Read Poqomchi Hos 2 Bible Online

Hos 2 - Poqomchi bible

Hos 2

¹Re' Dios je' wili i xuq'or: Re' taq i hat naa taq aq'orom keh awuch aj Israel chi nutinamiit chik taqe, chi re' taqe ixoq nu ketelaam chik kiwach, inki.

²Re' i QaJaaw Dios je' wili i xuq'or: Chaq'il taq i je' atuut noq wilik chi chukanaa' i yiib' wach na'ojb'al. Eh re' reh ma' je' ta chik wehk'een noq wilik, ma' hin ta chik rub'ahiil noq wilkiin. Eh chi maa rub'an chik i je' k'oyomal, eh maa ruk'ax chik reje wach tokoom winaq.

³Eh wila' ma' xukanaa' rub'aan taqe re', re' hin naa nukanaam chi ma' xta chik i wilik reh, eh chi t'uslik, naa nukanaam chi je' rukab' noq xutoq'aa' cho k'acharik. Eh naa nukanaam chi je' rukab' i chiq yuuq', naa rukimiik ruum i ruchiqkaal chii'.

⁴Eh ma' naa ta nuketelaam kiwach taqe i rak'uun rixq'uun, ruum re' reh xuk'am taqe pan je' k'oyomal.

⁵Re' i je' kituut noq wilik, xuq'eb' i ruloq'il noq xuq'or chi je' wili: Naa wojiik chi kisik'ariik i winaq kik'axwik weh i kiye'wik nuwa' nuhaa', nu holohaq itz'ihy re' ruuk' i riij chikop, re' kiye'wik weh i xela itz'ihy, re' kiye'wik waseite.

⁶Ruum aj re', re' hin je' k'iix i naa nukojom chi tz'apb'al paam i rub'eeh, je' naa nukojom kotimaj koraal chi riij, reh chi ma' nee ta rureq i rub'eeh.

⁷Re' reh naa wo' naq chik rusik'im taqe i winaq ink'axwik reh, eh ma' naa ta chik rureqem, ruum i re' je' wili i naa ruq'orom: Re' hin naa wo' chik wojiik ruuk' i peet nub'ahiil noq wilik, ruum ruuk' i reh ma' xta naq reet wilkiin, ma' je' ta rukab' i yu'naak, inko'q, chi wiij.

⁸Xa re' la' re' reh, ma' xukoj ta rehtaal chi re' wo' naq i hin xin ye'wik reh i rutrigo, i ruvino, i raseite, eh chi re' hin xin k'ihaaxb'isanik reh i ru oro, i ru plata i ruyeew chi rumayiij chuwach i tiyoox Baal.

⁹Eh re' i hin paruq'ijil i rumolariik i wach taqe i rutik i ma' naa ta chik nuye'em reh i wach i trigo, i vino. Eh naa wo' chik nuq'uchum reh i itz'ihy re' ruuk' riij chikop, je' wo' i xela itz'ihy nuye'em naq reh chi rub'urb'aal.

¹⁰Eh re' hin panaq'kiwach i je' winaq i q'e' k'axwik reh naa nuq'uchum i chib'ih reh, naa nukanaam chi t'uslik, ma' jino'q naa ruko'liniik reh panuq'ab'.

¹¹Eh ma' naa ta chik nuye'em q'ab' chi naa rub'anam i ru ninq'iij inye'wik rusuqkiil ruk'ux, je' wo' taqe i runinq'ijiik i ak' poh, i hi'limb'al q'iij. Je' wo' chu'nchel i ru ninq'iij.

¹²Re' hin naa nusacham kiwach i ru-uuva, i ruhigo, re' i je' wili i ruq'or chikiij: Re' taqe wili xkiyeew weh i je' i winaq q'e' kik'axwik weh, inki. Eh re' i hin naa nukanaam chi xa je' chik ch'ahn taqe i rutik, naa ruk'uxariik kuum taqe i josq'laj chikop.

¹³Re' hin naa nuye'em chutojariik i ru mahk i je' ehk'eenb'ees re' re', ruum taqe i k'ataj i insensia xub'an chikiwach i Baal. Re' noq i rukoj lopq'aaq', i karena chutahqaljiik taqe i je' ruwinaqiil q'e' k'axwik reh. Eh re' hin xiruq'eb' chi riij ruk'ux, inki i QaJaaw Dios.

¹⁴Re' i QaJaaw Dios je' wili i xuq'or: Re' hin naa nuk'amam reje panchiq yuuq' Sinaí i je' ehk'eenb'ees re' re', ar naa nuq'orom reh chi q'e' naa nu k'axam.

¹⁵Eh naa wo' chik nuye'em q'ab' chi naa ruwachiniik taqe i ru-uuva, naa nuye'em chi ruye'aab' i wach k'ixkaab' Acor rub'ihnaal, reh chi nee wo' chik i rureq i rusuqkiil ruk'ux. Eh ar neerub'an chi je' rukab' i nimanik xub'an cho pampeet, noq xwesaj chaloq Egipto.

¹⁶Ma' naa ta chik ruq'orom chi je' wili: Hat dios Baal ma' ko'q ta chik weh. Je' la' wili i naa nuq'orom weh: Re' hat, i hat manlik nub'ahiil noq wilkaat, inko'q weh, inki Dios.

¹⁷Eh ma' naa ta chik nuye'em q'ab' chi naa ruq'orom i kib'ihnaal taqe i xa tiyoox Baal. Ma' naa ta chik ruq'orom rib'iral chi jumpech taqe re'.

¹⁸Chupaam taqe q'iij re' re' wilik i naa nuyejaam wach kuuk' i josq'laj chikop, kuuk' i chikop kirupinik pan taxaaj, kuuk' taqe aaq', reh chi ma' xta naa kuuchjiik i aj Israel. Eh ma' naa ta chik nuye'em q'ab' chi naa rub'aan i q'aq'inik, ikaansanik ruuk' flecha, ruuk' i q'aslaj ch'ihch', reh chi nee kik'acharik pansuqkiil k'uxliis.

¹⁹Re' taq i hat aj Israel je' nanaakaat taq nuk'amam wuuk' chi wehk'een chi jumpech, ruum q'e' taq ti nuk'ax, naa awihiik taq wuuk' panotob'il, pansuqkiil k'uxliis, naa taq nuketelaam awach.

²⁰Re' hin naa kaat taq nuk'amam chi manlik wehk'een, parukorkiil wach k'uxliis, eh naa taq anab'eem chi hin taq aaWaJaaw.

²¹Re' hin xti korik taq i nuq'or aweh chi chupaam taqe ponoq i q'iij re' re' kopan taxaaj naa nuye'em chaloq i wotob'il, naa nuqaasam chaloq jab' chinaah i wach ak'al.

²²Eh chinaah i wach ak'al naa chik rub'anam wach i trigo, riis i uuva, aseite. Re' taq i hat je' wili taq i naa aq'orom: Jezreel, tiko'q taq.

²³Eh naa taq kaat nuye'em chupaam i ye'aab' re' re' chi hat taq nutinamiit, naa nuketelaam wach i Lo-ruhama. Eh re' i Lo-ami je' wili i naa nuq'orom reh: Re' hat, hat chik nutinamiit, kinko'q reh re' reh naa kiin ruq'orom chi hin ruDios.