Read Poqomchi Hos 9 Bible Online

Hos 9 - Poqomchi bible

Hos 9

¹Re' Oseas je' wili i xuq'or: Re' taq i hat wuch aj Israel, mat pisk'anik taq panawooq ruum i rusuqkiil taq ak'ux, je' rukab' inki a'n i tokoom tinamit. Re' taq i hat xkitoj taq aweh je' k'oyomal taq xa a'n ruum xakanaa' taq aaDios, xakapaaj taq i chi ruum i re' naa ruwachiniik taq atik.

²Naa la' ruponiik i q'iij chi ma' naa ta chik ruwachiniik i trigo, i uuva, ma' naa ta chik ruwihiik taq awa' ahaa'.

³Re' taq i hat aj Efraín, ma' naa ta chik taq awihiik ayu' parutinamiit i QaJaaw Dios. Naa la' wo' chik asutiniik taq reje Egipto, eh Asiria, ar taq naa ak'uxum i ch'uwa' wach.

⁴Eh ar ma' naa ta chik taq aye'em i riis uuva chi mayiij, i ak'atoj mayiij chuwach i QaJaaw Dios, re' taq awa' naa ak'uxum reh ti'kiil k'uxliis. Eh chu'nchel taq i naa ak'uxwiik reh i re', naa ruch'uwa'risam taq awach. Eh ma' naa ta taq aye'em chi mayiij chuwach i QaJaaw Dios.

⁵Eh wila' je' re' ¿Chib'ih taq i naa a'nam na' chureq i ruq'ijil i ninq'iij ye'b'al ruloq'il i QaJaaw Dios?

⁶Re' taq i hat naa aweliik reje ayu' ruum i ti' k'axik, naa taq kimolom reje awach i aj Egipto, je' naa naa kaat taq kimuq'aam ar Menfis. Re' taqe i chib'ih aweh re' ruuk' i plata naa ruq'uuxriik kiwach, naa ruchaamb'iik i ch'ahn, i k'iix chupaam taq aa ye'aab'.

⁷Eh xponik chik i ruq'ijil chi naa taq ak'ulum i ti' k'axik, eh chi naa taq atojom riij taq amahk, je' rukab' i ruk'ul taq cha weh. Eh je' taq wili inaq'or: Re' i jalal ruq'oral i Dios re' re' q'e' min min ruuk' taqe i ruq'or, je' cho ahqaal, tiki taq, ruum q'e' taq i yiib' wach ana'ojb'al, ma' k'isiin taq ti ixowanik.

⁸Re' hin xirupab'aa' i Dios chi jalal ruq'oral taq chaxilak, i hat taq aj Efraín, eh re' taq i hat inaq'at taq panub'eeh. Eh noq kinwihik chupaam i rupaat i QaJaaw Dios, ma' k'isiin taq i nawixow nuwach.

⁹Re' taq i hat ma' k'isiin i yiib' wach na'ojb'al taq i na a'n, je' rukab' i xb'aan Gabaa. Re' i QaJaaw Dios naa ruk'uliik paruk'ux taq ayiib' wach na'ojb'al, eh naa taq kaat ruye'em chutojariik taq amahk, inki i Oseas.

¹⁰Re' i QaJaaw Dios je' wili xuq'or: Noq xnusik' cho kiwach i aj Israel xsuuqb'ik nuk'ux, je' rukab' noq insuuqb'ik ruk'ux inreqwik reh i uuva panchiq yuuq'. Re' i kimaam kati't xsuuqb'ik wo' cho nuk'ux kuuk', je' kikab' i peet wach i higo, re' chik i tiyoox Baal-peor xkiloq'ej, xin kiq'eb' i hin, xkik'uhtaaj kik'ixb'ilaal. Eh xkich'uwa'risaj kiib' je' kikab' inkiloq'ej.

¹¹Re' i runimaal kiwach i aj Efraín naa rusahchiik wach xa je' inrupinik reje tz'ikin. Re' kehk'een, ma' naa ta chik kikahniik wach k'achariik, eh ma' naa ta chik raasjiik kak'uun kixq'uun.

¹²Eh atoob' ta neenkik'isaj kak'uun kixq'uun, re' hin naawisam chikiwach, ma' jino'q chik i naa nukanaam. Eh q'e' ti' i naakik'ulum, ruum naa nukanaam taqe chi kutkeel, inki.

¹³Re' i Oseas je' wili i xuq'or: Re' hin xwilow taqe i aj Efraín je' kikab' i aj Tiro chi q'e' naq suq wilkeeb', xa re' la' re' taqe i aj Efraín pankimik k'ahchi' kikanaam taqe i kak'uun kixq'uun.

¹⁴QaJaaw Dios, re' hat cha a'n kuuk' inakapaaj. Chakanaa' taqe ixoq chi ma' nee ta chik ki ak'unaniik', eh chi ma' nee ta chik kich'uch'isanik, inki.

¹⁵Re' i QaJaaw Dios je' wili i xuq'or: Re' taqe i aj Efraín Gilgal i xkian kiyiib' wach na'ojb'al, xchalik nujosq'iil kuuk'. Eh ruum i kiyiib' wach na'ojb'al, ma' naa ta chik nukojom taqe panupaat. Eh ma' naa ta chik nuk'axam taqe, ruum re' taqe i k'amal kib'eeh ma' kinkinimaj ta chik.

¹⁶Re' taqe i aj Efraín q'e' ti' naa kiwihiik, je' kikab' i chee' chiqinaq chik i raa', ma' wachinik ta chik. Re' keh naa wo' naq ruwihiik kak'uun kixq'uun, eh re' hin naa nusachwiik kiwach, inki.

¹⁷Re' i tinamit wili ma' xkinimaj taj inq'orarik keh ruum i nuDios, ruum aj re' naakiq'eb'ariik ruum, re' keh xanaa chik kojiik chi b'ehik naah taq tinamit, inki i Oseas.