Read Poqomchi Hos 11 Bible Online

Hos 11 - Poqomchi bible

Hos 11

¹Re' i QaJaaw Dios je' wili i xuq'or: Noq xkitoq'aa' cho nimanik i aj Israel xnuk'ax taqe. Eh xnukoj taqe chi wak'uun wixq'uun xwesaj taqe chaloq i Egipto.

²Eh noq q'e' naq nuk'ax taqe, xkesaj iloq kiib' chi wiij. Eh chikiwach chik i ma' re' ta taqe i dios inkik'at i kimayiij, inkik'at i insensia chikiwach taqe i tiyoox.

³Atoob' ta je' re' inki a'n re' hin xnuk'am kib'eeh i aj Efraín eh xnuchop chi kiq'ab', eh xnuk'uhtaaj cho keh i nimanik. Re' keh xama' xkireq ta wo' chi riij chi re' hin xincha'jinik cho keh.

⁴Re' hin ruuk' q'unil, ruuk' k'axooj xnuk'am taqe cho wuuk', eh xwisaj i ahl laj ihq wilik naq chikinaah, xnuyeew wo' kiwa' kihaa' parub'ehel.

⁵Xa re' la' re' keh ma' xinkaaj ta chik kiin kinimam, ruum i re', re' chik taqe i aj Asiria naa rub'aniik i kowlaj taaq'anik chikinaah, je' rukab' i xkik'ul chaloq Egipto.

⁶Eh naa rub'aan ikaansanik ruuk' i q'aslaj ch'ihch' pan kitinamiit, eh naa rusachariik kiwach aha' naq inkiko'leej kiib', ruum xa chi kutkeel inkiyejaa' wach chib'ih inki a'n

⁷Re' i nutinamiit xama' kinkaaj ta wo' kinimam yu'naak, inkik'er wo' naq kichii' chi re' hin i Dios, xa re' la' ma' jino'q inye'wik runimaal nuwach.

⁸¿Chib'ih reet noq nee taq tinukanaa' i hat aj Efraín? ¿Chib'ih reet noq nee taq tinukanaa' pan kiq'ab' i ki-ixowanik taq awach i hat taq aj Israel? ¿Mi ruk'ul re' chi nee taq i nusach awach i hat, je' rukab' noq xnusach kiwach i aj Adma, i aj Zeeboim? Re' wánima xan yot'ik chik, ruum i nuketelaaj taq awach.

⁹Eh ma' naa ta nuye'em i nujosq'iil taq cha naah, ma' naa ta nusacham taq awach hat aj Efraín, ruum re' hin, hin Dios ma' hin ta xa winaq. Re' hin i Dios wilik nu Sahtohiil wilkiin taq panaxilak, ma' xin chalik ta chi rusachariik taq awach.

¹⁰Re' hin naa nuk'erem nuchii' je' rukab' i rub'an i kaq b'ahlam chi kiyohb'eesjiik i ki-ixowanik wach i nutinamiit. Eh re' keh xakib'arb'otik chik ruum i kiyo'jiik noq naa kichaliik chi korkiil i rookb'aal q'iij,

¹¹Re' keh naakeliik chaloq Egipto chi jumehq'iil je' kirupinik chaloq i tz'ikin. Eh je' kirupinik chaloq paloma noq naakeliik chaloq Asiria. Re' hin naa wo' chik nuye'em taqe chi patinik pan kiye'aab'.

¹²Eh re' taqe i aj Efraín xa re' i chukuj q'orik inki a'n chi nuwach. Eh re' taqe i aj Israel xa re' i nujot'ariik inki a'n Re' taqe i aj Judá xin kiq'eb' chi riij kik'ux i hin, re' chik taqe i xa tiyoox xkini imaj, inki i Dios.