Read Poqomchi Jer 22 Bible Online

Jer 22 - Poqomchi bible

Jer 22

¹Re' QaJaaw Dios je' wili i xuq'or weh: Hiy parupaat i kireey i aj Judá ar neenaq'or reh taqe i q'orik wili:

²Hat kireey i aj Judá je' rukab' noq xwihik cho chi reyil i David chab'iraj i ruq'oral i Dios naa nuq'orom aweh hat, i ruk'ul wo' chi naa kib'iram taqe i kikamanik awuuk' taqe aatinamiit kiokik cho chupaam aa ye'aab' wili.

³Je' wili i ruq'or i QaJaaw Dios: Parub'ehel naa kianam i q'ataj q'orik, naakiko'leem inq'ucharik i chib'ih keh. Eh mankelq'aaj i chib'ih keh i aj pan tokoom tinamit, je' wo' taqe ixoq kamnaq kib'ahiil, je' wo' taqe i ma' xta kituut kajaaw. Eh maa nkikansaj chik ma' xta kimahk, chupaam i ye'aab' wili.

⁴Wila' xti korik chi xkinimaj i nuq'oral juneliik naa ruwihiik i reey chinaah i tinamit re' re' je' rukab' noq xwihik cho chi reyil i David. Re' keh pan kareta, rij kawáyu wilkeeb' noq naa kokiik cho chupaam i ye'aab' wili kuch'ihil taqe i naa rukamaniik kuuk' kuch'ihil taqe i kitinamiit.

⁵Eh raaj wila' ma' xkinimaj i xnuq'or keh, re' hin xti nuq'or i korik chi re' paat wili i na a'n wii' i taaq'anik naa rusachariik wach chi jumpech, inki Dios.

⁶Ruum re' reh je' wili ruq'orom cho chi riij i paat i rub'an wii' i taaq'anik i kireey i aj Judá: Re' hat q'e' naq tiwaaj je' rukab' noq inwaaj i yuuq' Galaad, i yuuq' Líbano, xa re' la' re' hin i nuq'or i korik chi naa akahniik chi xa je' chik akab' i ye'aab' chiq yuuq', eh chi je' akab' i tinamit ma' xta patineel chupaam.

⁷Eh naa nuk'amam taqe chaloq i naa ruk'uliik sachwoq taq wach aatinamiit wilik kich'ihch' pan kiq'ab' naakiyok'om taq aach'iit re' ruuk' i chakaltee' naa kikutum pan q'aaq'.

⁸Ma' k'isiin i naakik'iik ilwoq reh i tinamit re' re', je' wili i naa kiq'orom chikiwach: ¿Chib'ih reet noq xusach wach i QaJaaw Dios i tinamit wili xanaah re' xiik' naq naah nimaal? inko'q taqe.

⁹Eh je' wili kichaq'weesjiik naa rub'aan: Je' re' xuk'ul ruum ma' xkian taj aha' naq wilik i xkiyejaa' wach ruuk' i QaJaaw Dios. Re' la' chik i tiyoox xkiloq'ej, re' chik taqe i re' xkikamaneej wach kiuchjoq, inki Dios.

¹⁰Re' taq i hat maawoq'ej taq i rukimiik reey Josías. Re' la' chawoq'ej taq i rak'uun Salum rub'ihnaal, ruum re' reh naa ruk'amariik reje pan tokoom tinamit. Eh ma' jaruuj ta chik naa rusutiniik chaloq, ma' naa ta chik rilom wach i rutinamiit x-aasjik wii'.

¹¹Ruum re' i QaJaaw Dios je' wili ruq'or chi riij i Salum, rak'uun i Josías kireey i aj Judá. Re' Salum re' re' wilik chi reyil chi jilow i rajaaw naa ruk'amariik reje pan tokoom tinamit ma' jaruuj chik naa rusutiniik cha yu' parutinamiit.

¹²Ar la' naa rukimiik chaloq pan tokoom tinamit re' naa ruk'amariik reje wii' ma' naa ta chik rilom wach chi jumpech i ruye'aab' wili.

¹³Re' hat reey Joacim q'e' ti' i naa ak'ulum ruum ruuk' taqe yiib' wach na'ojb'al ruuk' i leq' inayejaa' i paat i na a'n wii' i taaq'anik je' wo' taqe najt kinaah paat inayejaa' inamin taqe pankowlaj kamanik taqe i tokoom, eh ma' natoj ta taqe.

¹⁴Re' hat je' wili inaq'or: Re' hin naa nuyejaam i nunim laj paat naa nub'anam wii' i taaq'anik, eh k'ih tahs paam naa nub'anam naa nukojom taqe ru ventanahiil. Eh naa nukojom ruka'taah chi tz'ilom re' ruuk' i chakaltee', naa wiq'omaam wach ruuk' i kaq laj iq'oom tiki.

¹⁵¿Mi nakapaaj re' i hat chi re' reyil manlik ruuk' chi xoyimaj wach aapaat cha junsuut ruuk' i tz'ilom i chakaltee'? Korik re' awajaaw Josías xub'an rusuqkiil i ruwa' ruum re' korik i xub'an eh parub'ehel xub'an i q'ataj q'orik ruum aj re' suq xwihik.

