Read Poqomchi Jer 39 Bible Online

Jer 39 - Poqomchi bible

Jer 39

¹Eh chupaam i ru lajeeb' poh reh i rub'elejeeb' haab' rokiik chi reyil i Sedequías ar Judá, re' i reey Nabucodonosor ruch'ihil taqe i ru soldado xi chalik chi q'aq'inik chinaah Jerusaleem, eh xkikotej riij.

²Eh parub'eleej q'iij reh i rukaaj poh chupaam i rujunlaaj haab'rokiik chi reyil i Sedequías, re' taqe i aj ixowaal xkiteh i koq jinaj i-ik'b'al chupaam i koraal tz'aq chi riij i tinamit, xi okik i koq pan tinamit.

³Eh chu'nchel i kitowik reh i kireey i aj Babilonia xi okik i koq, ar xiooj wih-oq chuwach i puerta wilik panyejaal, re' taqe re' je' wili i kib'ihnaal: Nergal-sarezer, Samgar-nebo, Sarsequim, k'amal kib'eeh taqe i kapuun, eh jinaj chik Nergal-sarezer re' taqe i re' nimaq wach kikamaj ruuk' i kireey i aj Babilonia.

⁴Eh noq xrilow chi je' re' i Sedequías kireey i aj Judá ruch'ihil taqe i ru soldado xkimol chi elik chaq'ab' reje chupaam i tinamit. Ar xi elik reje chupaam i b'eeh tikooj wii' i uhtz'ub' ma' najt ta ruuk' i ruye'aab' i reey xi elik reje chi chii' i puerta wilik panyejaal i tz'aq. Eh xkik'am qohoq i b'eeh wach k'ixkaab' i nik'ik wii' i nim ha' Jordán.

⁵Eh re' taqe i ki soldado i kireey i aj Babilonia xkitahqeej reje, korehtaal xponik kireq wach k'ixkaab' Jericó reey Sedequías. Eh ar xkichop xkik'am chuwach i reey Nabucodonosor wilik chupaam i ye'aab' Ribla wilik paruyuq'ul i Hamat, ar xuq'at i q'orik chinaah.

⁶Eh ar Ribla re' i kireey i aj Babilonia xutaq'aaj kik'amariik taqe i rak'uun rixq'uun i Sedequías, eh ti chuwach i reh xuyok' i kalaq taqe i rak'uun rixq'uun. Eh je' wo' re' i xub'an keh taqe i xa atoob' wach kik'ux wilkeeb' Judá.

⁷Eh re' reey Sedequías xresaj kab'chel i naq wach, b'ak'lik i q'ab' chi karena noq xk'amarik reje prexo pan tinamit Babilonia.

⁸Re' taqe i soldado kichalik Babilonia xkikoj ruq'aq'al i paat i rub'an wii' i taaq'anik i reey Sedequías. Eh xkikoj wo' ruq'aq'al i paat wilkeeb' pan tinamit, xkiq'eb' wach ak'al i tz'aq kotimaj wii' riij i tinamit Jerusaleem.

⁹Eh re' i Nabuzaradán k'amal kib'eeh i soldado kichalik Babilonia xuk'am taqe reje Babilonia nik' k'ihaal i koxikahnik Jerusaleem. Je' wo' taqe i xkiq'asaj naq kiib' chi kixilak i ki soldado i aj Babilonia eh xuk'am wo' taqe reje chu'nchel i tinamit koxikahnik naq.

¹⁰Xa re' wo' chik xukanaa' pantinamiit Judá i kok'neb'aa' ma' xta wilik keh. Eh chupaam i q'iij re' re' xuyeew kiye'aab' reh chi naa kitikim ki uuva.

¹¹Re' reey Nabucodonosor ko ar Babilonia xuq'or cho reh i Nabuzaradán k'amal kib'eeh soldado chi riij chib'ih i naa ruk'ulum i Jeremías, je' wili xuq'or:

¹²Re' hat naa achopwiik nah rucha'jaljiik i Jeremías, maa chih awuchej, naa aye'em reh chib'ih jariik i naa rupahqaam aweh, inki reh.

¹³Eh re' Nabuzaradán k'amal kib'eeh i soldado, ruch'ihil Nabusazbán, ruch'ihil i Nergal-sarezer, i k'amal kib'eeh taqe i kapuun nimaq wach kikamaj ruuk' i kireey i aj Babilonia.

¹⁴Xkesaj i Jeremías chupaam i paat wilik reje chuwach i tz'ilom. Eh re' i Gedalías xkikoj chi ilil reh, rak'uun Ahicam riih i Asaf, reh chi naa ruk'amariik reje parupaat. Re' i Jeremías xkahnik chi k'acharik chi kixilak i tinamit xi kahnik chupaam i tinamit re' re'.

¹⁵Noq re' i Jeremías ko tz'aplik chuwach reje i tz'ilom xq'rob'jik ruum i Dios, je' wili i xq'orarik reh:

¹⁶Re' hat cha q'or reh i Ebed-melec aj Etiopía. Je' wili i cha q'or reh. Re' i QaJaaw Dios nim rajaawriik i qaDios i hoj, hoj aj Israel, je' wili i ruq'or chawiij: Re' hin naa nuye'em i ti' k'axik chinaah i tinamit wili, ma' re' ta holohik i naa nuye'em chinaah. Eh noq naa ruk'ulariik i re', re' reh naa rilom ruuk' naq'wach.

¹⁷Xa re' la' re' reh naa nuko'leem, reh chi ma' nee ta nq'ehb'ik pan kiq'ab' i aj ixowaal re' re' q'e' inyo'jik kuum.

¹⁸Re' hin korik chi naa nuko'leem, reh chi ma' nee ta nkikansaj, naa nuko'leem riij i ruk'achariik ruum chi xuyeew ruk'ux wuuk', inki Dios tiko'q reh.