Read Poqomchi Jer 34 Bible Online

Jer 34 - Poqomchi bible

Jer 34

¹Noq re' i Nabucodonosor kireey i aj Babilonia ruch'ihil chu'nchel i ru soldado kichalik chupaam taqe i tinamit ruchopom naah k'ulik chik inki a'n iloq chi q'aq'inik chinaah i Jerusaleem, chikinaah i tinamit wilkeeb' chi junsuut. Re' i QaJaaw Dios je' wili xuq'or reh i Jeremías:

²Re' hin i Dios, aaDios taq i hat i aj Israel i nuq'or aweh i hat chi hiy cha q'or reh i Sedequías kireey i aj Judá chi je' wili: Chi re' hin naa nuye'em q'ab' chi re' i rutinamiit naa ruchopariik naah ruum i kireey i aj Babilonia, eh naa kikojom ruq'aq'al.

³Eh re' reh ma' naa ta ruko'leem riib' pan q'ab', naa ruchopariik, naa ruq'ahtesjiik pan q'ab' i reey re' re' naa rilom wach ruuk' naq'wach. Eh xti naa rub'anam k'ulwach ruuk' noq naa rub'anam ruk'utaaj ruuk' ar Babilonia.

⁴Eh ma' xata re', i re' Sedequías kireey i aj Judá, chab'iraj i ruq'or chawiij i QaJaaw Dios: Re' reh ma' naa ta rukimiik ruuk' q'aslaj ch'ihch'.

⁵Pan suq kiil k'uxliis la' naa rukimiik parupaat, eh naa kik'atam ink'ohnik laj iq'oom je' rukab' i xk'atarik cho chikinaah i rumaam rati't, re' i xi wihik cho chi reyil chi peet chuwach i reh. Re' reh naakoq'em naa rutiib'iik kik'ux chi riij, je' wili inakiq'orom: Q'e' wo' chik ti' i xqak'ul xkimik i qareey, inko'q taqe, inki i Dios.

⁶Eh re' Jeremías i jalal ruq'oral i Dios xponik ruq'or reh i Sedequías kireey i aj Judá ar Jerusaleem i xq'orarik reh ruum i Dios.

⁷Chupaam taqe q'iij re' re' k'ahchi' chik cho keeb' chi q'aq'inik i ru soldado i kireey i aj Babilonia, chinaah i tinamit Jerusaleem. Ach wo' re' i tinamit Laquis ruch'ihil i tinamit Azeca wilik ko'lemb'al kiib' chi korik wilkeeb' paruyuq'ul i Judá majaa' tanchalik i q'aq'inik chikinaah.

⁸Re' QaJaaw Dios xuq'oreej wo' chik i Jeremías noq re' reey Sedequías ruyejaam naq chik wach kuuk' chu'nchel i aj Jerusaleem chi naa koq'taam reje i kimoso kiminim pankowlaj kamanik.

⁹Xuq'or keh chi, chi kunchelaal naa koq'taam reje i kimoso winaq i kimoso ixoq re' ruuk' taqe i aj hebreos, reh chi ma' jino'q keh i re' ruuk' i kitinamiit naa rukahniik chi kimoso.

¹⁰Re' taqe i k'amal b'eeh taqe i tinamit xuk'ul kik'ux chi kunchelaal i xuq'or i reey, xkoq'taaj wo' naq reje taqe i kimoso ma' xkimin ta chik pankowlaj kamanik.

¹¹Xa re' la' ti' wo' chik xkik'raaj chi xkoq'taaj reje i kimoso xkichop wo' chik naah xkimin wo' chik pankowlaj kamanik.

