Read Poqomchi Jer 48 Bible Online

Jer 48 - Poqomchi bible

Jer 48

¹Re' QaJaaw Dios nim rajaawriik, qaDios i hoj, hoj aj Israel je' wili i ruq'or chikiij i aj Moab: Q'e' ketel kiwach i aj Nebo ruum naa rusachariik kiwach, je' wo' taqe i aj Quiriataim naa ruchopariik kinaah naa kikahniik chi ma' xta chik kajaawriik naa rehtesjiik i kikowiil.

²Re' taqe i aj Moab ma' jaruuj chik ruye'ariik runimaal kiwach, ruum i Hesbón re' taqe i aj ixowaal kiyejaam chik wach chi naa kisacham wach i tinamit Moab. Eh je' wo' taq i hat aj Madmena naa wo' rusachariik taq awach ruuk' q'aq'inik.

³Eh wilik i naakik'erem cho kichii' ar Horonaim, je' wili i naa kiq'orom: Naa rusachariik wach i tinamit, inko'q taqe.

⁴Re' taqe i aj Moab naa rusachariik kiwach, eh noq naa ak'erem kichii' naa ruponiik ko ar Zoar.

⁵Eh naa koq'iim awach i naakijohtiik nah yuuq' Luhit. Eh naa koq'iim awach i naakiqajiik cho Horonaim, eh naa kib'iram i nixowanik kiwach.

⁶Awach i nee ruyeew riib' chuwach chumol chi elik, chuko'leej riib', je'-oq rukab' i k'iix wilik pan chiq yuuq' ink'amarik reje ruum i teew.

⁷Eh re' taq i hat aj Moab i xach'ikaa' taq ak'ux chinaah taq ab'ehomal naa wo' ruchopariik taq anaah. Re' taq atiyoox Quemos i kib'ih naa wo' kik'amariik reje pan tokoom tinamit, ruch'ihil taqe i k'amal kib'eeh aj tiij, taqe i k'amal b'eeh.

⁸Eh naa rusahchiik kiwach i wilkeeb' chupaam i ju'junseht chi tinamit, ma' junseht i tinamit naa ruko'leem riib'. Chi je' wilkeeb' wach k'ixkaab', chi je' wilkeeb' chinaah taqe yuuq' naa rusachariik kiwach, je' rukab' i xnuq'or.

⁹Eh wilik ta naq kixiik' i aj Moab nee naq inkimol chi elik. Eh jarseht i tinamit ruchopom naah naa rusachariik kiwach, ma' jino'q chik i k'achareel naa kikahniik ar, inki Dios.

¹⁰Eh je' wili i xuq'or: Re' hin naa nuye'em panti' k'axik awach i xakiib' ruk'ux i rub'an i nukamaj, je' wo' hoq awach ma' naa ta rajwaam kikantesjiik taqe i aj Moab.

¹¹Re' aj Moab eliik naq suq chee kik'achariik ma' jank'al ta naq kik'amarik reje pan tokoom tinamit. Xa je' naq kikab' i riis uuva xa jinaj wilik wii' ma' q'ahteesjik ta reje chupaam i tokoom ye'aab' reh, ruum i re' ma' inyoj ta naq wach i rusuqkiil, i ruk'ohonkiil.

¹²Re' QaJaaw Dios je' wili xuq'or xponik chik i q'iij chi naa nutaq'aam taqe chaloq i aj ixowaal reh chi naa kik'amariik reje. Naa rub'aan keh je' rukab' imb'aan reh i riis uuva noq inehteesjik chupaam i ye'aab' reh chupaam chik i tokoom ye'aab' inye'arik, eh re' naq i wilik wii' impaxjik.

¹³Eh naakik'uhtaam kik'ixb'ilaal i aj Moab, ruum i runimjiik i kitiyoox Quemos i b'ih, je' rukab' noq xkik'uhtaaj kik'ixb'ilaal i aj Israel ruum i runimjiik i kitiyoox Bet-el i b'ih re' naq i ch'iklik wii' kik'ux.

¹⁴Re' taqe i aj Moab ma' naa ta chik kiq'orom chi je' wili: Q'e' hoj kow wilik qajaawriik chi q'aq'inik, ma' ko'q ta chik taqe.

¹⁵Eh naa ruponiik i sachal kiwach i aj Moab, je' wo' hoq jarseht chi tinamit ruchopom naah. Eh re' taqe i k'ijolaq naa kik'amariik pankimik, inki Reey, i Dios nim rajaawriik.

