Read Poqomchi Jer 42 Bible Online

Jer 42 - Poqomchi bible

Jer 42

¹Eh chu'nchel i k'amal kib'eeh soldado haa' i Johanán, haa' rak'uun i Carea, haa' Jezanías rak'uun i Osaías, haa' chu'nchel i tinamit, chi nimaq chi kok' taq xiooj ruuk' i Jeremías jalal ruq'oral i Dios.

²Eh je' wili xkiq'or reh: Jinaj inaaqapahqaam aweh, xa re' la' maaq'or chi ma' nee ta na a'n. Re' chi chapahqaaj reh i aaDios panatiij chi nee qoh rutoob'eej i hoj i xama' hoj ta wo' chik k'ih xoj kahnik. Noq xub'an xiik' naq naah qak'ihaal, eh yu'naak xama' hoj ta chik k'ih je' rukab' i k'ahchi' awilom.

³Je' re' noq cha pahqaaj reh aaWaJaaw aaDios chi nee ruk'uhtaaj qeh i holohik b'eeh naa qak'amam, je' wo' hoq i naaqanam, inki taqe.

⁴Eh re' i Jeremías je' wili i xuq'or keh: Ma' xta reet naa nupahqaam reh i Dios taq inawaaj je' rukab' i xaq'or taq weh. Re' hin nee taq i nuq'or aweh chu'nchel i nee ruq'or weh i QaJaaw Dios, ma' xta chik i neenukanaa' chi ma' nee ta nuq'or, inki.

⁵Re' keh je' wili xkiq'or reh i Jeremías: Re' aaWaJaaw aaDios xti korik wach ruk'ux k'ahchi' rilwiik reh, neenye'wik qeh panti' k'axik wila' ma' xqa a'n i nee ruq'or aweh chi naa qa'nam.

⁶Atoob' ta nee ruk'ul qak'ux, atoob' ta ma' nee ruk'ul qak'ux i nee ruq'or qeh i QaJaaw Dios reh chi suq neenqohwih'ik. Re' i xqaq'or aweh chi naa apahqaam i rotob'il chiqiij, inki taqe.

⁷Eh lajeeb'-oq chik q'iij kiq'orom i re', re' i QaJaaw Dios xuq'oreej wo' hoq i Jeremías.

⁸Re' reh xuyuq'eej ruuk' i Johanán rak'uun i Carea, je' wo' taqe i k'amal kib'eeh i soldado kiooj panq'aq'inik, je' wo' chu'nchel i taqe i tinamit, chi nimaq chi kok' taq je' wili i xuq'or keh:

⁹Re' i QaJaaw qaDios i hoj, hoj aj Israel, re' i xaq'or taq weh chi naa nupahqaam reh chib'ih taq inawaaj, je' wili i xuq'or weh:

¹⁰Wila' xi kahnik chupaam i tinamit wili, re' hin naa wesam taqe korik, eh ma' naa ta nusacham kiwach naa la' nu ch'ikam taqe pan kiye'aab', ma' naa ta wesam taqe reje ayu'. Re' hin ti' wo' inwik'raaj taqe chi xnuyeew i ti' k'axik chikinaah.

¹¹Eh mankiyohleej chik i kireey i aj Babilonia re' i ma' k'isiin ta kiyo'jiik ruum. Manchalik chik kiyo'jiik, ruum re' hin naa nuwihiik kuuk' chi kiko'ljiik, re' hin naa wesaniik keh pan q'ab' i reey re' re'.

¹²Naa nuketelaam kiwach, eh naa wo' nuye'em paránima i reey chi naa ruketeljiik kiwach ruum, reh chi nee rukanaa' taqe chi k'acharik pan kitinamiit, inki.

¹³Eh wila' re' taq i hat ma' nawaaj taq k'acharik panatinamiit, wila' ma' xanimaj taq awajaaw aaDios, je' taq wili i neenaq'or:

¹⁴Re' hoj inqaaj ojik k'achareel Egipto aha' ma' naa ta qilom wach i q'aq'inik, ni xata naa qib'iram chi naa ruxuljiik i tuun rehtalil i q'aq'inik. Eh ma' nee ta qoh kimik ruum wi'jalel, tiko'q taq.

¹⁵Re' taq i hat koxat kahnik taq chi k'acharik Judá chab'iraj taq i ruq'or i QaJaaw Dios nim rajaawriik i qaDios i hoj, hoj aj Israel je' wili i ruq'or taq chawiij: Wila' re' keh xankotwaaj chik ojik k'achareel Egipto.

¹⁶Naa wo' kireqariik ar ruum i q'aq'inik, je' wo' ruum wi'jaleel, re' i ma' k'isiin ta kiyo'jiik ruum, re' wo' taqe i re' naa rukansanik keh ar.

¹⁷Eh chu'nchel i xankotwaaj chik ojik chi k'acharik Egipto ar wo' naa kikimiik ruum i q'aq'inik, ruum wi'jaleel, ruum yab'ilaal. Eh ma' jino'q chik i naa kikahniik chi k'achalkeeb', ma' jino'q naa ruko'leem riib' chuwach i runimaal ti' k'axik naa nuye'em chikinaah, inki.

¹⁸Ruum re' i QaJaaw Dios nim rajaawriik, qaDios i hoj, hoj aj Israel je' wili i ruq'or taq chawiij: Nik' wach noq xqop i nujosq'iil chikinaah i aj Jerusaleem, je' wo' re' noq naa ruqopiik i nujosq'iil chikinaah i keh wila' xiooj Egipto. Eh chu'nchel i tinamit ma' holohik ta naa kiq'oriik chikiij, ti yo'joq ruum inakik'ulum, eh ma' naa ta chik kilom wach i kitinamiit, inki.

¹⁹Eh re' taq i hat i koxat kahnik taq chi k'acharik Judá. Re' i QaJaaw Dios i ruq'or taq aweh chi ma' naa ta awojiik taq Egipto, chanab'eej taq chi korik ruum re' hin i nuq'or taq aweh yu'naak chib'ih i ruq'or.

²⁰Re' taq i hat runimaal mahk k'ahchi' taq kaat ruum xasutej taq chi riij aq'oral. Re' wo' naq taq i hat xat q'orik weh chi naa nub'anam nutiij chuwach i QaJaaw taq chawiij, je' wili taq i xaq'or weh: Chapahqaaj reh aaDios panatiij chi nee qohrutoob'eej, eh neenaq'or qeh i nee ruq'or aweh reh chi neenqa a'n, tiki taq.

²¹Eh re' hin xnuq'or taq chik aweh yu'naak i xuq'or weh QaJaaw Dios chi naa taq a'nam, xa re' la' re' taq i hat xama' xawaaj ta wo' taq a'nam.

²²Je' re' noq yu'naak chanab'eej taq chi korik chi ruum q'aq'inik, ruum wi'jaleel, ruum yab'ilaal, naa taq akimiik chupaam i tinamit taq naa awojiik k'achareel, inki Jeremías.