Read Poqomchi Jer 51 Bible Online

Jer 51 - Poqomchi bible

Jer 51

¹Re' QaJaaw Dios je' wili xuq'or: Re' hin naa nutaq'aam chaloq jinaj i naa rusachwiik wach i tinamit Babilonia, eh chu'nchel i kiye'aab' i aj Caldeo naa nusacham wach.

²Eh wilik i naa nutaq'aam chaloq i naa rukutwiik reje keh i aj Babilonia, je' rukab' noq inkutarik reje inaq'wach i trigo. Eh naa rukahniik chi ma' xta chik patineel chupaam i kitinamiit, k'ul naa kichaliik i naa rub'aniik keh, paruq'ijil i ti' k'axik.

³Eh naa nuq'orom chi naakiyejaam i kiflecha i kikansanik ruuk' flecha. Eh chi naa kikojom i kich'ihch' so' chikiij, chi ma' naa ta kiketelaam wach taqe i k'ijolaq ar Babilonia. Eh naa rukuxiik kisacham wach i ki soldado.

⁴Ar Babilonia pan kitinamiit taqe i aj Caldeo naa rukahniik chi tuch'lik i kiti'jolal taqe kamnaq.

⁵Atoob' ta re' taqe i aj Israel, taqe i aj Judá ximahkunik chi nuwach. Eh xkinujisaj chi mahk paam i tinamit. Re' hin i Dios nim wajaawriik, hin kiSantolaj Dios i aj Israel xama' nukanaam ta wo' taqe.

⁶Awach i nee ruyeew riib' chuwach eloq reje Babilonia, chi ko'leej riib' maruyeew riib' chi kimiik ruum i kimahk i keh. Ruum xponik chik i q'iij chi naa nuq'ajam wach keh i xkian i keh je' rukab' i ruk'ul chi keh.

⁷Re' i Babilonia chi weeh hin je' naq rukab' i kulk re' ruuk' i oro, xkamanik weh chi ruuk' nujosq'iil i ruxohk'risaj taqe i tinamit, je' naa k'ahlaj ha' i xuyeew keh chi uuk'jik ruuk' i re' xusach i kina'ojb'al.

⁸Re' taqe i aj Babilonia jumehq'iil naa rusachariik kiwach. Re' taq i hat naa taq awoq'iim chikiij, naa naq taq chik atoob'eem xa i lb'al naq reh mi konee nik'ik, i kiti'kiil, inki Dios.

⁹Eh re' taqe i aj Israel wilkeeb' poo ar je' wili i naa kiq'orom: Re' hoj xqatob'eej wo' naq taqe i aj Babilonia, xa re' la' ma' xta wo' chik i xraaj ruum re' i kimahk xponik chik kopan taxaaj i kochi juntar i suutz', taq taq chi qaju'junaal panqatinamiit.

¹⁰Re' i QaJaaw Dios xoj resaj korik ruuk' i ruk'ul chi qeh i hoj. Taq taq qaq'or rib'iral ar Sión i xub'an quuk' i QaJaaw Dios, inko'q taqe.

¹¹Re' i QaJaaw Dios i xraaj rusacham kiwach i aj Babilonia xuyeew pankikapeb'aal taqe i kireey i aj Media i rukapaaj i reh. Re' QaJaaw je' re' ruq'ajariik wach keh naa rub'anam ruum xkiyeew chi re' chi ma' re' i rupaat. Hat taq aj q'aq'ineel cha yejaa' taq aaflecha, je' wo' taq apulato ch'ihch'.

¹²Chayeew taq rehtalil chi naa taq asacham wach i tz'aq' kotimaj wii' riij i tinamit Babilonia, chakoj taq kiman i aj cha'joom cha yejaa' taq awiib' chub'aan, ruum re' i QaJaaw Dios naa rub'anam i ruyejaam cho wach chi naa rub'anam kuuk' i aj Babilonia.

