Read Poqomchi Jol 2 Bible Online

Jol 2 - Poqomchi bible

Jol 2

¹Eh chaxulej taq i tuun chinaah i yuuq' Sión, cha q'or taq rib'iral chupaam i rupaat i QaJaaw Dios. Reh chi neenchalik kiyo'jiik chu'nchel i wilkeeb' Judá, ruum re' QaJaaw xailook' chik ruye'em chee runimaal ti' k'axik.

²Re' taqe i nimaq chili'l naaruq'equumriik wach i q'iij noq naa kik'uliik i loq. Eh xa je' chik q'eq suutz', xa je' chik taqe ruk'ihaal soldado noq naa kik'uliik i loq chinaah taqe i yuuq' kixkaab', xa je' chik rukab' i noq i rusihq'eej i wach ak'al i q'iij noq insaq'ik. Eh ma' jank'al ta nilarik i re', eh ma' naa ta wo' chik rilariik chi jumpech.

³Eh re' taqe chikop re' re' xa je' chik naa rik'iik q'aaq' chikinaah taqe i ch'ahn kuum, je' rukab' i rub'an i xaq q'aaq' ruk'at chiriij, i ruk'at chuwach. Eh xa holohik naq chik taqe i tik chupaam taqe i ye'aab', eh noq ik'inaq chik taqe ar inkahnik chi xa je' chik chiq yuuq' ma' wach taj i naa ruko'leem riib' chikiwach.

⁴Eh re' taqe i chikop re' re', je' kiwii' kawáyu, je' kiajiminik kawáyu noq wilik i winaq iqlik chiriij reh ojik panq'aq'inik.

⁵Re' choqik naa kianam chinaah taqe yuuq' xa je' chik rukab' i choqik inki a'n i ruk'ihaal kareta. Eh xa je' chik rukab' i choqik i rub'an i q'aaq' noq ruk'at i chiqiij laj xaq chee'. Je' kikab' i ruk'ihaal soldado kow kiib', kiyejaam kiib' chi q'aq'inik.

⁶Eh re' taqe i tinamit xa saqmoq'ik chik naakiponiik ruum kiyo'jiik kuum taqe i chikop re' re'.

⁷Eh je' kikab' taqe i soldado kow kiib' chi q'aq'inik kow kiajiminik, kijohtik chinaah taqe i tz'aq. Eh chi korik kiooj chikiwach ma' inkijal ta chik i kib'eeh.

⁸Eh ni xata nkikuhraaj kiib' noq kib'eehik inkik'am i kib'eeh chi korik, atoob' ta naq nee kikanteesjik ruuk' flecha xama' xta wo' naa kuuchjiik.

⁹Eh naakokiik chupaam i tinamit xa kajimam chik kiib' noq naakijohtiik naah taq tz'aq, nah taq paat, xa je' chik taqe ajileq' noq naa kokiik pantaq kok' ventana reh taqe i paat.

¹⁰Xa naa chik ruk'uyu'jiik ak'al naa kianam, eh naaruq'equumriik paam i taxaaj ruum i kik'ihaal. Re' q'iij ma' naa ta chik ruk'utiniik kuum, je' wo' hoq i rusaqumaal ch'umiil.

¹¹Re' i QaJaaw naaruk'amam kib'eeh taqe i ru soldado, eh kow naaruq'oriik chaloq. Re' taqe i raj kamanoom re' re' xiik'nah kik'ihaal, ma' nee ta inkuyjik kajaljiik taqe i kib'anik reh taqe i ruq'or chi naarub'aan. Eh na' ponoq i q'iij chuwach i QaJaaw Dios, q'e' ti' inaarilariik, ma' jino'q i naarukuywiik reh.

¹²Eh re' i QaJaaw Dios je' wili i ruq'or: Chayot' taq ak'ux, kim wo' chik taq wuuk' chu'nchel taq awánima, cha a'n taq atiij chi ma' a'nam taq awa' ahaa' cha k'er taq aachii' chi oq'ik, inki.

¹³Chanimaj wo' taq chik aaWaJaaw aaDios, re' taq awánima naa aaxihim, ma' re' ta chik taq aso' Ruum re' i QaJaaw Dios wilik q'unil ruuk', q'uun inchalik rujosq'iil ruum q'e' aj keteloom wachiis, eh intib'ik ruk'ux noq i ruyeew i ti' k'axik taq cha naah.

¹⁴Ma' nee ta oon naq i ruyeew i ti' k'axik taq cha naah i QaJaaw Dios, nee oon naq i ruyeew taq weh i rotob'il. Nee oon wo' naq chik kiwachinik taqe i tik, nee wo' naq chik inwihik riis i uuva, eh neenkik'am reje chi mayiij reh i QaJaaw Dios.

¹⁵Eh cha xulej taq chaloq i tuun chinaah i yuuq' Sión reh chi neenkimol kiib' i tinamit. Chaq'or taq keh chi ki a'n kitiij chi ma' kianam ta kiwa' kihaa'.

¹⁶Chamol taq kiwach i rutinamiit i Dios chakuxisaj taq, chamol kiwach taqe i nimaq winaq, je' wo' taqe i kok' ha'lak'un, i ko aj ch'uuch' taqe. Eh cha q'or taq keh i koxki a'n kaxáro chi kieloq cho chupaam i paat k'ahchi' keeb' wii' chi hi'lik.

