Read Poqomchi Jer 7 Bible Online

Jer 7 - Poqomchi bible

Jer 7

¹Re' QaJaaw Dios je' wili i xuq'or reh i Jeremías:

²Re' hat chapab'aa' awiib' panookb'al reh i nupaat, cha q'or rib'iral ar i nuk'uhb'aal wili, je' wili i neenaq'or: Hat taq aj Judá chawunchelaal taq i ti okik i koq chi chii' i ookb'al wili chab'iraj taq i k'uhb'aal wili:

³Re' i QaJaaw min rajaawriik re' qaDios i hoj aj Israel je' wili i xuq'or: Chayejaa' taq aak'achariik, re' chik i holohik taq cha a'n, reh chi neenuyeew q'ab' taq aweh chi nee taq ti k'acharik chupaam i ye'aab' wili.

⁴Manimaj taq i xachukuj q'orik noq neenkiq'or taq aweh chi je' wili: Ayu' wilik i rupaat i QaJaaw Dios, ayu' wilik i rupaat i QaJaaw Dios, ma' xta taq neenak'ul, tiuchjoq taq.

⁵Eh wila' xayejaa' taq ak'achariik, wila' re' chik holohik taq xa a'n, wila' re' i korik taq xa a'n ruuk' aawas achaaq'.

⁶Wila' ma' xaq'uch taq chik i chib'ih keh i tokoom tinamit, taqe i ma' xta kituut kajaaw, taqe i kamnaq kib'ahiil. Eh wila' ma' xa kansaj taq chik taqe i ma' xta kimahk chupaam i ye'aab' wili, eh wila' ma' xaloq'ej chik taqe i tiyoox, re' ink'amwik chaloq i ti' k'axik taq cha naah,

⁷re' hin nee taq tinuyeew chi k'acharik nik'-oq najtiil chupaam i ye'aab' wili, re' i nuye'em cho keh chi jumpech taq aamaam awati't.

⁸Re' taq i hat inach'ikaa' taq ak'ux ruuk' i xachukuj q'orik xama' xta ruk'am taq chaaweh.

⁹Re' taq i hat i na a'n taq i leq', ikaansanik, inach'uwa'risaj taq wach i aakaxáro, inaq'or taq i korik i na a'n awiib'. Eh inak'at taq insensia chuwach i tiyoox Baal, i nayeew taq kiloq'il taqe i tiyoox, ma' ruk'ul ta taq cha weh.

¹⁰Eh chi riij i re' ti chalik wo' taq chik ayu' chi nuwach chupaam i nupaat wili inloqjiik wii' i nub'ihnaal, je' wili taq inaq'or: Yu'naak hoj chik ko'limaj tiki taq. Noq ti sutinik taq reje inatoq'aa' wo' taq chik rub'aan i yiib' wach na'hojb'al.

¹¹¿Mi nakapaaj taq re' hat chi re' i nupaat inlooq'jik wii' i nub'ihnaal xa je' kiye'aab' ajileq'? Re' hin inwilow chu'nchel i yiib' wach taq i na a'n.

¹²Re' taq i hat hiy taq chupaam i nupaat ar Silo, re' tinamit re' re' peet wo' naq xnuyeew kiloq'il ruuk' i nub'ihnaal. Re' taq i hat nee taq inakoj rehtaal chib'ih i ti' k'axik xnuyeew cho chikinaah ruum i kimahk i nutinamiit Israel.

¹³Re' hin k'ipech wo' naq xatnuq'il taq ruuk' aana'ojb'al, eh xama' xanimaj ta wo' taq, noq xat nuyuq'eej taq xama' xinab'iraj ta wo' taq.

¹⁴Ruum aj re' nik' wach noq xnusach wach i nuSantolaj ye'aab' xwihik cho Silo, je' wo' chik re' noq naa nusacham wach i paat wilik ayu', re' inlooq'jik wii' i nub'ihnaal. Re' i xnuyeew taq aweh i inach'ikaa' naq taq wii' ak'ux, xnuyeew wo' cho keh taq i aamaam awati't.

¹⁵Re' hin naa taq kaat wesam reje chi nuwach, je' rukab' noq xwesaj taqe reje chi nuwach i ma' tokoom ta taq awuuk', re' taqe i riih rumaam Efraín, inki taq aweh i QaJaaw Dios.

¹⁶Eh je' wo' chik wili xuq'or: Re' hat Jeremías maa a'n chik atiij chikiij i tinamit wili, maa pahqaaj chik weh chi neenutoob'eej taqe, eh chi neenuketelaaj kiwach ruum re' hin xama' nee ta wo' chik tib'iraj.

¹⁷Ruum re' keh xa re' wo' hoq i ma' holohik ta laj na'ojb'al inki a'n chupaam i tinamit Judá. Eh je' wo' hoq xilak taq b'eeh reh i Jerusaleem.

¹⁸Re' taqe i kak'uun kisik'wik i sii', eh re' taqe ajaab'ees kiluk'wik i q'aaq, eh re' taqe i ehk'eenb'ees kiyej-anik reh i kaxlanwi'k inkiyeew chi mayiij chuwach ixoq tiyoox inkiq'or chi re' reh i reey pan taxaaj. Eh inkiyeew i riis uuva chikiwach i tokoom dios, ruuk' i re' inkiyeew nujosq'iil.