¹³Eh re' taq i hat aj Babilonia ma' k'isiin wo' naq taqe i nim ha' wilkeeb' cha junsuut, ma' k'isiin wo' naq taq ab'ehomal. Xa re' la' yu'naak xponik chik i q'iij chi naa rusachariik taq awach.

¹⁴Re' i QaJaaw Dios nim rajaawriik xuq'or korik, je' wili i xuq'or: Re' hin naa nutaq'aam i ma' k'isa aj ixowaal taq cha naah, xa je' chik taqe k'ihaal nimaq chili'l, naa rusuqb'iik kik'ux ruum i naa kia'nam taq aweh, inki.

¹⁵Re' i QaJaaw Dios ruuk' i rajaawriik xuyejaa' i wach ak'al, ruuk' i runa'ojb'al xuyeew taqe paruye'aab' i wilkeeb' chupaam. Eh ruuk' runa'ojb'al xuhe' wach i taxaaj paruye'aab'.

¹⁶Noq inq'orik i reh inkitik'aa' cho choqik i suutz' kiye'wik chee jab' pan taxaaj. Eh i ruksaj chaloq i suutz' chi junsuut i wach ak'al, i rub'an taqe chaloq i ruch'aab' i kahoq noq k'ahchi' i jab'. Eh i resaj taqe chaloq i teew aha' wilik wii'.

¹⁷Xa re' la' re' taqe i tinamit ma' xta kina'ojb'al ma' inkik'am ta naah i runa'ojb'al i Dios, inkixuk'aa' kiib' chuwach taqe i tiyoox. Eh inkiq'asaj kiib' chub'aan i k'ixb'ilaal chi b'anarik, inkiyejaa' kitiyoox xama' xta wo' kajaawriik, xama' k'achalkeeb' ta wo' hoq.

¹⁸Xa ma' xta kitz'aaq, xa se'lb'al taqe, naa rusachariik kiwach ruum i QaJaaw, noq naa ruye'em chee ti' k'axik.

¹⁹Re' i ruDios chaloq i Jacob, ma' je' ta kikab' taqe i tiyoox re' re' ruum re' reh xtz'uhkrisanik chaloq chu'nchel i chib'ih jariik i wilik. Eh re' reh xsik'wik cho kiwach i aj Israel, chi xukoj taqe chi rutinamiit.

²⁰Re' i QaJaaw Dios je' wili i xuq'or: Re' taq i hat aj Babilonia xatkamanik taq weh chi ch'eyb'al, chi waj q'aq'ineel, chi xqasach kiwach i tinamit ruch'ihil i kireey.

²¹Re' taq i hat xatowik weh chub'aan keh i kikawayu reh q'aq'inik, je' wo' i kijohtik chi riij, je' wo' taqe i kikareta, je' wo' taqe i kiwihik chupaam.

²²Re' wo' taq i hat xatowik weh noq xnub'an keh i tinamit, chi winaq chi ixoq chi nimaq chi kok' taq, eh chi k'ijool, chi q'ahxoq.

²³Eh re' wo' taq i hat xatowik weh noq xnub'an keh i aj cha'jen tentzun, ruch'ihil i kitentzuun. Je' wo' noq xnub'an keh i aj arado ruch'ihil i kib'ooyax, je' wo' taqe i k'amal rub'eeh i tinamit, ruch'ihil taqe i kaj kamanoom, inki.

²⁴Re' i QaJaaw Dios je' wili i xuq'or keh i aj Israel: Re' taq i hat naa taq awilom ruuk' naq'awach noq naa nuq'ajam wach keh i aj Babilonia chu'nchel i aj Caldeo, chu'nchel i yiib' wach xkian reh i nutinamiit Sión.

²⁵Re' hin ma' imponik ta chi nuwach i na a'n taq i hat aj Babilonia ruum xa re' rusachariik kiwach i tinamit wilkeeb' wach ak'al taq i na a'n. Ruum aj re', re' naa nub'anam taq aweh i ti' k'axik naa taq wesam i runimaal awach naa ruqopariik ru i q'aaq' taq aatinamiit.

