Read Poqomchi Hos 14 Bible Online

Hos 14 - Poqomchi bible

Hos 14

¹Re' Oseas je' wili i xuq'or: Hat taq aj Israel cha sik' wo' taq chik aaDios, ruum xaq'eb' taq awiib', ruum taq amahk.

²Chapahqaaj wo' taq chik kuyb'al amahk reh, je' taq wili i cha q'or: QaJaaw Dios cha kuy ta tii qamahk ruuk' i yiib' wach na'ojb'al inqa a'n. Eh chak'ul ta tii qeh panotob'il i qatiij, je' wo' hoq aloq'oonjiik inqa a'n

³Qohako'leej i hat ruum re' taqe i aj Asiria ma' nkian ta qako'ljiik. Eh ma' nee ta wo' inqako'leej qiib' chi nee qohooj chi q'aq'inik rij kawáyu, eh ma' nee ta chik inqakoj chi qadios taqe i tiyoox xa hoj qohyej-aanik keh, ruum xa re' wo' hat tiketelinik kiwach i ma' xta kituut kajaaw, tiko'q taq, inki.

⁴Re' i QaJaaw Dios je' wili i xuq'or: Re' hin naa wesam i q'etwachiil pankanima i aj Israel. Eh naa wo' chik nuketelaam kiwach naa wesam i nujosq'iil chikinaah.

⁵Re' hin naa nukamaniik, chi je' hin i jab' chi keh i aj Israel. Re' keh naa kikahniik chi je' rukab' noq ink'er i saq uhtz'ub', naa rukowjiik kik'ux je' rukab' noq i ruk'am raa' i chee' chakaltee' ar Líbano.

⁶Eh re' keh naa kik'ihaaxb'iik je' rukab' noq ink'ihaaxb'ik i q'ab' chee', je' holwochiil i q'ab' i chee' olivo. Eh re' i kik'ohnkiil, je' kik'ohnkiil i chee' chakaltee' ar Líbano.

⁷Re' taqe i aj Israel, re' wo' chik i hin naa nucha'jiniik keh. Eh naa kik'ihaaxb'iik, je' rukab' i trigo, je' rukab' noq kiwachinik i uuva, naa reliik kib'iral, je' rukab' i riis uuva i nelik ar Líbano.

⁸Re' taqe i aj Efraín je' wili i naa kiq'orom: ¿Mi koneenqakoj chi qadios re' i tiyoox? inko'q taqe. Je' wili i naa nuq'orom keh: Re' hin naa nucha'jiniik taq aweh, naa nuye'em taq aweh chib'ih taq inawaaj i hat, hat taq nutinamiit. Re' hin, je' hin jinaj chee' xa eliik rax wach reh chi naa kiwachiniik, kinko'q keh, inki i Dios.

⁹Wila' wilik jino'q i wilik runa'ojb'al taq chaxilak chureq chi riij taqe i k'uhb'aal wili. Re' i rub'eeh i QaJaaw Dios korik wach, eh re' re' inkik'am i korik wach kik'ux. Eh re' taqe i yiib' wach kina'ojb'al ma' nkik'am taj ruum i re' inkiq'eb' kiib'.