¹⁶Re' i rusachariik kiwach, re' i ti' k'axik naakik'ulum i aj Moab xailook' chik ink'uloq chikinaah.

¹⁷Re' taq i hat wilkaat taq chi junsuut i Moab, aweht'al taq wach chaketelaaj taq wach ti oq'oq taq chi riij je' taq wili i cha q'or: Ti xsacharik wach i rajaawriik, eh xti holohik wo' naq, tiko'q taq.

¹⁸Re' taq i hat aj Dibón, na taq atzunaam awiib' wach chiq ak'al ruum naa rehtesjiik taq awajaawriik, ruum xi chalik wo' chi rusachariik taq awach i hat i xi chalik chi rusachariik kiwach i aj Moab. Eh naa rusachariik kiwach inako'leej taq wii' awiib'.

¹⁹Re' taq i hat aj Aroer naa taq awilom naa taq apab'aam awiib' chii' b'eeh, naa taq apahqaam keh i konaakikahniik chi k'achalkeeb' chib'ih i xk'ularik.

²⁰Eh noq naa ruk'ulariik naa taq awilom chi re' taqe i aj Moab, esamaj chik i kajaawriik, eh naa kiyo'jiik, naa taq awoq'iim chikiij. Naa taq aq'orom chi chii' i nim ha' Arnón, chi xsacharik kiwach i aj Moab, inki Dios.

²¹Eh xponik chik i ruq'ijil i ti' k'axik chi naa ruchaliik, chikinaah i aj wach k'ixkaab', chikinaah i aj Holón, i aj Jahoza, i aj Mefáat.

²²Eh naa wo' ruchaliik chikinaah i aj Dibón, chikinaah i aj Nebo, chikinaah i aj Bet-diblataim.

²³Eh chikinaah i aj Quiriataim, chikinaah i aj Bet-gamul, chikinaah i aj Bet-meón.

²⁴Naa wo' ruchaliik chikinaah i aj Queriot, chikinaah i aj Bosra, chikinaah i jarseht chi tinamit ruchopom naah i tinamit Moab chi je' wilkeeb' chi najt chi ma' najt.

²⁵Re' QaJaaw Dios je' wili xuq'or: Re' taqe i aj Moab naa kikahniik chi ma' xta chik kikowiil, chi ma' xta chik kajaawriik, inki.

²⁶Re' i aj Moab je' nanaa kixohk'resjiik ruum i Dios, je' na naakitolem kiib' pankixab'iik, eh chu'nchel i tinamit naa rukaqse'laniik keh.

²⁷Eh re' taq i hat aj Moab xanaa kaqse'laaj naq taqe i aj Israel, inawixowaaj naq taq kiwach, ma' holohik ta taq ti' q'orik chikiij, xakoj taqe chi ajileq'.

²⁸Re' taq i hat aj Moab eleen taq reje chupaam i tinamit, hiy taq cha sik' aa ye'aab' pantaq ruhopil ab'aj, je' rukab' inki a'n i paloma inooj kiyejaa' kisuuq' chi chii' taqe i ruhopil ab'aj.

²⁹Re' hoj qeht'al noq re' taqe i aj Moab q'e' inkinimb'isaj kiib', xa nimaq chik kiwach inki a'n kiib', chi xakow kiq'orik, chi xama' awach taj imponik panaq'kiwach.

³⁰Re' QaJaaw Dios reht'al wo' hoq chi xa q'e' nim kiwach inki a'n kiib', eh xa re' nimaq wach i q'orik inkiq'or, je' wo' hoq i josq'iil inki a'n

³¹Re' hin q'e' ti' naawik'raam, naawoq'iim chikiij chu'nchel i aj Moab, je' wo' chikiij i aj Qir-hares.

³²Re' taq i hat aj Sibma q'e' naawoq'iim taq chawiij ma' xata je' rukab' oq'ik xb'aan chikiij i aj Jezer, re' taq aa-uuva ma' naa ta chik ruwachiniik. Eh komponik wo' naq chi chii' i taqe palaw taq aa-uuva. Eh yu'naak naa rusachariik taq wach aa-uuva.

³³Ma' awach ta chik i naa ruk'erem chii' ruum rusuqkiil ruk'ux chupaam taqe i ye'aab' tikooj wii' i uhtz'ub' ar Moab. Re' i riis i uuva naa ruk'uhliik chupaam i molarik wii', ma' awach ta chik naa ruyeq'wiik paam i uuva pan yitz'b'al reh. Ma' awach ta chik naa rub'anam rutz'uuy.