¹⁷Re' taqe i k'amal kib'eeh aj tiij chu'nchel i raj kamanoom i Dios kijil i koq kiib' wach artaal, eh ruuk' oq'ik nee nkiq'or chi je' wili: QaJaaw Dios cha kuy tii kimahk aatinamiit. Maa yeew q'ab' chinee kikaqse'ljik, eh chi neenq'atarik kiwach kuum i tokoom tinamit reh chi ma' nee ta nkiq'or chi je' wili i ma' kinimanik ta weh: ¿Aha' wilik i ki Dios i re'? ma' inko'q ta taqe.

¹⁸Eh chi je' re' i Dios neeruk'uhtaaj i ruk'axb'al chinaah i rutinamiit, nee wo' chik i ruketelaaj kiwach.

¹⁹Je' wili i xuq'or: Re' hin naa wo' chik nuye'em taq aweh i suq atoob', naa wo' chik kiwachiniik i trigo, naa wo' chik ruwihiik i riis uuva, i aseite korehtaal taq ti nujik. Eh ma' naa ta nuye'em q'ab' chi naa taq kaat kikaqse'laam i ma' kinimanik ta weh.

²⁰Re' hin naa taqe wesam reje panatinamiit i nimaq chili'l xi chalik pantz'eet reh i rookb'aal q'iij, naanukaham taqe reje panchiq yuuq'. Re' taqe i peet b'eeh naanukutum taqe chupaam i kamnaq palaw, eh re' taqe i xam b'eeh naa taqe nukutum chupaam i palaw Mediterráneo, ar naakichuhriik. Re' hin wilik i nimaq wach na'ojb'al naa nub'anam taq awuuk', inki.

²¹Je' re' noq re' taq i hat suuqb'oq taq ak'ux maayohb'isaj taq chik awiib', ruum re' i QaJaaw Dios wilik i nimaq wach na'ojb'al naa rub'anam taq awuuk'.

²²Eh re' taqe i chikop pantaq ch'ahn naa wo' chik ruwihiik kiwa', ruum naa wo' chik ruraaxb'iik kiwach i ch'ahn. Eh re' taqe chee' naa wo' chik kiwachiniik, eh naa wo' chik kiwachiniik i higo i uuva.

²³Eh re' taq i hat i wilkaat taq ar Sión suuqb'oq taq ak'ux ruuk' taq aaWaJaaw aaDios. Ruum re' reh xti manlik paruq'ijil naa ruye'em taq cha weh peet jab', eh naa wo' ruye'em chaloq i jab' i rub'an koq'uun, je' wo' rukab' i rub'an pampeet.

²⁴Re' trigo naa wo' chik ruwachiniik chi korik. Je' wo' hoq i riis i uuva, je' wo' hoq aseite korehtaal i nujik i ye'aab' reh.

²⁵Re' hin naa taq nuye'em jilow aweh atik xaq'eb' chupaam taqe i haab' noq xkuxik kik'uxum i kajb'uhr wach kininqaal chili'l kajpech xik'ik. Xa je' chik ruk'ihaal soldado xnutaq'aaj taq cho cha naah.

²⁶Eh naa wo' chik taq a'nam awa' ahaa' korehtaal taq ti nujik. Eh naa taq kiin aloq'em i hin, hin taq aaWaJaaw aaDios, ruum re' hin naa nub'anam i nimaq wach na'ojb'al taq awuuk', eh ma' jaruuj taq chik naa akahniik pank'ixb'ilaal taq i hat nutinamiit.

²⁷Re' taq i hat aj Israel naa taq anab'eem chi wilkiin taq awuuk'. Eh chi xa re' hin i jinaj chi Dios, ma' xta chik jino'q. Eh ma' jaruuj taq chik naa akahniik pan k'ixb'ilaal taq i hat, nutinamiit, inki.

²⁸Noq ik'inaq chik taqe re' naanuqasam qohoq i Wuxlab'al chikinaah chu'nchel i tinamit. Re' taqe i kak'uun kixq'uun naa kiq'orom wib'iral, re' taqe k'ijolaq wilik i naanuk'uhtaam chikiwach. Re' i mama' winaq wilik i naanuk'uhtaam keh pan wiriik.

²⁹Eh chupaam taqe i q'iij re' re', naa nuye'em i Wuxlab'al pan kánima taqe i waj kamanoom, chi winaq chi ixoq.

³⁰Eh naanuk'uhtaam pan taxaaj i runimaal sahchb'al k'uxliis, naa wo' nuk'uhtaam wach ak'al i ehtalil, re' ruuk' i kik', eh q'aaq' jinaj runimaal sib' xa je' chik q'equm paam suutz'.

³¹Re' q'iij naaruq'equumriik wach, eh re' poh naarukahniik chi xa je' chik k'ik' noq komajaa' imponik i q'iij chi naa nuq'atam i q'orik i hin re' ixiik'naah nimaal wach, eh ti yo'joq ruum, inki.

³²Eh chu'nchel i naa kiq'orom i b'ih i QaJaaw Dios pan kitiij naakiko'ljiik, ruum ar Sión ar Jerusaleem naarureqariik i ko'lemb'al iib', je' rukab' i ruq'orom i QaJaaw Dios pampeet. Re' taqe i rusik'im wach i reh naakiko'leem riij i kik'achariik.