²⁶Naa ruyojib'iik chi jumpech ma' jino'q chik i rab'ajiil naa rokiik chi yejemb'al paat. Xti korik chi naa rukahniik chi xan tz'irik chik paam chi jumpech, inki QaJaaw Dios.

²⁷Re' taq i hat chajosaj taq itz'ihy rehtalil i q'aq'inik chinaah i tinamit Babilonia, eh chaxulej taq aatuun, reh chi nee kichalik i tinamit chub'anariik keh i tinamit re' re'. Eh chak'am cho chikinaah taqe i kireey i aj Ararat, i aj Mini, i aj Askenaz, chapab'aa' taq jino'q, k'amal rub'eeh i q'aq'inik, chak'am taq chaloq i ruk'ihaal kawáyu, xa je' chik ruk'ihaal nimaq chili'l.

²⁸Chaq'or taq keh i nimaq tinamit chi chaloq kian reh i tinamit Babilonia. Chaq'or taq keh i kireey i aj Media, i k'amal b'eeh, i ki itaaq'anik sut i wach ak'al, inki.

²⁹Re' i Jeremías je' wili i xuq'or: Re' taqe i aj q'aq'ineel xan k'uyu'jik chik ak'al naa kianam noq naa rojiik eloq wach i ruyejaam cho wach i QaJaaw re' chi naa rukanaam i tinamit Babilonia chi xan tz'irik chik paam.

³⁰Re' taqe i ki soldado i aj Babilonia naa kikanaam i q'aq'inik, naa kikahniik chupaam i kiye'aab' naa ruk'uhliik i kaansil, naa kikahniik chi xa je' chik taqe ixoq. Eh naa ruchopariik naah i kitinamiit, eh re' i kipaat naa rukojariik ruq'aq'al.

³¹Eh xa kitahqeem chik kiib' i aj taqareel noq naa rojiik kiq'orom reh i kireey i aj Babilonia chi xchoparik chik naah i rutinamiit.

³²Re' taqe i aj ixowaal naakitz'apam paam i b'eeh chu'nchel naa kikojom ruq'aq'al imb'aan wii' i ko'linik iib'. Eh re' i ki soldado i aj Babilonia ma' k'isiin ta naa kiyo'jiik.

³³Ruum re' i QaJaaw Dios nim rajaawriik, ki Dios i aj Israel je' wili i xuq'or: Re' i tinamit Babilonia xailook' chik insacharik wach, je' rukab' i trigo k'achi' ruq'anb'iik i wach xailook' chik inq'ojarik paam chi chee', inki.

³⁴Re' taqe i aj Sión je' wili i naa kiq'orom: Re' i Nabucodonosor kireey i aj Babilonia xusachib'eej wach i chib'ih qeh, xukanaa' chi xa je' jino'q pulato ma' xta paam. Eh re' chik i reh xinujisaj riib', je' rukab' noq i runujisaj riib' i qaman josq'laj chikop. Eh xoj resaj reje panqatinamiit.

³⁵Yu'naak aj re' naa kitojom wach i tinamit Babilonia ruum re' i kireey xkesaj i qajaawriik, eh ruum chi xkian ti' k'axik qeh. Eh re' kaansanik xub'an qeh naa kitojom wach chu'nchel i aj Caldeo, inko'q taqe.

³⁶Re' i QaJaaw Dios je' wili xuq'or keh i aj Israel: Re' hin naa nuq'ajam wach keh i ki-ixowanik taq awach i xkian taq aweh. Eh naa nuchiqsam taqe i raasb'al ha', taqe i nim ha' wilkeeb' paruyuq'ul i Babilonia.

³⁷Naa ruyojib'iik, naa rusachariik wach, naa rukahniik chi kiye'aab' xojb', ma' awach ta chik i naa rupatiniik chupaam. Eh ma' k'isiin ta naa kiyo'jiik awach i naa kilwiik reh.

³⁸Re' taqe i aj Babilonia naakik'erem kichii' ruum i ti' naakik'ulum, xa je' chik rukab' noq i ruk'er chii' i nimlaj b'ahlam, oon rak'uun b'ahlam.

