Read Poqomchi Hos 5 Bible Online

Hos 5 - Poqomchi bible

Hos 5

¹Re' i QaJaaw Dios je' wili i xuq'or: Re' taq i hat k'amal b'eeh aj tiij, re' taq i hat aj Israel, re' taq i hat raj kamanoom i reey, chab'iraj taq: Cha naah taq i hat naa nuq'atam i q'orik, ruum i xakoj taq kixirob'aal i wilkeeb' Mizpa, xaq'at taq pan kib'eeh naah yuuq' Tabor.

²Eh je' naa chaam laj jul i xak'ot taq reh chi xkiq'eb' kiib' i wilkeeb' wach k'ixkaab' Sitim, ruum aj re' naa kaat nuye'em chutojariik taq amahk.

³Re' hin weht'al i kina'ojb'al, chu'nchel i aj Israel. Je' wo' taqe i aj Efraín xkian i je' k'oyomal, eh xuch'uwa'risaj kiwach chu'nchel i aj Israel.

⁴Eh ruum i kiyiib' wach na'ojb'al ma' kinkinimaj ta chik. Re' chik kow i rumin riib' chikiwach i je' k'oyomal, eh ma' kiyeew ta chik wajaawriik i hin, hin k'achlik Dios.

⁵Re' taqe i aj Israel ruum chi q'e' inkinimb'isaj kiib' ink'utinik chi wilkeeb' pankimahk. Eh re' taqe i aj Efraín, re' i kimahk naa ruq'eb'wiik keh, eh naa wo' kiq'ehb'iik pamahk i aj Judá keh.

⁶Re' taqe i aj Israel naa naq chik kik'amam chaloq i kiwakax, i kitentzuun chi kimayiij chi nusik'ariik. Xa ma' naa ta wo' chik kiin kireqem, ruum xnukanaa' chik taqe.

⁷Re' keh ma' korik ta wach kik'ux wuuk'. Re' i kak'uun kixq'uun tokoom chik inkikoj chi kajaaw, ruum i re' xa chi jumehq'iil naa nusacham kiwach i keh, je' wo' hoq i kitik, inki i Dios.

⁸Chaxulej taq i tuun ar Gabaa rehtalil i q'aq'inik. Eh chaxulej taq i tuun ar Ramá. Chaq'or taq ar Bet-aven chi wilik yohb'aal, je' wo' ar Benjamín.

⁹Re' taqe i aj Efraín xti korik chi naa kikahniik chi ma' xta wilik keh paruq'ijil i ti' k'axik. Eh chu'nchel i aj Israel naa kinab'eem chi korik chi je' re' i naa ruk'ulariik.

¹⁰Re' taqe i k'amal kib'eeh aj Judá je' kikab' taqe i kijilwik paam taqe i k'ula't, re' hin naa nuye'em i nujosq'iil chikinaah.

¹¹Re' taqe i aj Efrín k'achi' kik'iik chi ti' k'axik, xi kahnik chi ma' xta chik i wilik keh ruum re' chik taqe i tiyoox xkinimaj.

¹²Re' hin naa nusacham kiwach i aj Efraín, i aj Judá, je' rukab' i rub'an i mooh noq i rumohrisaj taqe i xa chib'ih jariik.

¹³Eh noq naakilom taqe i aj Efraín, taqe i aj Judá, chi xiik' naah ti' kiil wilkeeb'. Re' taqe i aj Efraín naa kojiik ruuk' i runimaal wach reey ar Asiria, reh naq chi naa kik'aachjiik, xa re' la' xama' naa ta wo' kik'achjik.

¹⁴Re' hin ruum nujosq'iil naa nuye'em taqe panti' k'axik i aj Efraín, je' wo' taqe i aj Judá. Je' rukab' i rub'an i kaq b'ahlam noq i ruxereb'eej i rutiib', ma' awach ta naa ruko'liniik keh panuq'ab'.

¹⁵Re' hin naa nukanaam taqe chi kutkeel, korehtaal inkiyot' i kik'ux chi riij, i kimahk, eh naa wo' chik kinkinimam. Eh naa kiin kisik'im noq wilkeeb' pan ti'kiil k'uxliis, inki i Dios.