Read Poqomchi Jer 17 Bible Online

Jer 17 - Poqomchi bible

Jer 17

¹Re' i QaJaaw Dios je' wili xuq'or: Re' taq amahk i hat aj Judá je' naa ruuk' q'as ju' ch'ihch', ruuk' i q'as ju' holohaq ab'aj k'otooj ruye'aab' chupaam taq awánima, je' wo' chuwach i ruk'aa' taq artaal.

²Re' taq awak'uun awixq'uun ma' inkimay taj i mahk xank'ulik wo' pankik'ux i kiartaal, i kitiyoox Asera inkiyeew ruloq'il chi ri'sil taqe i nimaq taq chee' eh chikinaah taqe inajt kinaah yuuq'.

³Chinaah taqe i rax chee' pantaq ab'iix. Eh ruum taq amahk i na a'n naa nuye'em q'ab' chi naa kelq'aam taq ab'ehomal. Eh chi naa kelq'aam paam i rupaat taq atiyoox wilkeeb' chupaam chu'nchel i taq aatinamiit.

⁴Eh naa taq akanaam kahnoq aa ye'aab' nuye'em taq chi akooch, eh re' chik i ki-ixowinik taq awach naakitaaq'aniik taq aweh chupaam i ye'aab' ma' aweht'al ta taq. Ruum re' nujosq'iil yohb'aal wach noq xqop, xa je' chik rukab' i q'aaq' imb'anik sachooj, inki i Dios.

⁵Eh je' wo' chik wili i xuq'or: Q'e' ti' inaruk'ulum awach i resaj i ránima wuuk' i hin, ruuk' chik i xa winaq i ruyeew ruk'ux, ar chik i rusik' toob'al reh.

⁶Re' imb'anik reh i je' re', naa rukahniik chi je' rukab' i kaq k'iix wilik chupaam i ye'aab' chiq yuuq' ma' awach ta incha'jinik reh. Eh xilak taq ab'aj ink'ihik johtoq chupaam i sahaab' paam ak'al ma' awach taj i patim chupaam.

⁷Eh awach i ruyeew ruk'ux wuuk' i hin naa ruk'ulum i wotob'il, eh wuuk' i hin i ruch'ikaa' ruk'ux.

⁸Re' reh je' rukab' i chee' tikooj chii' rooq ha' inooj reje i raa' chii' ha', ma' xta ruk'ul noq inchalik i rutz'ahiil i q'iij xa eliik rax wach i xaq. Eh noq inchiqik taqe i yuuq' k'ixkaab' xama' xta wo' ruk'ul, xama' rukanaa' ta wo' wachinik.

⁹Eh ma' xta chik jino'q imb'anik jot'ooj chuwach i ma' holohik taj wilik cho pan ánima. ¿Mi wilik jino'q neenab'inik reh i ánima?

¹⁰Re' hin i Dios ra'j weht'al re' chib'ih i wilik cho pan ánima, i wilik cho chupaam i kapeb'al, eh naa nuye'em i rutojb'aal i ju'jun je' rukab' i ruk'ul chi reh, re' q'oreel chib'ih i xub'an, chib'ih i xuq'or inki.

¹¹Awach i rureq i rub'ehomal ma' re' ta parub'ehel, i rub'an reh je' rukab' i rub'an i tz'ikin i rumoheej i miloj ma' re' tee reh xk'otwik reh. Re' reh panyejaal i ruk'achariik naa rukanaam kahnoq i rub'ehomal, ar naa ruk'utiniik chi ma' xta runa'ojb'al.

¹²Re' i rupaat i qaDios i hoj xiik' naah loq'il xanoq wo' pampeet xye'arik runimaal wach, re' i santo laj ye'aab'.

¹³QaJaaw Dios awuuk' hat inqach'ikaa' qak'ux i hoj aj Israel, eh chu'nchel i xat kiq'eb' chi riij kik'ux naa ruk'uhtjiik kik'ixb'ilaal. Eh re' inkimay animjiik xa je' pampooq tz'ihb'amaj i kib'ihnaal, ruum chi xat kiq'eb' i hat i je' naq hat jinaj k'achlik raasb'al ha' chi keh.

¹⁴QaJaaw Dios cha kuy kinak'achrisaj tii, chi je' re' neekink'achjik. Eh kinako'leej tii, chi je' re' neekinko'ljik ruum re' hin xa re' wo' hat i nuyeew aloq'il.

