Read Poqomchi Jer 23 Bible Online

Jer 23 - Poqomchi bible

Jer 23

¹Re' QaJaaw Dios je' wili i xuq'or: Q'e' ti' inakik'ulum i aj cha'joom inkisach wach, inkitukej wach i nutinamiit taqe nutentzuun.

²Ruum aj re', re' QaJaaw, i qaDios i hoj, hoj aj Israel je' wili i xuq'or keh i kicha'jinik reh i rutinamiit: Re' taq i hat xatukej taq kiwach i nutinamiit, re' taqe nutentzuun xa kaaj taq reje ma' xacha'jej ta taq. Re' hin naa taq kaat nuye'em chutojariik amahk ruum ayiib' wach na'ojb'al taq xa a'n.

³Re' hin naa wo' chik numolom kiwach i ruqox i nutinamiit re' taqe i nutentzuun, re' i xnutaq'aaj taqe reje wii' chupaam i ju'jun chi tinamit, naa wo' chik nuk'amam taqe chaloq pan kitinamiit naa nuk'uxlaam taqe, eh naa kik'ihaaxb'iik.

⁴Eh re' hin naa nukojom cha'jen keh, reh chi naa kicha'jaljiik chi korik kuum, ma' naa ta chik kiyo'jiik ma' xta chik i naakik'ulum, ma' jino'q chik keh i naa rusahchiik wach, inki QaJaaw Dios.

⁵Eh je' wo' chik wili i xuq'or: Naa ruponiik i q'iij chi re' hin naawuksam cho jino'q i xikin riih i reey David re' chik i reh naa rokiik chi reyil korik wach ruk'ux, re' holohik, eh parub'ehel naa rub'anam i q'ataj q'orik chinaah chu'nchel i wach ak'al.

⁶Noq naa ruwihiik chi reyil i reh naa ruko'ljiik i tinamit Judá, je' wo' hoq i tinamit Israel pansuqkiil k'uxliis chik naa kik'achariik. Eh je' wili i naa rubíhnaam jinaj i Dios korik wach ruk'ux quuk', inko'q taqe reh, inki.

⁷Eh re' QaJaaw Dios je' wili xuq'or: Re' hin korik i nuq'or chi naa ruponiik i q'iij chi ma' naa ta chik kiq'orom chi je' wili: Xti k'achlik i QaJaaw Dios x-esanik cho keh i aj Israel paruyuq'ul i Egipto, ma' ko'q ta chik taqe.

⁸Je' la' chik wili i naa kiq'orom: K'achlik i QaJaaw Dios x-esanik cho keh i aj Israel chupaam i tinamit wilik pantz'eet reje reh i rookb'aal q'iij. Eh xresaj chaloq i rutinamiit chupaam taqe i tinamit kitukem naq wii' kiib', inko'q taqe, ruum re' hin naa wo' chik nuk'amam taqe cho pan kitinamiit, inki.

⁹Kuum taqe i jalal ruq'oral i Dios ma' korik ta wach kik'ux, xan yot'ik chik i wánima xakib'arb'otik chik chu'nchel i nub'aqil. Xa je' chik nukab' i winaq ma' rukuy ta chik i ruxohk'riik noq inwik'raaj, ruum kiyo'jik chuwach i QaJaaw Dios, chuwach i ru santo laj q'orb'al.

¹⁰Ruum re' i tinamit wach ak'al xa re' chik i ch'uwarisanik wach kikaxaro, xa re' i yiib' wach na'ojb'al inki a'n ruum i yiib' wach na'ojb'al inki a'n xkahnik i qaye'aab' chi ma' xta chik i wilik chupaam. Re' taqe k'im inkik'ux naq i chikop xchiqik chi jumpech.

¹¹Re' QaJaaw Dios je' wili xuq'or: Re' taqe i jalal naq nuq'oral, taqe i k'amal kib'eeh aj tiij re' wo' taqe haa' chub'anariik i yiib' wach na'ojb'al. Re' hin xnureq taqe panupaat chub'anariik.

¹²Re' i keh panq'equm paam b'eeh pan kalik naakib'eeh, xa k'isiin naakimihnjik naa kiqehb'iik. Ruum re' hin naa nuye'em i ti' k'axik chikinaah noq naa ruponiik i q'iij chi nuwach i hin, inki QaJaaw Dios.

¹³Re' hin xwilow taqe i kijalwik naq nuq'oral ar Samaria chi wilik taqe i ma' imponik ta chi nuwach inki a'n re' chik i tiyoox Baal xkiq'or rib'iral. Ruuk' taqe re' xkiyeew q'ab' chi xkiq'eb' kiib' i nutinamiit Israel.

