Read Poqomchi Jer 47 Bible Online

Jer 47 - Poqomchi bible

Jer 47

¹Re' i wili i ruq'oral i Dios xuq'or reh i Jeremías chikiij taqe i aj filisteo, noq komajaa' inchalik i kireey aj Egipto chub'anariik keh i aj Gaza.

²Re' QaJaaw Dios je' wili xuq'or: Pantz'eet reh i rookb'aal i q'iij naa kik'uliik iloq i ruk'ihaal soldado xa je' chik rukab' i choqik i rub'an i nim ha', naa kisacham wach i xata wo' jarseht chi tinamiit, ruch'ihil i k'achareel wilkeeb' chupaam. Eh naakik'erem kichii' ruum i ti' k'axik naakik'ulum.

³Eh noq naa kib'iram chi xa kitelikinik chik taqe i kikawayu i ruk'ihaal soldado, eh xampolojinik chik i kikareta ma' k'isiin ta naa kiyo'jiik taqe i tuutb'ees ajaab'ees naakiq'eb'em kahnoq i kak'uun kixq'uun.

⁴Ruum chupaam i q'iij re' re' naa rusachariik kiwach i aj filisteo, aj Tiro, aj Sidón, korehtaal inkuxik rusachariik kiwach intowik keh i aj filisteo, inki. Re' i QaJaaw Dios naa rusacham kiwach i aj filisteo, je' wo' chu'nchel i wilkeeb' chupaam i ye'aab' Kaftor.

⁵Eh re' taqe i aj Gaza naa kijoyom i rismaal kinaah ruum i ruti'kiil kik'ux, re' taqe i aj Ascalón naa kikahniik meem. Re' taq i hat i wilkaat taq wach k'ixkaab' ¿Kojaruuj taq i namay ruyok'ariik wach taq ati'jolal?

⁶Eh je' wili taq i naa aq'orom: QaJaaw Dios, re' hat xataaq'anik cho qakanteesjiik ruuk' q'aslaj ch'ihch'. Chayeew q'ab' chi neenkikanaa' qakanteesjiik ruuk' q'aslaj ch'ihch', chawesaj chi qanaah, tiko'q taq.

⁷Eh ¿nik' wach noq neeresaj taq cha naah wila' re' wo' i QaJaaw xtaaq'anik taq cho akanteesjiik kikanteesjiik i aj Ascalón, kikanteesjiik i wilkeeb' pan tz'a'laj yuuq' chi chii' i palaw?