¹⁵Re' tinamit je' wili inkiq'or weh: ¿Chib'ih reet noq ma' nqak'ul taj i ruq'or rib'iral qeh i Dios? Re' hoj inqaaj qilom chi nenooj eloq wach yu'naak, inki taqe.

¹⁶Re' hin ma' xnupahqaaj taa weh chi naa nuyeew i ti' k'axik chikinaah, ma' inwaaj taj chi neenkik'ul i ti' k'axik, re' hat aweht'al chi re' taqe i xnuq'or chi na kik'ulum re' wo' hat xat q'orik weh.

¹⁷Jaaw maa kinayohb'isaj cho ruuk' aajosq'iil, ruum xa awuuk' wo' hat inusik' ko'lemb'al wiib' noq inchalik i ti' k'axik chi nunaah.

¹⁸Eh re' taqe i ki-ixowanik nuwach cha kanaa' taqe pank'ixb'ilaal, ma' re' taj i hin. Re' keh chayohb'isaj taqe ruuk' aajosq'iil, ma' re' taj i hin. Xa k'ahchi'-oq aye'em i runimaal ti'kiil k'uxliis, chikinaah.

¹⁹Re' QaJaaw Dios je' wili i xuq'or weh: Yu'naak hiy chapab'aa' awiib' panookb'al reh i tinamit Judá re' kiokik i kielik wii' taqe i reey, eh nee wo' nooj apab'aa' awiib' chi chii' taqe i ookb'al reh i tinamit Jerusaleem.

²⁰Eh je' wili i neenaq'or keh i tinamit, je' wo' keh taqe i reey, je' wo' keh i aj Judá, je' wo' keh i aj Jerusaleem: neeki okik i koq chupaam taqe i ookb'al re' re'. Chab'iraj taq i ruq'oral i QaJaaw Dios.

²¹Re' QaJaaw je' wili i xuq'or: Chaketelaaj taq wach aak'achariik maa k'am taq reje ihq chupaam i hi'limb'al q'iij, ma' naa ta wo' taq ak'amam reje chupaam taqe i ookb'al re' i tinamit Jerusaleem.

²²Eh maa wesaj taq chaloq jino'q i ihq panapaat, eh ma' xta jino'q i kamanik naa a'nam. Naa la' taq akanaam chi loq'oomb'al weh i hi'limb'al q'iij re' re', je' rukab' i xnuq'or keh taq aamaam awati't chi naa kianam.

²³Xa re' la' re' keh xama' xkian ta wo' hoq i xnuq'or keh, ni xata xinkinimaj. Eh ruum i rukowiil i kinaah ma' xkik'am ta naah i nuk'uhb'aal.

²⁴Re' hin i Dios kinq'orik chi kinanimaj taq i hat, maa k'am taq reje jino'q i ihq pantaq ookb'al reh i tinamit Jerusaleem chupaam i hi'limb'al q'iij. Cha kanaa' taq chi loq'oomb'al weh, ma' jino'q i kamanik taq naa a'nam chupaam.

²⁵Eh wila' xa a'n taq i je' re', chi juneliik naa ruwihiik taq aareey je' rukab' noq xwihik i reey David. Pan kareta xoyimaj, eh rij kawáyu wilkeeb' noq naakokiik pantaq ookb'al reh i tinamit wili kuch'ihil taqe i k'amal b'eeh kuch'ihil taqe i aj Judá. Je' wo' taqe i aj Jerusaleem, chi je' re' junelik naa ruwihiik patineel Jerusaleem.

²⁶Wilik inaakichaliik pan tinamit Judá, re' taqe i wilkeeb' chi junsuut i Jerusaleem, pan tinamit Benjamín, wach k'ixkaab' wilik wii' i rax chee' ar Neguev. Eh naa kik'amam cho chi kimayiij taqe i k'atoj chikop, eh wilik xa chi naq'wach i kitik, wilik insensia naa kik'amam cho chi kimayiij chupaam i ye'aab' chi ye'b'al nuloq'il.

²⁷Eh wi ma' xanimaj taq i hat i nuk'uhb'aal, wila' ma' xakanaa' taq chi loq'oomb'al weh i hi'limb'al q'iij, eh wila' ma' xakanaa' taq i kojooj ihq chupaam taqe i ookb'al reh i tinamit Jerusaleem. Re' hin naa nukojom ruq'aq'al taqe i ookb'al reh i tinamit re' re', eh re' q'aaq re' re' naruk'atwiik reh taqe i paat imb'aan wii' i q'ataj q'orik ma' awach ta chik naa ruchupwiik reh, tiko'q keh, inki weh i Dios.