¹⁴Eh xwilow kuuk' taqe i kijalwik nuq'oral ar Jerusaleem chi xkian yiib' wach na'ojb'al, xa re' i ch'uwa'risanik wach kikaxaro, xa re' i chukuj q'orik inki a'n Eh inkiyeew rukowiil kik'ux i yiib' wach kib'anik reh chi ma' jino'q keh i neenkikanaa' rub'aan. Re' taqe re', ruch'ihil chu'nchel i tinamit wilkeeb' ar xa je' kikab' i tinamit Sodoma i tinamit Gomorra.

¹⁵Ruum aj re', re' hin i Dios wilik wajaawriik, je' wili i xnuq'or chikiij i jalal nuq'oral re' re': Re' hin je' na naa nuye'em keh chi k'uxarik xiik' naah k'ahiil, je' na naa nuye'em keh chi uuk'jik i k'ahlaj ha', ruum kuuk' taqe i kijalwik nuq'oral ar Jerusaleem xelik chaloq i k'ulb'anaj wachiis. Eh xooj chi nimaal chinaah chu'nchel i wach ak'al kinki.

¹⁶Eh re' QaJaaw Dios wilik rajaawriik je' wili i xuq'or: Re' taq i hat aj Israel manimaj taq inkiq'or i jalal naq nuq'oral, ruum re' inkiq'or taq aweh xachukuj q'orik, ruuk' i re' inkiyeew taq rukowiil ak'ux, xa re' keh kitz'aqwik wach. Eh re' inkiq'or chi nkilow pan kisaqwiriik xa pankanima inchalik ma' re' taj i hin kink'uhtanik keh.

¹⁷Eh je' wili inkiq'or taqe i ki-ixowanik wach i nuq'oral: Re' Dios xuq'or chi ma' xta taq ti' naa awilom wach, inki taqe eh chi re' taqe i ma' holohik ta kib'anik suq naa kiwihiik. Eh re' inki a'n i nelik cho pankanima Ma' jino'q i ti' k'axik naa ruchaliik chikinaah inki taqe, inki i Dios.

¹⁸¿Mi wilik jino'q keh i jalal naq ruq'oral i Dios i naab'inik reh i wilik cho panránima i Dios? ¿Mi wilik jino'q i rilom wach, eh rib'iram i ruq'oral? ¿Mi wilik jino'q i xuyeew ruk'ux chi rib'irjiik i ruk'uhb'aal eh xuk'am naah?

¹⁹Re' QaJaaw Dios yohb'aal wach i rujosq'iil naa ruye'em chikinaah taqe i yiib' wach kina'ojb'al xa je' chik rukab' noq inchalik i kowlaj jab' i kowlaj kaq suut teew.

²⁰Re' QaJaaw Dios ma' jaruuj naa resam i rujosq'iil chikinaah, korehtaal i rub'an i ruyejaam wach paránima. Eh pan jinaj q'iij naa taq areqem chi riij chib'ih reet noq narojiik eloq wach taqe i re'.

²¹Re' taqe i jalal naq nuq'oral ma' hin ta xin taaq'anik reje keh chi chukuj i q'orik. Eh re' keh xankiyeew chik kik'ux chub'aan, ma' hin ta xin taaq'anik reje keh. Re' keh xakajiim chik kiooj chub'aan.

²²Wita xkik'am naah inwaaj i hin, re' naq i nuq'oral xkiq'or reh i nutinamiit. Eh xkesaj naq taqe chaloq chupaam i kiyiib' wach b'eeh, eh xkitik'aa' wo' naq rub'aan i kiyiib' wach na'ojb'al.

²³Re' QaJaaw Dios je' wili xuq'or: Re' hin xa hin wo' Dios chi najt chi ma' najt.

²⁴Je' re' noq ma' jino'q i rukeb'aa' riib' chi nuwach. Re' hin inwilow paam chu'nchel i taxaaj, je' wo' paam chu'nchel i wach ak'al. Re' wili korik ruum re' hin i Dios kinq'orik.

²⁵Re' hin xb'iraj i chukuj q'orik xkian taqe i jalal naq nuq'oral, re' re' je' wili inkiq'or: Parub'ihnaal i QaJaaw wilik i ruk'uhtaaj qeh pan qawiriik, inki taqe.

²⁶Re' taqe jalal naq nuq'oral re' re' ¿Kojaruuj inkimay ruq'orariik i xama' korik ta wo' hoq, re' taqe i xa re' i chukuj q'orik xa re' keh kitz'aqwik wach?

