Read Poqomchi Jer 33 Bible Online

Jer 33 - Poqomchi bible

Jer 33

¹Re' i Jeremías noq tz'aplik chuwach reje tz'ilom je' wili i xq'orarik reh ruum i Dios:

²Re' hin i Dios, hin xinyej-anik reh i taxaaj, i wach ak'al, eh xnuyeew taqe pan kiye'aab' je' wili i xnuq'or:

³Kow kinaq'oreej awuuk' re' hin nee tib'iraj, neenuk'uhtaaj aweh aha' wilik i ma' weht'al taj i hat, re' i ma' eht'alimaj taj.

⁴Ruum re' hin i Dios, ki Dios i aj Israel, je' wili i nuq'or chikiij i tinamit wili, chi riij i rupaat i reey, re' chi naa rusachariik kiwach naa rukahniik chi ke'emb'al kiib' taqe i naa kitoq'aam kik'ulb'ejiik chi q'aq'inik taqe i aj Babilonia.

⁵Eh naa runujiik chi kamnaq paam i tinamit, re' hin naa nuye'em q'ab' ruum i nujosq'iil chi naakik'ulum i ti' k'axik. Re' hin ma' naa ta nuketelaam kiwach naa nuq'eb'em taqe chi riij nuk'ux, ruum i yiib' wach na'ojb'al inki a'n

⁶Atoob' ta je' re' inki a'n re' hin naa wiq'omaam taqe, naa wesam i kiti'kiil, naa nuye'em keh i suq laj wihik, eh ma' xta chik inakik'ulum.

⁷Je' re' noq naa wo' chik taqe wesam chaloq panti' k'axik i aj Judá, taqe i aj Israel, naa wo' chik nuch'ikaam taqe pan kiye'aab' je' rukab' i pampeet.

⁸Naa wesam pankamanik chu'nchel i kiyiib' wach na'ojb'al, re' taqe i mahk xkian noq xkiq'eb' kiib' chi nuwach. Eh re' hin naa nukuyum chu'nchel i kimahk, eh ruum i re' xin kiq'eb' chi riij kik'ux.

⁹Re' i tinamit Jerusaleem naa rukahniik chi ye'el rusuqkiil nuk'ux, chi ye'el nuloq'il chi ye'el runimaal nuwach, chikiwach chu'nchel i tinamit sut i wach ak'al, Noq naa kib'iram rib'iral i tokoom tinamit chu'nchel i kitoob'jiik naa nub'anam chi suq chik naa kiwihiik ma' k'isiin ta naa kiyo'jiik, inki Dios.

¹⁰Eh je' wo' chik wili i xuq'or: Re' taq i hat inaq'or taq chi re' tinamit wili xan tz'irik chik paam, ma' xta chik tinamit, ma' xta chik chikop, chi ma' xta chik wilik chupaam taqe i xilak taq b'eeh Judá, je' wo' xilak taq b'eeh Jerusaleem. Korik chi ma' xta chik tinamit, chi ma' xta chik chikop chupaam.

¹¹Xa re' la' naa wo' chik rib'irjiik i tz'uuy, i ninq'iij reh i kaxáro, je' wili i naa ruq'orariik: Chat'iosej taq i rotob'il i QaJaaw Dios nim i rajaawriik ruum re' reh q'e' aj k'axool, eh juneliik wilik i ketelinik wachiis ruuk' inko'q taqe. Eh naa wo' rib'irjiik i kiq'oral i naa kik'amam chaloq i kimayiij panupaat reh i t'iosinik. Eh korik wo' hoq chi naa wo' chik wesam taqe cho pan ti k'axik i tinamit wili, reh chi naa wo' chik kikahnik chi je' rukab' i pampeet, inki Dios.

¹²Re' QaJaaw Dios nim rajaawriik je' wili i xuq'or: Re' tinamit wili i ma' xta chik tinamit ma' xta chik chikop chupaam. Naa wo' chik ruwihiik ch'ahn chupaam reh chi re' taqe i aj cha'jen tentzun naa wo' chik kiye'em ruwa' i kitentzuun ar.

