Read Poqomchi Hos 12 Bible Online

Hos 12 - Poqomchi bible

Hos 12

¹Re' taqe i aj Efraín re' teew inchalik pareelb'aal q'iij inye'wik kikowiil rajlaal i q'iij. Eh inkitiq naah i chukuj q'orik, i ti' k'axik inki a'n reh i kas kichaaq, wilik inkiyejaa' wach kuuk' i aj Asiria, eh inkisiij reje ink'ohnik laj aseite keh i aj Egipto, inki.

²Re' i QaJaaw Dios xchalik ruk'aah chikinaah i aj Judá, naa ruye'em taqe chutojariik i kimahk i riih rumaam Jacob, eh naa rutojom keh re' q'oreel chib'ih xkian i xkiq'or.

³Eh noq x-aasjik i Jacob, ruchopom i ralaq rooq i ras Esaú noq x-aasjik. Eh noq xwinaaqb'ik i Jacob xupaj ransil ruuk' i ruánjel i Dios.

⁴Eh xupaj ransil ruuk' i ánjel, eh xuq'at wach i ransil i ánjel, xupahqaaj reh i Dios ruuk' oq'ik chi naa rukuxeesjiik. Ar Bet-el xuk'uhtaaj riib' i Dios chuwach, xkuxeesjik wo' hoq, reh chi xooj rukuxisaj i hoj.

⁵Re' i QaJaaw nim rajaawriik xkuxisanik reh i Jacob QaJaaw Dios i rub'ihnaal.

⁶Re' taq i hat, hat taq riih rumaam i Jacob cha nimaj wo' taq chik aaDios, re' i holohik laj na'ojb'al taq cha a'n, eh chayeew taq ak'ux ruuk' aaDios.

⁷Re' i QaJaaw Dios je' wili i xuq'or: Re' taqe i aj Canaán ma' manlik ta kipajwik ruuk' i kipex ruum q'e' suq keh i leq'.

⁸Eh re' taqe i aj Efraín je' wili inkiq'or: Re' hoj xoj b'ehomrik ruum xqareq ruraxiil qaq'iij. Ma' awach ta neen q'orik qeh chi ma' holohik taj inqa a'n, ma' nee ta nq'orarik chi ruuk' i leq' xqareq tz'aaq' i chib'ih qeh, inki taqe.

⁹Re' hin i Dios, hin xineesanik taq cha weh Egipto, eh naa wo' chik taq kaat nuye'em chi patinik chupaam taqe itz'ihy naah paat. Je' rukab' noq i na a'n taq chaloq aninq'iij.

¹⁰Eh re' hin xin sik'wik cho kiwach taqe ijalal nuq'oral nutaq'aaj taq cho chaxilak, eh ma' k'isiin taqe i xnuk'uhtaaj keh pan kisaq wiriik. Eh kuum keh xinq'orik panjalwaach q'orik.

¹¹Eh ar Galaad ma' k'isiin taqe i tiyoox, xa re' la' ma' re' ta wo' taqe i Dios. Eh ar Gilgal inkik'at chi kimayiij taqe imas wakax, re' taqe i ki altaar xa je' juntuhb' chi ab'aj chupaam taqe i tik mu'uun, inki i Dios.

¹²Re' i Jacob i xikin taq cho aamaam xumol chi elik chupaam i ye'aab' Aram ar xooj chusik'ariik i rehk'een. Eh ar xkamanik chi cha'jinik tentzun.

¹³Re' QaJaaw Dios, ruuk' jinaj i jalal ruq'oral xrisaj taqe chaloq i aj Israel ar Egipto. Eh ruuk' wo' hoq i jalal ruq'oral xucha'jeej taqe i aj Israel.

¹⁴Re' taqe i aj Efraín ma' k'isiin taj i rujosq'iil i Dios xkuksaj chaloq. Re' i QaJaaw Dios naa ruye'em chutojariik taqe ikaansanik kianam, naa kitojom wach i kiyiib' wach na'ojb'al kianam.