³⁹Eh noq naakitz'ab'iik je' naa k'ah laj ha' i naa nuye'em keh chi uuk'jik, je' na naakixohk'riik, naa ruyojiik kina'ojb'al, je' na naakiqajik chi suq laj wirik, ma' jaruuj chik naa runa'lojiik keh.

⁴⁰Re' hin naa nukansam taqe je' rukab' noq kinkanteesjik, taqe imas tentzun, taqe ixoq kaprax, i imas kaprax noq kik'amarik reje pankanteesb'al, inki i QaJaaw Dios.

⁴¹Re' i kitinamiit i aj Babilonia naa rusachariik wach, re' naq i xti wilik rib'iral chupaam chu'nchel i tinamit wach ak'al chi xiik' naah nimaal wach. Yu'naak naa ruchopariik naah, naa kiyo'jiik i aj pan nimaq tinamit ruum i naa ruk'ulum.

⁴²Re' taqe i aj Babilonia xa je' chik kikab' i rub'ohl i palaw noq naa ruchaliik i aj ixowaal chikinaah, naa rusachariik kiwach.

⁴³Re' taqe i ju'junseht chirutinamiit naa kikahniik chi xan tz'irik chik paam. Eh ma' naa ta chik ruwihiik patineel chupaam, ma' awach ta chik i naa rik'iik ar.

⁴⁴Re' hin naa rojiik nuq'uchum chupaam i rupaat i tiyoox Bel rub'ihnaal, nik' nimaal i xkik'am reje Babilonia. Re' taqe i tokoom tinamit ma' naa ta chik kichaliik ruuk', eh naa ruq'ehb'iik wach ak'al i tz'aq kotimaj wii' riij.

⁴⁵Re' taq i hat nutinamiit eleen taq cho chi kixilak chako'leej taq riij aak'achariik chuwach i runimaal i nujosq'iil naa nuye'em cho chikinaah.

⁴⁶Maa yohb'isaj taq awiib' ruum i ti' k'axik naa taq ab'iram rib'iral chupaam i tinamit eh chupaam i ju'jun chi haab' xa reh reh wach i ti' k'axik naa rib'irjiik, naa rib'irjiik chi k'ahchi' ikaansanik chupaam i tinamit. Eh naa kitoq'aam peleto chikiwach i ajaab'ees.

⁴⁷Eh ponik reh i q'iij chi naa nuye'em panti' k'axik i tinamit Babilonia je' wo' taqe i kitiyoox. Re' taqe i kitinamiit naa kikahniik chi ma' xta chik kajaawriik, aha' ta chik ma' naa rukahniik tuuch' i kiti'jolal.

⁴⁸Re' taqe i wilkeeb' pan taxaaj i wilkeeb' wach ak'al ma' k'isiin ta naa rusuqb'iik kik'ux noq naakilom chi naa rusachariik wach i tinamit Babilonia. Re' noq naa kichaliik pantz'eet reh i rookb'aal i q'iij i naa rusachwiik wach.

⁴⁹Re' i tinamit Babilonia naa rusachariik wach ruum i kikanteesjiik i aj Israel xub'an, ruum ikaansanik xub'an chi junsuut i wach ak'al, inki QaJaaw Dios.

⁵⁰Re' taq i hat naa taq ako'leem awiib' chuwach i kimik, naa taq amolom chi elik, ma' aha' ta chik taq nee tipahiik. Eh i ruk'ul chi naa taq akapaam i QaJaaw Dios, eh chi naa ruk'uliik taq panak'ux i tinamit Jerusaleem.

⁵¹Re' hoj q'e' qoh k'ixik noq qohkib'aj. Eh xan qatz'ap chik i qawach ruum qak'ixiik, ruum re' taqe i tokoom tinamit xi okik chupaam i Santolaj ye'aab' wilik parupaat i qaDios, tiko'q taq.

⁵²Re' i QaJaaw Dios je' wili i xuq'or: Re' hin xailook' i nuyeew taqe panti' k'axik i aj Babilonia, je' wo' taqe i kitiyoox. Eh chupaam i kitinamiit naakik'erem kichii' taqe i naa kiq'ojib'iik.