²⁷Eh ruuk' inkixohk'reej pan kiwirik inkiq'or chikiwach inchalik ruyojiik kik'ux intohq'ik kikanaam nunimjiik i hin. Je' rukab' noq xkikanaa' cho nunimjiik i kimaam kati't, re' chik xkinimaj i tiyoox Baal.

²⁸Eh awach i jalal naq nuq'oral wilik i xixohk'reej paruwiriik, re' wo' chuq'or i k'uhtjik reh. Awach i re' i nuq'oral i ruk'ul re' wo' nuq'oral chuq'or. Ruum re' naq'wach i Trigo ma' elik ta wach ruuk' i rusohk'iil, inki Dios.

²⁹¿Mi ma' je' rukab' re' i q'aaq' i nuq'oral? ¿Mi ma' je' rukab' re' i nimlaj paxb'al ab'aj?

³⁰Ruum aj re', re' hin ma' ruk'ul ta nuk'ux chi re' taqe i jalal naq nuq'oral k'ul inkiq'or chikiwach chi je' re' i nuq'or, inki.

³¹Eh je' wo' chik wili i xuq'or i QaJaaw Dios: Re' hin ma' ruk'ul ta nuk'ux chi re' taqe i jalal naq nuq'oral re' re' inkiq'or chi re' nuk'uhb'aal i hin inkiq'or rib'iral xanaah re' xa re' wo' keh kiyej-anik wach.

³²Eh ma' ruk'ul ta nuwach chi re' taqe i jalal naq nuq'oral inkiq'or rib'iral inkilow pan kiwirik xanaah re' xama' korik ta wo' hoq. Ruuk' taqe chukuj q'orik ruuk' taqe i xa kina'ojb'al i keh inkiyoj ruk'ux i nutinamiit. Ma' re' taj i hin kitaaq'anik keh, ma' hin ta kinq'orik keh taqe re'. Re' keh ma' xta kina'ojb'al chi kitoob'jiik taqe i tinamit, inki i Dios.

³³Re' hat Jeremías wixkipahqaaj aweh i tinamit oon jino'q keh taqe jalal naq i nuq'oral, oon jino'q keh i k'amal kib'eeh aj tiij chi je' wili: ¿Nik' wach i ruq'or i QaJaaw Dios? inko'q taqe aweh. Re' hat je' wili taq i naa aq'orom: Re' ruq'or i QaJaaw Dios, re' chi naa taq kaat rukanaam cha wutkeel, tiko'q keh.

³⁴Eh wila' re' taqe i tinamit, taqe i jalal naq nuq'oral, taqe k'amal kib'eeh aj tiij nee nq'orik reh chi je' wili: Re' wili i xuq'or i QaJaaw Dios inko'q chi k'onb'al reh i nuq'oral i hin, hin Dios. Re' hin naa nuye'em i ti' k'axik chinaah i reh chikinaah i awach reh parupaat.

³⁵Neerub'an chi nee rupahqaaj reh i ramigo i ju'jun oon reh i awach reh chi je' wili: ¿Chib'ih xchaq'wik cho wii' i QaJaaw? ¿Chib'ih i xuq'or i QaJaaw? inko'q.

³⁶Xa re' la' ma' nee ta chik i rub'an chi nee taq ink'ulik pankik'ux i xuq'or i QaJaaw, ruum chu'nchel taq aq'oral naa rukamaniik chi wilik i ti' naa ruk'amam chaloq ruum xayoj taq wach i ruq'oral i k'achlik Dios, re' i Dios wilik rajaawriik chinaah chu'nchel.

³⁷Eh re' hat Jeremías cha pahqaaj keh i jalal naq nuq'oral chi je' wili: ¿Chib'ih i xatruchaq'weej taq wii' i QaJaaw Dios? ¿Chib'ih i xuq'or taq weh? tiko'q keh.

³⁸Wila' xaq'or chi je' wili: Re' wili i xuq'or i QaJaaw Dios inko'q taqe. Re' QaJaaw Dios je' wili i ruq'or taq cho chawiij: Ruum chi xaq'or taq i q'orik re' re' je' wili i xuq'or i QaJaaw tiki taq. Eh xnutaq'aaj naq ruq'orariik chi ma' naa ta taq aq'orom chi re' wili ruq'or i QaJaaw, kinki.

³⁹Ruum re' i korik i nuq'or taq aweh chi naa taq asahchik panuk'ux naa wesam pan naq'nuwach i tinamit xnuyeew naq cho keh aamaam awati't.

⁴⁰Eh chi juneliik naa wesam taq i runimaal awach naa nuye'em q'ab' chi naa taq ak'uhtaam ak'ixb'ilaal, ma' naa ta rusahchiik pank'uxliis chi jumpech, inki Dios.