Read Poqomchi Jer 35 Bible Online

Jer 35 - Poqomchi bible

Jer 35

¹Re' i Jeremías je' wili xuq'or: Noq wilik chi reyil ar Judá i Joacim rak'uun i Josías, re' QaJaaw Dios je' wili xuq'or weh:

²Hiy aha' patim taqe wii' i aj rekabitas cha a'n ak'utaaj kuuk' chak'am taqe johtoq paruka'ch'iht i paat wilik chucheel i rupaat i Dios ar nee nayeew keh chi uuk'jik i k'ahlaj vino, inki.

³Eh re' hin xinooj wo' hoq chusik'ariik i Jaazanias rak'uun i wuch Jeremías jinaj riih Habasinías, haa' taqe i ruchaaq', taqe i rak'uun, chu'nchel i aj rekabitas.

⁴Eh xnuk'am taqe johtoq paruka'ch'iht jinaj i paat wilik chucheel i rupaat i QaJaaw Dios, re' i patim wii' taqe i rak'uun Igdalias. Re' paat wilik chucheel i kipaat, i kinimanik reh i Dios chi korik, eh chucheel i kipaat i kik'amwik b'eeh parupaat i Dios ar chinaah i paat wilik wii' Maasías rak'uun i Salum aj cha'joom chi chii' i puerta.

⁵Eh re' hin xnuyeew chikiwach chu'nchel i aj Recabitas taqe i kulk nujinaq taqe i chi k'ahlaj vino, eh je' wili i xnuq'or keh: Chawuk'ej taq i vino wili, kinki keh.

⁶Eh re' keh je' wili i xkiq'or: Re' hoj ma' jaruuj neenquk'ej qeh i k'ahlaj vino ruum re' Jonadab rak'uun i Recab re' i xikin qamaam ruq'orom cho qeh chi ma' jaruuj naa quk'em qeh i k'ahlaj vino i hoj, je' wo' taqe i qiih qamaam.

⁷Eh i xuq'or qeh chi ma' naa ta qayejaam qapaat, chi ma' xta na qatikim qeh, eh ni xata naa qatikim qa uuva. Eh ruq'orom cho qeh chi xa pankok' perpat itz'ihy kinaah, naa qak'achariik, chi je' re' najt taq nee ti k'acharik ayu' wach ak'al aha' i xa hat taq ik'al b'eeh, inki qeh.

⁸Chu'nchel i ruq'orom cho qeh i xikin qamaam Jonadab k'ahchi' qanimam ruum aj re' ma' jaruuj neenquk'ej qeh i k'ahlaj vino, ni xata re' i qehk'een, ni xata re' taqe i qak'uun, qixq'uun nee kiuk'inik reh.

⁹Ruum aj re', re' hoj ma' qayejaa' ta qapaat, eh ma' qatik ta qa uuva, eh ma' xta wo' hoq inqatik qeh panye'aab'.

¹⁰Xa pan itz'ihy naah paat la' k'acharik inqa'an, k'ahchi' qanimam chu'nchel i ruq'orom cho qeh i xikin qamaam Jonadab.

¹¹Xa re' la' re' Nabucodonosor kireey i aj Babilonia xuchop naah i qatinamiit. Ruum i re' xchalik qakeb'aa' qiib' ayu' hoj, hoj aj Jerusaleem chikiwach taqe i ki soldado i aj Babilonia, je' wo' chikiwach i ki soldado i aj Siria. Ruum taqe i re' ayu' k'acharik inqa a'n Jerusaleem yu'naak, inki taqe.

¹²Eh re' i QaJaaw Dios je' wili i xuq'or reh i Jeremías:

¹³Re' hin i Dios nim wajaawriik, ki Dios i aj Israel, i nuq'or aweh chi hiy kuuk' i aj Judá, kuuk' i aj Jerusaleem, cha q'or keh chi je' wili: ¿Mi ma' xkitijej keh re' i nunimjiik i xkian i tinamit re' re'? Ruum ma' xkinimaj taj i xnuq'or keh.

¹⁴Re' i xikin riih rumaam Jonadab rak'uun i Recab xkinimaj i xuq'or kahnoq chi ma' jaruuj naa kuk'em keh i k'ahlaj vino. Eh xama' xkuk'ej ta wo' keh chi jumpech, ruum xkinimaj i xuq'or kahnoq i xikin kimaam. Eh re' taq hat xata wo' jarpech nuq'orom taq aweh chi naa kin taq animam, xa re' la' xama' kinanimaj ta wo' taq, xama' na a'n ta wo' taq i nuq'or aweh.

¹⁵Re' hin kok' xilak xnutaq'aaj taqe chaloq i jalal nuq'oral taq chaxilak, reh chi xq'orarik taq aweh chi chakanaa' taq rub'aan i yiib' wach na'ojb'al. Eh chi ma' naa ta chik taq animam, aloq'em i tiyoox. Chi je' re' nanaq taq a'nam rusuqkiil i aak'achariik chupaam i ye'aab' nuq'orom cho rib'iral chi naa nuye'em taq aweh, re' wo' nuye'em cho keh taq aamaam awati't. Xa re' la' re' taq i hat xama' xanimaj ta wo' taq xama' xa a'n ta wo' taq i xnuq'or taq aweh.

¹⁶Eh re' taqe i xikin riih rumaam i Jonadab keh rak'uun i Recab k'ahchi' kinimam i xuq'or kahnoq i xikin kimaam. Raaj taq i hat aj Israel xama' kinanimaj ta wo' taq xama' nanimaj ta wo' taq i nuq'or aweh.

¹⁷Ruum aj re', re' hin i Dios nim wajaawriik, aaDios taq i hat aj Israel, naa nuye'em i runimaal ti' k'axik chikinaah i aj Judá, i aj Jerusaleem. Re' wo' nuq'orom rib'iral chi naa nuye'em chikinaah. Ruum re' hin xnuq'or naq keh chi naa kin kinimam, eh xama' xinkinimaj ta wo' hoq, xama' xkian ta wo' hoq i xnuq'or keh, inki weh Dios.

¹⁸Eh re' Jeremías je' wili i xuq'or keh i aj Recabitas: Re' QaJaaw Dios nim rajaawriik ki Dios i aj Israel je' wili xuq'or: Ruum chi xanimaj taq i rukanaam kahnoq ruq'orariik i xikin taq aamaam Jonadab xanimaj taq chu'nchel i ruk'uhb'aal xukanaa' kahnoq, xa a'n taq i xuq'or.

¹⁹Ruum aj re', re' hin i Dios nim wajaawriik, ki Dios i aj Israel je' wili xnuq'or: Juneliik naa ruwihiik jino'q panukamaj chi nuwach i re' ruuk' i xikin riih i Jonadab, rak'uun i Recab, inki.