Read Poqomchi Hos 7 Bible Online

Hos 7 - Poqomchi bible

Hos 7

¹Re' i QaJaaw Dios je' wili i xuq'or: Noq xwaaj naq taqe wisam panti' k'axik i aj Israel, re' taqe i aj Efraín xa chayeew chik i mahk inki a'n je' wo' taqe i aj Samaria. Eh xa re' i chukuj q'orik, xa re' i leq' inkaaj pantaq paat, pantaq b'eeh.

²Re' keh ma' nkikapaaj taj chi re' hin k'ahchi' wilom i ma' holohik ta laj na'ojb'al inki a'n Xanaah re' k'ahchi' wilom chi k'ahchi'rik'iik chikinaah i kimahk inki a'n.

³Re' keh ruuk' i kiyiib' wach na'ojb'al, ruuk' i chukuj q'orik inki a'n inkiyeew rusuqkiil ruk'ux i reey, je' wo' taqe i k'amal kib'eeh.

⁴Eh re' taqe re' xa re' i ch'uwarisanik wach kikaxaro inkaaj. Eh je' kikab' i horna qoplik ruq'aq'al, ma' nluk'ariik taj noq inyuq'arik paam i ruq'oril kaxlanwi'k, korehtaal inkojarik ch'amb'esb'al reh.

⁵Eh noq i runinq'iijeej i ruhab'ul i reey, re' taqe i k'amal b'eeh inkixohk'risaj i reey. Eh ruum i re', re' i reey inokik chub'anariik i re' ma' re' chi kixilak i yiib' wach kina'ojb'al.

⁶Re' keh xan qop chik i kánima chub'anariik i yiib' wach na'ojb'al, xa je' chik rukab' i horna ma' inkanab'jik ta ruluk'ariik i ruq'aq'al. Eh atoob' ta woroq inkojwik ruq'aq'al, xa koqoplik wo' chi junwaar.

⁷Eh re' taqe re' xa je' chik kiqop horna, inkikansaj taqe i wilkeeb' chi ajaab'esil, xkiq'eb' kiib' chu'nchel i kireey. Ma' jino'q chik inkipahqaaj kikuyb'al weh.

⁸Eh re' taqe i aj Efraín xkian jinaj wach kina'ojb'al kuuk' i tokoom tinamit. Re' taqe i aj Efraín je' kikab' i kaxlanwi'k ma' xsuutjik taj, xa juntar xchaq'.

⁹Re' keh xehteesjik i kajaawriik kuum i tokoom tinamit, xa re' la' ma' nkikoj ta rehtaal. Eh saq chik i rismaal kinaah, xama' nkikoj ta wo' rehtaal i k'ahchi' kik'ulum.

¹⁰Re' taqe i aj Israel q'e' nimaq kiwach inki a'n kiib', ruum i re' k'ahchi' kik'ulum i ti' k'axik. Eh ni xata ruum taqe re', kinkaaj wo' chik kinkinimam, ni xata kinkaaj kisik'im hin, hin ki Dios.

¹¹Re' taqe i aj Efraín ma' xta kina'ojb'al, xa je' kikab' i paloma ma' xta runa'ojb'al, ruum xooj kipahqaaj kitoob'jiik keh i aj Egipto, keh i aj Asiria.

¹²Eh noq naa kojiik ar, re' hin naa nuq'atam pankib'eeh, naa nuchopom taqe, je' rukab' noq kichoparik pan xirob' i tz'ikin. Eh naa taqe nuye'em chutojariik i kimahk, ruum i kiyiib' wach na'ojb'al.

¹³Re' keh q'e' ti' i naakik'ulum ruum xkiq'eb' chi riij kik'ux nunimjiik. Eh naa ruchaliik i ti' k'axik chikinaah, ruum xinkiq'et wachej. Re' hin xwaaj naq taqe nuko'leem, xa re' la' inkichuk i q'orik chi wiij.

¹⁴Eh ma' chu'nchel ta kik'ux xinkiq'oreej noq ti' wilkeeb' pankiyokaab'. Eh noq xkik'er kichii' chupahqaljiik i ki trigo, chupahqaljiik i riis uuva inkuk'ej xinkiq'et wachej la'.

¹⁵Re' hin xnutijej wo' naq taqe, eh xnuyeew wo' naq rukowiil kik'ux. Xa re' la' re' keh re' chik i ma' holohik taj i xkikapaaj chi wiij.

¹⁶Eh re' chik taqe i tiyoox xkinimaj, xa je' kikab' i flecha ma' tz'eht tankutwik. Eh ruum chi ma' kinimanik taj naa kikanteesjiik ruuk' q'aslaj ch'ihch' taqe k'amal b'eeh ruum i re' naakikaqse'ljiik kuum i aj Egipto, inki i Dios.