³⁴Naa la' kik'erem kichii' ruum i ti' k'axik i aj Hesbón, korehtaal inib'irjik ar Eleale, ar Jahaza, ar Zoar, ar Horonaim, eh ar Eglat-selesiya. Eh naa kichiqiik taqe raasb'al ha' wilkeeb' Nimrim.

³⁵Re' QaJaaw Dios je' wili xuq'or: Re' hin naa nusacham kiwach i aj Moab, kijohtik chinaah taqe i yuuq' chu k'atarik insensia, chuk'atariik i chikop chi kimayiij chikiwach taqe i tiyoox, inki.

³⁶Ruum aj re', re' hin xtikinoq'ik chikiij i aj Moab, je' wo' chikiij taqe i aj Qir-hares. Re' taqe xuul narib'irjiik xa reh chik muq'anik, eh re' i kib'ehomal kimolom wach naa rusachariik wach chi jumpech.

³⁷Eh chi kunchelaal naa kijoyom i rismaal kinaah, ruum ruti'kiil kik'ux, naa kijoyom i kusinchii', naakiyok'om wach i kiq'ab', naa kikojom chikiij i q'as wach itz'ihy.

³⁸Re' QaJaaw Dios je' wili xuq'or: Re' taqe i aj Moab, naakik'erem cho kichii' chi oq'ik nah kipaat. Eh naa koq'iim xilak taq b'eeh, ruum re' hin naa nusacham kiwach, je' kipaxik ak'al ikom naa nub'anam taqe, inki.

³⁹Re' taqe i aj Moab naa koq'iim ruum i ti' naakik'ulum, xama' xta chik i naa kianam, naakik'uhtaam kik'ixb'ilaal, xama' xta chik kikamaj naa kikahniik, xama' xta chik kajaawriik naa kikahniik chikiwach taqe i wilkeeb' chi kijunsuut.

⁴⁰Ruum re' QaJaaw Dios je' wili xuq'or: Re' taqe i aj ixowaal naa kikutum kiib' chikinaah i aj Moab, xa je' chik rukab' noq i ruhe' paam i ruxiik' i xihk noq i ruchop i rutiib'.

⁴¹Re' taqe i ju'jun seht chi tinamit re' i nimaq paat inkiko'leej wii' kiib' naa kichopom naah i aj ixowaal. Eh re' taqe i kaj q'aq'ineel i aj Moab ma' naa kiyo'jiik, xa je' chik rukab' ixoq noq ink'ulik ruk'ux.

⁴²Re' taqe i aj Moab naa rusachariik wach i kitinamiit, i korehtaal inkahnik chi ma' xta chik wilik chupaam, ruum q'e' xkinimb'isaj kiib' chi nuwach.

⁴³Re' taqe i aj Moab naakisik'ariik kuum i aj ixowaal je' rukab' noq insik'arik i chikop kuum i aj puhb', xanik' neekiq'ehb'ik panjul, oon pan xirob'.

⁴⁴Re' taqe i chikop ma' imb'aan ta keh chi puhb' kiooj q'ehb'oq panjul, eh noq i kielik cho panjul kiooj q'ehb'oq pan xirob'. Je' wo' re' i naakik'ulum i aj Moab ma' naa ta rik'iik chikiij chi ma' naa rub'aan keh, ruum re' hin naa nuye'em i ti' k'axik chikinaah, inki Dios.

⁴⁵Eh wilik i naakimolom chi elik chi ma' xta chik kaansil naa naq rojiik kikeb'aam kiib' pan tinamit Hesbón, eh re' i tinamit re' re' naa ruqopariik ruq'aq'al, eh naa ruk'atam chu'nchel i ruyuq'ul i Moab, haa' taqe i patineel wilkeeb' ar ruum ma' kinimanik taj.

⁴⁶Hat taq aj Moab, i hat taq rutinamiit i Quemos q'e' taq ti' i naa ak'ulum ruum naa rusachariik taq awach. Q'e' wo' chik ti' ruum re' taq awak'uun awixq'uun naa kik'amariik reje pan tokoom tinamit.

⁴⁷Eh noq naa rojiik kuxoq naa wo' chik wesam taqe cho panti' k'axik i aj Moab. Re' wili korik ruum re' hin kiq'orik, inki Dios. Re' taqe i ti' k'axik wili naa ruye'em chee Dios chikinaah i aj Moab.