¹⁶Re' reh xuko'lej riij i ajwaal wach chi keh i neb'aa', taqe xb'aan cho ti' k'axik keh, ruum aj re' suq xwihik, ¿Mi ma' ruuk' taqe re' re' xk'utinik chi xirunimaj? inki QaJaaw Dios.

¹⁷Eh re' hat xa re' inakapaaj chi naa areqem atumiin ruuk' i leq' eh chi naa akansam taqe ma' xta kimahk chi nayeew taqe panti' k'axik chi nawelq'aaj i chib'ih keh aatinamiit, inki.

¹⁸Re' QaJaaw Dios je' wili xuq'or chi riij i reey Joacim rak'uun i Josías kireey aj Judá. Re' Jocim ma' awach ta naa roq'iniik reh na'kimoq ma' awach ta naa ruq'oriik chi je' wili: Q'e' ti' xuk'ul ma' ko'q ta taqe i ras i ruchaaq'. Q'e' ti' xuk'ul i qajaaw reey nim rajaawriik ma' ko'q ta taqe.

¹⁹Ma' naa ta kimuq'aam naakiqerem reje i ruti'jolal chi riij i tinamit Jerusaleem je' rukab' noq inkiqerej reje i ruti'jolal i b'uurux ma' nkimuq'aa' taj, inki.

²⁰Re' taq i hat aj Jerusaleem johteen taq chinaah i yuuq' Líbano cha k'er taq aachii' kow taq tiq'oroq reje chinaah i yuuq' Basán, eh k'ul taq cha k'er reje aachii' ruum chu'nchel i q'e' naq taq inak'ax xsacharik chik kiwach.

²¹Re' hin xat nuq'oreej wo' naq taq noq kosuq taq wilkaat, xa re' la' xama' xinawaaj ta wo' taq ab'iram. Eh xa je' wo' re' i na a'n taq noq kore' xatoq'aa' taq cho nimanik, xama' xinawaaj ta wo' taq ab'iram.

²²Re' taqe i k'amal ab'eeh xajunhuup chi teew naa ruk'amwiik reje keh, chu'nchel i q'e' naq taq inak'ax naa kik'amariik reje pan tokoom tinamit. Eh re' taq i hat naa taq ak'uhtaam ak'ixb'ilaal, naa rukahniik chi xama' xta chik taq awajaawriik, ruum taq ayiib' wach na'ojb'al.

²³Re' taq i hat yu'naak xasuq taq chik ak'ux chi wihik chupaam taq apaat, akojom taq tz'ilom chuwach re' ruuk' i chakaltee' inchalik ar Líbano. Xa re' la' ponik reh i q'iij chi naa ruchaliik taq i ti' k'axik cha naah xa je' chik rukab' i ruti'kiil ixoq noq ink'ulik ruk'ux, inki Dios.

²⁴Re' QaJaaw Dios je' wili xuq'or reh Jeconias, rak'uun i Joacim reey ar Judá: Re' hin xti korik i nuq'or aweh atoob' ta naq je' hat nulopq'aaq' wilik ju' rusak'aaj nuq'ab' q'e' iloq weh re' i hin xa nee wo' naq tiinub'oq iloq ar.

²⁵Reh chi nee ti nuq'asaj pan kiq'ab' taqe i ki-ixowanik awach i xiik' naah kijosq'iil, re' taqe i xiik' naah tiyo'jik kuum. Naa wo' kaat nuq'asam pan q'ab' i Nabucodonosor kireey i aj Babilonia, eh pan kiq'ab' i aj Caldeo.

²⁶Naa nuye'em q'ab' chi naa ak'amariik reje pan tokoom tinamit i hat, je' wo' hoq i atuut, ma' re' ta taq xat aasjik wii'. Ar taq naa akimiik cho akab'cheel, inki.

²⁷Je' re' noq re' keh ma' jaruuj chik naakisutiniik cho pan kitinamiit re' i xanaa naq chik kaajwaam kilom wach.

²⁸Re' Jeconias naa rukahniik chi xa je' chik rukab' jino'q paxeel laj pulato. Eh chi je' rukab' i paxeel ak'al xaro ruum naa ruk'amariik reje pan tokoom tinamit i reh, je' wo' taqe i rak'uun rixq'uun.

²⁹Re' taq i hat wilkaat taq wach ak'al eh chawunchelaal taq i wilkaat taq wach ak'al xti chab'iraj taq i ruq'oral i QaJaaw Dios.

³⁰Chatz'ihb'aaj taq i naa ruk'ulum i winaq re' re'. Ruum re' reh naa rukahniik chi xa je' ma' xwihik ta rak'uun rixq'uun, eh ma' xelik ta korik paruk'achariik ruuk' taqe i xub'an. Ruum ma' jino'q i rak'uun ma' jino'q i riih naa rokiik chi reyil ar Judá je' rukab' noq xwihik cho chi reyil i David ar, inki.