¹²Ruum aj re', re' i QaJaaw Dios je' wili i xuq'or reh i Jeremías:

¹³Re' hin i Dios, aaDios taq i hat, hat taq i aj Israel wilik wo' naq i xnuyejaa' cho wach kuuk' taq aamaam awati't, noq xwesaj taqe chaloq Egipto, re' naq taqe i minooj pankowlaj kamanik, je' wili i xuq'or keh:

¹⁴Re' taq i hat xa waqiib' haab' naa rukamaniik taq awuuk' amoso aloq'om, eh paruwuuq haab' naa taq awoq'taam reje, kinki keh. Xa re' la' re' taq aamaam awati't xama' xkinimaj ta wo' hoq, eh xama' xinkaaj ta wo' kib'iram.

¹⁵Re' taq i hat yu'naak xajal wo' chik taq wach aana'ojb'al, eh xatoq'aa' naq taq chik rub'aan imponik chi nuwach i hin, ruum xawoq'taaj naq taq chik reje amoso xa aloq'om, re' ruuk' taq aatinamiit aj hebreo. Eh xatoq'aa' wo' naq taq rub'aan i xqayejaa' taq cho wach awuuk' chupaam i nupaat kinlooq'jik wii'.

¹⁶Chi riij i re' xajal wo' chik taq wach ana'ojb'al, xa yeq' taq panak'al i xnuq'or taq aweh xachop wo' chik taq naah amoso chi winaq, chi ixoq xa nim wo' chik taq pankowlaj kamanik.

¹⁷Ruum aj re' re' hin i Dios kinq'orik chi xama' xinanimaj ta wo' taq ruum xama' xawoq'taaj ta wo' taq reje amoso chi jumpech chi winaq chi ixoq re' ruuk' taq aatinamiit. Ruum aj re', re' hin naa nuye'em taq cha naah i q'aq'inik, i wi'jaleel, i runimaal yab'ilaal. Eh ruum i re' yohb'aal wach noq naa kiyo'jiik i tinamit sut i wach ak'al.

¹⁸Re' hin naa nuye'em taqe pan q'ab' i ti' k'axik re' re' chu'nchel i xiyeq'wik panak'al i xnuq'or naq keh chi naa kianam, eh ma' xkian taj i xqayejaa' wach kuuk'. Re' noq xkik'at i rak'uun wakax chi nuwach chi kimayiij, kiib' xkesaj, ki-ik'ik panyejaal i rutooq.

¹⁹Re' taqe i naa nuye'em panti' k'axik re' taqe i wili: Re' taqe i k'amal kib'eeh i aj Judá, i k'amal kib'eeh i aj Jerusaleem, i nimaq wach kikamaj, i k'amal kib'eeh i aj tiij. Eh chu'nchel i tinamit ki-ik'ik panyejaal i rutooq i mayiij.

²⁰Eh re' hin naa nuq'asam taqe pan kiq'ab' i nixowanik kiwach re' taqe i k'ahchi' rusi'wiik keh reh i kikanteesjiik. Eh re' i kiti'jolal naa rukahniik chi kiwa' taqe i chikop kirupinik pan taxaaj, eh chi kiwa' taqe i josq'laj chikop wilkeeb' pantaq ch'ahn.

²¹Eh re' i Sedequías kireey i aj Judá, ruch'ihil i nimaq wach kikamaj wilkeeb' ruuk', naa nuq'asam taqe pan kiq'ab' i nixowanik kiwach, re' i k'ahchi' rusik'wiik keh reh i kikanteesjiik. Eh naa nuq'asam taqe pan kiq'ab' taqe i ru soldado i kireey i aj Babilonia, re' taqe i koxkikanaa' pechik i q'aq'inik taq awuuk'.

²²Re' hin naa wo' chik nuye'em q'ab' keh chi naakichaliik chi q'aq'inik chinaah taq aatinamiit wili chi naa kichopom naah, chi naa kikojom ruq'aq'al. Re' i tinamit wilkeeb' paruyuq'ul i Judá naa nukanaam chi xan tz'irik chik kipaam, eh chi ma' jino'q chik i k'achareel chupaam, inki i QaJaaw Dios.