Read Poqomchi Jer 37 Bible Online

Jer 37 - Poqomchi bible

Jer 37

¹Re' i Nabucodonosor i kireey i aj Babilonia xukoj chi reey ar Judá i Sedequías rak'uun i Josías chi jilow i Jeconias rak'uun i Joacim.

²Xa re' la' ni xata re' i Sedequías, ni xata re' taqe i raj kamanoom, ni xata re' taqe i tinamit xinimanik reh i ruk'uhb'aal i Dios xq'orarik keh ruum i Jeremías jalal ruq'oral i Dios.

³Re' i reey Sedequías xutaq'aaj reje i Jucal rak'uun i Selemías, ruch'ihil i k'amal b'eeh aj tiij Sofonías rub'ihnaal rak'uun i Maasías, ruuk' i Jeremías jalal ruq'oral i Dios je' wili taq i cha q'or reh: Chub'aan rutiij chiqiij chuwach i QaJaaw Dios tiko'q taq reh, inki.

⁴Eh chupaam i q'iij re' re' komajaa' inye'arik pantz'ilom i Jeremías, koruyee riib' chinb'ehik chi kixilak i tinamit.

⁵Eh chupaam i q'iij re' re' k'ulik naq chik inki a'n iloq i ru soldado i kireey aj Egipto. Eh noq xkinab'eej taqe i ki soldado i aj Babilonia i k'ahchi' naq keeb' chi q'aq'inik ruuk' i aj Jerusaleem xi elik reje ar.

⁶Chi riij i re', re' i QaJaaw Dios je' wo' chik wili i xuq'or reh i Jeremías jalal ruq'oral i reh:

⁷Re' hat je' wili i cha q'or reh i kireey i aj Judá: Re' i QaJaaw i qaDios i hoj, hoj aj Israel je' wili i xuq'or: Xuq'or chi naa apahqaam weh chib'ih naa rukahniik wii', cha q'or reh i reey re' re' chi re' taqe i ru soldado i kireey i aj Egipto xi chalik naq chi ruko'ljiik, naa wo' chik kisutiniik reje pan Egipto.

⁸Eh re' taqe i ki soldado i aj Babilonia naa wo' chik kichaliik chi q'aq'inik chinaah i tinamit Jerusaleem, naa kichopom naah, naa kikojom ruq'aq'al.

⁹Re' hin i Dios kinq'orik taq aweh chi maa jot' taq awiib' maa kapaaj taq chi re' i ki soldado i aj Babilonia ojik xkian chi jumpech ruum ma' je' ta re'.

¹⁰Atoob' ta nee wo' naq taq i na a'n keh i hat i ki soldado i aj Babilonia naa kib'aniik i q'aq'inik taq awuuk', xama' k'ih ta chik chi winaq i naa kikahniik, xanaa kiq'ojib'iik chupaam i kiye'aab' kimolom wii' kiib'. Re' taqe i re' naa wo' chik kik'achjik reje, re' chik i keh naakikojwiik ruq'aq'al aatinamiit, inki Dios.

¹¹Eh re' i ki soldado i aj Babilonia xi elik reje Jerusaleem, re' noq xkinab'eej chi re' taqe i ru soldado i kireey i aj Egipto k'ulik inki a'n iloq.

¹²Re' i Jeremías xelik reje pan tinamit Jerusaleem xooj naq chupaam i ruyuq'ul i Benjamín. Re' naq xraaj i reh chi xooj haa' chuch'aqariik i ye'aab' i xkik'ul chi kikooch ruch'ihil taqe i rutinamiit.

¹³Eh noq xooj k'oloq i Jeremías chi chii' i puerta wilik reje chi korkiil i ruyuq'ul i Benjamín, ar wilik jinaj i aj cha'joom kajaaw soldado Irías rub'ihnaal rak'uun i Selemías xuq'at i Jeremías je' wili xuq'or reh: Re' hat inawaaj ojik chi kixilak i aj Babilonia maje', inki reh.

¹⁴Eh re' Jeremías je' wili i xuq'or: Ma' korik taj inaq'or ma' k'ahchi' ta wojiik chi kixilak i aj Babilonia, inki. Eh re' Irías xama' xunimaj taj i xq'orarik reh, xuchop la' i Jeremías xuk'am reje chikiwach i nimaq wach kikamaj ruuk' i reey.

¹⁵Re' keh ma' k'isiin ta xchalik kik'aah chinaah i Jeremías noq xkilow wach xkiq'ojib'eej. Eh ar xkitz'ap parupaat i Jonatán, re' i aj tz'ihb', ruum re' i paat re' re' xkisutej chi kiye'aab' prexo.

¹⁶Eh re' noq re' i Jeremías xye'arik i koq chupaam i jul wilik chupaam i paat, eh najt xub'an ar.

¹⁷Re' i reey Sedequías xuq'or: chi naa ruk'amariik reje i Jeremías chupaam i paat i rub'an wii' i taaq'anik, noq wilik chik ar i Jeremías, re' reey xupahqaaj reh chi qeqmaal chi je' wili: ¿Mi wilik jino'q i ruk'uhb'aal i Dios chi wee hin? inki. Re' Jeremías je' wili i xuq'or: Hoo' wilik, re' chi naa aq'ahtesjiik chi ri'sil i rajaawriik i kireey i aj Babilonia, inki.

¹⁸Eh re' i Jeremías xupahqaaj reh i reey Sedequías chi je' wili: Raaj i hin ¿Chib'ih i mahk xnub'an chawach i hat chikiwach i awaj kamanoom, chikiwach i tinamit, ruum xinkimin pantz'ilom? inki.

¹⁹Eh ¿Aha' wilkeeb' taqe i jalal ruq'oral i Dios inki a'n kiib' re' i xiq'orik aweh i chi re' kireey i aj Babilonia ma' naa ta ruchaliik chi q'aq'inik cha naah i hat, chikinaah aatinamiit?

²⁰Qajaaw reey chab'iraj tii weh i naa nupahqaam aweh, inwaaj chi nee nayeew weh. Re' chi maayeew chik q'ab' chi nee kinooj kitz'ap parupaat i Jonatán ruum wi xinooj kitz'ap, ar neekinkimik, inki.

²¹Eh re' i reey Sedequías xuq'or chi cha'jaljoq chuwach reje i tz'ilom. Xuq'or chi rajlaal q'iij naa ruk'amariik reje rukaxlanwi'k re' ruuk' i xa pantaq b'eeh inloq'arik. Je' re' xkian reh korehtaal chik xk'uhlik i kaxlanwi'k. Je' aj re' noq xkahnik i Jeremías chuwach reje i tz'ilom.