Read Poqomchi Jer 28 Bible Online

Jer 28 - Poqomchi bible

Jer 28

¹Eh paroo' poh reh i haab' re' re', re' noq kijib' haab'rokiik chi reyil ar Judá i Sedequías. Re' i Hananías jalal ruq'oral i Dios i rub'an riib', rak'uun i Azur aj Gabaón, xuq'oreej i Jeremías ar parupaat i Dios chikiwach i k'amal b'eeh aj tiij. Eh chikiwach chu'nchel i tinamit, je' wili i xuq'or reh:

²Re' QaJaaw Dios nim rajaawriik, re' ki Dios i aj Israel je' wili xuq'or: Re' hin naa wesam taqe i aj Israel chi ri'sil i rajaawriik i Nabucodonosor kireey i aj Babilonia.

³Re' hin xa pan kiib' haab' wo' chik i nuk'am taqe cho ayu' chu'nchel i xa chib'ih jariik inkamanik panupaat re' taqe i xuk'am reje Babilonia i reey Nabucodonosor.

⁴Eh naa wo' chik nuk'amam chaa yu' i Jeconias kireey i aj Judá rak'uun i Joacim, Naa wo' chik nuk'amam taqe chaloq chu'nchel i tinamit k'amooj taqe reje ar Babilonia, naa wesam i rajaawriik i kireey i aj Babilonia, inki i Dios.

⁵Eh chikiwach chu'nchel i tinamit, chikiwach chu'nchel i k'amal b'eeh i aj tiij wilkeeb' parupaat i Dios je' wili i xuq'or i Jeremías reh i Hananías jalal ruq'oral i Dios i rub'an riib'.

⁶Ma' xta reet korik ta naq chi neerub'an Dios inaq'or, re' naq i QaJaaw Dios nee nq'orik chi korik ti q'orik. Nee naq inooj iloq wach i xaq'or chi naa wo' chik kik'amariik cha yu' i xa chib'ih jariik inkamanik parupaat i Dios. Eh chi naa wo' chik kik'amariik chaloq chu'nchel i tinamit k'amooj taqe reje Babilonia.

⁷Xa re' la' re' hin, inwaaj chi neenab'iraj i q'orik naa nuq'orom aweh, inwaaj wo' chi neenkib'iraj i tinamit:

⁸Re' taqe i jalal ruq'oral i Dios wihinaq taqe chaloq najtir, noq komajaa' ti aasjik i hat, je' wo' hoq i hin. Re' keh xa kiq'orom wo' cho rib'iral chi naa ruwihiik q'aq'inik, chi naa ruwihiik ti' k'axik, wi'jaleel chupaam taqe i ju'jun seht chi tinamit. Eh je' wo' chikinaah taqe i reey nim kajaawriik.

⁹Eh awach i jalal ruq'oral i Dios inq'orik chi naa ruwihiik i suq laj k'acharik, eh noq inooj eloq wach i ruq'or, ar inreqarik chi riij chi korik chi re' i QaJaaw Dios inq'orik reh i ruq'or, inki.

¹⁰Noq xrib'iraj chi je' re' i Hananías ma' k'isiin ta xchalik ruk'aah xulahk'aaj i per per wach chee' ruye'em naq rijnaah i Jeremías xutoqib'eej.

¹¹Re' Hananías je' wili i xuq'or keh i tinamit kimolom kiib' ar: Re' QaJaaw Dios korik chi je' wili xuq'or: Pan kiib' haab' noq naa wesam taqe chu'nchel i tinamit chi ri'sil i rajaawriik i Nabucodonosor kireey i aj Babilonia naa nusacham wach i rajaawriik, inki. Eh chupaam i jumehq' re' re' xelik reje ar i Jeremías.

¹²Eh noq re' Hananías i jalal ruq'oral i Dios i rub'an riib' rutoqib'eem chik i per per wach chee' ruye'em naq riij naah i Jeremías jalal ruq'oral i Dios xq'orob'jik Jeremías je' wili xq'orarik reh:

¹³Yu'naak hiy ruuk' i Hananías je' wili cha q'or reh, re' QaJaaw je' wili xuq'or: Re' reh per per wach chee' i xutoqib'eej, re' wilik naq riij anaah i hat. Eh re' hin jinaj i per per wach ahl laj ch'ihch' nuyejaam chi naa nukojom rij naah i reh.

¹⁴Ruum re' hin i Dios nim wajaawriik hin ki Dios i aj Israel je' naa per per ahl laj ch'ihch' i nukoj rij kinaah chu'nchel i nimaq tinamit, reh chi naa kiminariik pankowlaj kamanik ruum i Nabucodonosor kireey i aj Babilonia. Eh nuyeew wo' chi ri'sil i rajaawriik taqe i josq'laj chikop, tiko'q reh, inki Dios.

¹⁵Eh re' Jeremías je' wili i xuq'or reh i Hananías: Chab'iraj i hat Hananías re' QaJaaw Dios xuq'or chik weh chi ma' re' tee reh xq'orik aweh taqe i xaq'or, je' re' noq re' hat xachukuj q'orik i na a'n keh i tinamit.

¹⁶Ruum aj re', re' QaJaaw Dios je' wili i xuq'or chawiij: Re' reh naa wesam i ruk'achariik chinaah i wach ak'al. Eh xa chupaam i haab' wili naa rukimiik, ruum taqe i xuq'or keh i tinamit ruuk' i re' xin kiq'eb' chi riij kik'ux, inki.

¹⁷Eh re' Hananías xkimik wo' hoq chupaam i ruwuuq poh ree haab' re' re'.