eh naa kikanaam chi ma' xta taq wilik aweh.

²³Re' q'eq chikop ma' nee ta rub'an chi nee rusutej chi saq i riij, eh re' i nimlaj b'ahlam ma' nee ta rub'an chi neeresaj iloq i saq req'laq pariij. Je' wo' re' taq i hat ma' nee ta wo' taq i na a'n i holohik chi b'anarik, ruum hat taq chik okrinaq chub'aan i yiib' wach na'ojb'al.

²⁴Ruum aj re', re' hin naa nuye'em q'ab' chi k'ul taq naa atukem awiib' je' rukab' noq inkutarik reje wulu' i rutuus ixiim ruum i kowlaj teew inchalik panchiq yuuq'.

²⁵Re' taq i hat aj Israel je' taq re' naa ak'ulum, re' taq i re' xawaaj chi naa nub'anam taq aweh ruum xinsahchik taq panak'ux, kuuk' chik taqe i tiyoox xayeew taq ak'ux.

²⁶Je' re' noq re' hin naa nukanaam chi ma' xta chik wilik taq aweh naa nuye'em q'ab' chi naa taq ak'uhtaam ak'ixb'ilaal.

²⁷Re' hin xwilow chik i ch'uwarisanik wach aakaxáro taq i na a'n, eh i nak'er taq aachii' chi q'orik, chi xa re' i k'oyomal taq i na a'n. Eh xaloq'ej taq i tiyoox chinaah taqe i rub'ohl i yuuq'. Re' taq i hat aj Jerusaleem xiik' naah ti'kiil taq i naa ak'ulum ruum ma' jaruuj taq xakanaa' taqe i ch'uwa' wach na'ojb'al, inki Dios.