¹⁹Noq kinkiq'eet wachej hin xa re' wo' keh inkiq'et wachej kiib' ruum xa re' wo' keh inkik'uhtaaj kik'ixb'ilaal.

²⁰Ruum aj re', re' hin i Dios korik i nuq'or taq aweh chi naa nuye'em chu'nchel i nujosq'iil chinaah i ye'aab' wili, chikinaah i patineel wilkeeb' ayu', chikinaah i chikop. Eh chikinaah i chee' kiwachinik, re' taqe i wach tik nakik'ahtiik ruuk' q'aaq' ma' jaruuj chik naa ruchuhpiik.

²¹Re' i QaJaaw, i qaDios i hoj, hoj aj Israel nim rajaawriik, je' wili i xuq'or keh i rutinamiit: Chayeew taq chu'nchel k'atoj chikop chi mayiij xanik' pa' k'ihaal taq inawaaj, nee wo' rub'an chi nee taq inak'ux aweh i kitib'kaal.

²²Xa re' la' re' hin noq xwesaj taqe chaloq aamaam awati't Egipto, xama' xta wo' xnuq'or keh, ma' xnumin ta taqe chupaam chi naa kiye'em i k'atoj mayiij, eh chi naa kik'atam i chikop chi kimayiij.

²³Re' i xnuq'or keh i hin xa re' wo' naq chi nakiin kinimam. Reh naq chi xin kahnik chi hin ki Dios, eh chi re' keh xi kahnik naq chi nutinamiit taqe, je' naq re' xnuq'or keh chi naa kianaam reh naq chi holohik naakeliik.

²⁴Xa re' la' re' keh xama' xinkinimaj ta wo' hoq, xama' xkinimaj ta wo' i xnuq'or keh, xkikowb'isaj la' i kinaah. Re' chik xkian i yiib' wach na'ojb'al i nelik cho pankanima, ma' xinkinimaj taj xin kiq'eb' chi riij kik'ux.

²⁵Eh xa re' wo' noq xwesaj taqe chaloq aamaam awati't Egipto nutik'aam chaloq chi xariij chik riib' xnutaq'aaj taq cho chak'uhb'aljiik taqe jalal nuq'oral xnutaq'aaj taq cha weh chu'nchel i waj kamanoom.

²⁶Re' taq i hat xama' xinanimaj ta wo' taq, ma' xanimaj ta taq i xnuq'or. Q'e' wo' chik xakowb'isaj taq anaah, ma' xata je' rukab' xkian taq aamaam awati't.

²⁷Eh je' wili xuq'or weh: Re' hat Jeremías cha q'or keh chu'nchel wili, atoob' ta ma' neetikib'iraj. Kow cha k'er aachii' chi kiq'orob'jiik atoob' ta ma' nee ta tikich'aqweej.

²⁸Je' wili cha q'or keh: Re' i tinamit wili ma' nkinimaj taj i QaJaaw i qaDios, ma' nkaaj ta chi neen q'orarik keh chi neenkikanaa' i yiib' wach na'ojb'al, ma' korik ta chik kiq'orik, tiko'q keh, inki.

²⁹Hat taq aj Jerusaleem, chayok' taq i rismaal anaah chayeew taq reje wulu', cha k'er taq aachii' chi oq'ik chinaah taqe i yuuq', ruum re' i QaJaaw Dios ruum i rujosq'iil xat ruq'eb' taq, chi riij ruk'ux.

³⁰Re' QaJaaw Dios je' wili i xuq'or: Re' taqe i tinamit wilkeeb' Judá wilik i xkian ma' suq ta xub'an weh, xkiyeew i tiyoox chupaam i nupaat re' naq i kinkiloq'ej wii' xkich'uwa'risaj paam.

³¹Re' keh xkiyejaa' i artaal Tofet rub'ihnaal ar wach k'ixkaab' Ben-hinom ar xkik'at taqe i kak'uun kixq'uun chi mayiij chikiwach i tiyoox. Re' hin ma' xnuq'or ta keh chi je' re' i naa kianam, ni xata naq xik'ik panukapeb'aal.

³²Ruum aj re' naa ruponiik i q'iij chi re' ye'aab' re' re' ma' re' ta chik Tofet ni xata Ben-hinom naa rubíhnaam, ye'aab' reh kanteesb'al iib', la' chik i naa rubíhnaam, ar chik Tofet naakimuq'aam taqe i kamnaq ruum ma' naa ta chik rumanlojiik i ye'aab' kimuhqik wii'.

³³Re' kiti'jolal taqe i tinamit wili naa rukahniik chi kiwa' taqe i k'uch chi kiwa' taqe i josq'laj chikop, atoob' ta naq nee kiyohb'esjik chinaah ma' jaruuj chik naakikanaam ruk'uxariik.

³⁴Re' hin naa nusacham kiwach pan tinamit Judá, pantaq xilak b'eeh Jerusaleem, ma' naa ta chik rib'irjiik i tz'uuy reh ninq'iij, reh suq kiil k'uxliis, tz'uuy reh kaxáro. Ruum re' i tinamit wili naa rukahniik chi xa je' chik ye'aab' chiq yuuq' ma' xta chik i naa ruwihiik chupaam, inki.