Read Poqomchi Hos 13 Bible Online

Hos 13 - Poqomchi bible

Hos 13

¹Eh noq kiq'orik naq i aj Efraín kiyo'jik naq taqe aj Israel, eh inkiyeew naq rajaawriik, xa re' la' taqe i aj Efraín xsacharik kiwach, ruum re' chik i tiyoox Baal xkinimaj.

²Re' taqe i aj Efraín xama' xkikanaa' ta wo' rub'aan i mahk xa konkiyej-aa' wo' kitiyoox chi plata, re' inkik'ax wach taqe i ye'jan reh, eh je' wili inkiq'or: Chak'at taq i mayiij chikiwach, inki taqe. Eh inkitz'ub' taqe i tiyoox je' kiwii' k'isa imas wakax.

³Je' re' noq ilook' insacharik kiwach xa je' ki-ik'ik suutz' pantaq wahq'eq, je' kikab' i mus jab' parusaq'iik, jumehq'iil insahchik wach. Eh je' kikab' i ma' ahl ta laj sohk', ink'amarik reje ruum i teew, xa je' kikab' i sib' i nelik chaloq pan ehteesb'al reh.

⁴Re' i QaJaaw Dios je' wili i xuq'or: Re' hin taq aaDios noq xat wihik taq cho Egipto, eh ma' awach ta chik taq i xakoj chi aaDios, xa re' wo' hin taq awaj ko'loom.

⁵Eh re' hin xincha'jinik taq aweh chupaam i ye'aab' chiq yuuq' ma' xta i nelik chupaam.

⁶Noq wilkaat taq chik chupaam i holohik ye'aab' suq taq chik awa' ahaa' xa nimb'isaj taq awiib' xsahchik taq panak'ux i nunimjiik.

⁷Re' hin naa taq nusacham awach, je' rukab' i rub'an i kaq b'ahlam noq i ruchop i rutiib'. Eh je' rukab' i rub'an i qamaam b'ahlam noq i ruchop i rutiib' chii' b'eeh.

⁸Re' hin naa ruchaliik nujosq'iil, je' rukab' i rujosq'iil ixoq oso xq'ucharik i rak'uun. Ar naa nub'anam taq aweh, je' rukab' noq i ruk'ux i rutiib' i kaq b'ahlam. Naa nusacham taq awach je' rukab' i rub'an reh i rutiib' i josq'laj chikop wilik pantaq ch'ahn.

⁹Re' hin naa nusacham taq awach i hat taq aj Israel, eh ma' awach ta naa ruko'liniik taq aweh.

¹⁰Eh ¿Aha' wilik taq aareey apahqaam taq weh, i kiko'linik naq taq aweh panatinamiit? ¿Aha' wilik taqe i q'atal q'orik xiye'arik taq aweh noq xapahqaaj taq aareey ruch'ihil taq i k'amal ab'eeh?

¹¹Re' hin ruuk' josq'iil xnuyeew taq aweh aareey eh ruuk' wo' chik nujosq'iil xwesaj taqe.

¹²Eh re' taqe i kimahk i aj Efraín wilik panuk'ux, re' taqe i kiyiib' wach na'ojb'al ma' naa ta reliik panuk'ux.

¹³Re' ti' k'axik chalik reh chikinaah, je' rukab' i ruti'kiil ixoq noq ink'ulik ruk'ux. Eh je' kikab' xa aasjik chik reh, ma' nasjik ta wo' chi korik, ma' xta runa'ojb'al, ni xata ruyeew riib' chi korik reh chi neenasjiik.

¹⁴¿Mi neerub'an re' chi nee taqe inuko'leej ruuk' inki a'n? ¿Mi neerub'an re' chi nee taqe inuko'leej chuwach i rutojariik taqe amahk? Re' i rajaawriik i kimik nuye'em chik chikinaah. Ma' naa ta chik nuketelaam kiwach.

¹⁵Atoob' ta naq nee kik'ihaaxb'iik, je' rukab' noq intoxlinik i chee', nee inwihik chib'ih keh. Re' hin naa nuye'em i kowlaj teew inchalik panchiq yuuq', sachb'al wach i chib'ih keh. Naa ruchiqiik i raasb'al kihaa' naa relq'jiik kib'ehomal kuum ixowan kiwach.

¹⁶Eh naa nuye'em taqe panti' k'axik i aj Samaria, ruum xin kiq'eb' chi riij kik'ux. Eh naa kikanteesjiik ruuk' q'aslaj ch'ihch', naakiq'ojariik wataq ab'aj i kiha'lak'uun. Re' taqe i yowaab' ixoq naakipoch'ariik, inki i Dios.