⁵³Atoob' ta naq inche neenjohtik kopan taxaaj chi keb'anik riib' i tinamit Babilonia. Re' hin xa nee wo' i nutaq'aaj reje i aj ixowaal reh chi ar neenooj sacharoq wach, inki Dios.

⁵⁴Naa rib'irjiik noq re' taqe i aj Babilonia naakik'erem kichii' chi oq'ik, ruum i ti' naakik'ulum, ruum chi naa rusachariik wach i kiye'aab' i aj Caldeo.

⁵⁵Ruum re' i QaJaaw Dios naa rusacham kiwach i aj Babilonia, naa resam i runimaal kiwach. Re' taqe i aj ixowaal yohb'aal wach i kijosq'iil noq naa ruk'uliik iloq chikinaah, xa je' chik rukab' i rub'ohl i palaw.

⁵⁶Re' keh naa kisacham wach i aj Babilonia, naa ruchopariik i ki soldado kow kiib'. Eh re' i kiflecha naa wo' kitoqib'eem, ruum re' i QaJaaw naa ruye'em taqe chi tojariik i kimahk je' rukab' i ruk'ul chi keh.

⁵⁷Re' i Reey i QaJaaw Dios nim rajaawriik, je' wili i ruq'or: Re' hin naa nuxohk'risam taqe i k'amal kib'eeh i aj Babilonia, taqe i wilik kina'ojb'al, taqe i k'amal rub'eeh tinamit, taqe i nimaq wach kikamaj, taqe i ki soldado. Eh naa nuqasam i kiwiriik ma' jaruuj chik naakik'raam kiib'.

⁵⁸Re' hin i Dios nim wajaawriik, i nuq'or chi re' i nim wach tz'aq kotimaj wii' riij i tinamit Babilonia naakich'ahaam wach ak'al i aj ixowaal. Eh re' taqe nimaq taq puerta naa ruqopariik ruq'aq'al, naa rojiik wach ak'al i kamanik kianam i k'ihset chi tinamit, xa q'aaq' naa rusachwiik wach kikamaj, inki.

⁵⁹Eh kijib'-oq chik haab' rokiik chi reyil i Sedequías Judá, re' i Jeremías jalal ruq'oral i Dios xuyeew jinaj i taqarik reh i Seraías rak'uun i Nerias riih i Maasías. Re' i Seraías ruch'ihil i reey Sedequías noq xooj Babilonia, re' reh xyej-anik reh aha' inwirik i reey.

⁶⁰Re' i Jeremías rutz'ihb'aam chik chupaam i jumb'oht chi huuj taqe i xq'orarik chi riij i tinamit Babilonia. Re' chi naa ruchaliik i runimaal ti' k'axik chinaah, re' chu'nchel i tz'ihb'amaj chi naa ruk'ulum.

⁶¹Re' i Jeremías je' wili xuq'or reje reh i Serarías: Noq naa aponiik Babilonia kow chawil wach chu'nchel taqe i q'orik tz'ihb'amaj chupaam i jumb'oht chi huuj.

⁶²Eh je' wili i aatiij naa a'nam: QaJaaw Dios re' hat xat q'orik chi naa asacham wach i tinamit wili, reh chi ma' naa ta chik rub'aan patinik chupaam, ni xata naq chik chikop i naa ruwihiik chupaam, ruum re' hat naa akanaam chi xan tz'irik chik paam chi jumpech, tiko'q.

⁶³Eh re' jumb'oht chi huuj wili neenab'ak' chuwach jino'q ab'aj neenakut qohoq chupaam i nim ha' Éufrates.

⁶⁴Eh je' wili i neenaq'or: Je' aj wili noq naa rumuhqiik naah i tinamit Babilonia, ma' jaruuj chik naa reliik chupaam i ti' k'axik naa ruye'ariik chinaah ruum i Dios, tiko'q, inki. Ayu' xkuxik wach i ruq'oral i Jeremías.