¹³Chi je' chupaam i tinamit wilkeeb' paraxchee', chupaam tinamit wilkeeb' Sefela, chupaam i tinamit wilkeeb' paruyuq'ul i Neguev, chupaam i ruyuq'ul Benjamín, chupaam i tinamit chi junsuut i Jerusaleem. Chupaam i tinamit wilkeeb' paruyuq'ul i Judá, naa wo' chik rilariik kiwach i aj cha'jen tentzun chi k'ahchi' kajlaam i kitentzuun.

¹⁴Xti korik chi naa wo' chik ruponiik i q'iij chi nuwach noq naa nuye'em i wotob'il chikinaah i aj Israel, je' wo' chikinaah i aj Judá, je' wo' rukab' i nuq'orom rib'iral keh.

¹⁵Noq naa ruponiik i q'iij, re' hin naawisam jinaj manlik xikin riih i David, re' i wihinaq cho chi reyil. Eh re' reh naa ruch'ikaniik reh i rukorkiil wach k'uxliis chupaam i tinamit, je' wo' hoq i rub'ehel chi b'anarik.

¹⁶Eh chupaam taqe i q'iij re' re' naa nuko'leem taqe i aj Judá, taqe i aj Jerusaleem. Eh ma' xta chik ti' naakilom wach, je' wili i nub'ihnaal naa kiq'orom. Ruum i QaJaaw Dios naaqeliik korik, inko'q taqe.

¹⁷Re' hin kinq'orik reh chi eliik naa ruwihiik xikin riih rumaam i David, re' i naa rokiik chi reyil chinaah i tinamit Israel.

¹⁸Eh ma' k'isiin taqe i k'amal b'eeh aj tiij naa ruwihiik chi kixilak, re' ruuk' taqe i riih rumaam i Leví, reh chi chu'nchel i q'iij naa kik'atam i mayiij chi nuwach. Naa kik'atam i kimayiij re' ruuk' i chi naq'wach, je' wo' hoq i tokoom mayiij inki.

¹⁹Eh re' QaJaaw Dios, je' wili i xuq'or reh i Jeremías:

²⁰Wila' wilik neerub'an ruyojariik wach nik' wach noq wilik q'iij, je' wo' hoq nik' wach noq wilik i chaq'ab', eh ma' re' ta chik paruorahiil nee ruyeew riib' i pan q'iij je' wo' chaq'ab'.

²¹Nee wo' naq rub'an chi nee nuyoj wach hin i nuyejaam wach ruuk' i David, ma' nee ta naq inwihik xikin riih naa rokiik chi reyil, je' rukab' noq xwihik cho chi reyil i reh. Eh ma' nee ta naq inooj eloq wach i nuyejaam wach kuuk' taqe i k'amal kib'eeh aj tiij, taqe i riih rumaam i Leví.

²²Re' taqe i riih rumaam i waj kamanoom David, riih rumaam taqe Leví k'amal kib'eeh aj tiij naa nuk'ihaaxb'isam taqe. Korehtaal kiponik chi je' kik'ihaal i ch'umiil, chi je' kik'ihaal i saniib' tub'ulkeeb' chi chii' i palaw, ma' awach ta naa rukuywiik kajaljiik, inki Dios.

²³Eh re' i QaJaaw Dios, je' wo' chik wili xuq'or reh i Jeremías:

²⁴¿Mi ma' nakoj rehtaal re' hat chi re' i tinamit inkiq'or chi xnuq'eb' taqe chi riij nuk'ux ka'ch'uq chi tinamit nusik'im cho kiwach, re' i Israel re' i Judá? Ruum aj re', re' keh ma' kiyeew ta chik rajaawriik i nutinamiit, ma' nkikoj ta chik chi nimlaj tinamit.

²⁵Re' hin i Dios je' wili i nuq'or: Nik' wach noq ma' nee ta nuyoj wach i saqum pan q'iij, i q'equm chaq'ab' nuyejaam cho wach reh chi naa ruwihiik kajaawriik pan taxaaj, je' wo' wach ak'al.

²⁶Je' wo' re' noq ma' nee ta nuq'eb' chi riij nuk'ux taqe i riih rumaam i Jacob, i riih rumaam David re' i waj kamanoom. Eh ma' naa ta wo' nukanaam kipa'ab'jiik i naa rub'aniik i taaq'anik chikinaah i riih rumaam Abraham, i riih rumaam Isaac, i riih rumaam Jacob. Ruum re' hin naa wo' chik nuketelaam kiwach, naa wesam taqe chaloq panti' k'axik, inki.