Read Poqomchi Amo 2 Bible Online

Amo 2 - Poqomchi bible

Amo 2

¹Re' QaJaaw Dios je' wili xuq'or: Re' taqe i aj Moab ma' k'isiin mahk xkian, ruum aj re' naa nuye'em taqe chutojariik i kimahk. Re' keh xkik'at xkikanaa' chi xa chaaj chik i rub'aqil i wilik naq chi reey ar Edom.

²Ruum i re' naa nukojom ruq'aq'al i tinamit Moab, eh naa ruk'ahtiik taqe i paat imb'aan wii' i taaq'anik ar Queriot. Re' taqe i aj q'aq'ineel k'erlik kichii', eh naakixulem i tuun noq naa rukuxiik kikansam taqe i aj Moab.

³Eh naa wesam i wilik chi reyil chikinaah, eh junkanteesjiik naa nub'anam ruuk' taqe i k'amal b'eeh inki i QaJaaw Dios.

⁴Re' QaJaaw Dios je' wili xuq'or: Re' taqe i aj Judá ma' k'isiin mahk xkian ruum aj re' naa nuye'em taqe chutojariik i kimahk. Re' keh ma' xponik ta panaq' kiwach i nutijiniik. Eh ma' xkik'am ta naah i nuk'uhb'aal, re' chik taqe i tiyoox xkiloq'ej re' ixkiloq'ej chaloq i kimaam kati't.

⁵Ruum aj re', re' hin naa nukojom ruq'aq'al i tinamit Judá, eh naa nuk'atam taqe i paat imb'aan wii' taaq'anik ar Jerusaleem, inki.

⁶Re' QaJaaw Dios je' wili i xuq'or: Re' taqe i aj Israel ma' k'isiin i mahk xkian ruum aj re' naa nuye'em taqe chutojariik i kimahk. Re' keh inkik'ayej reje ruuk' tumiin i ma' xta kimahk, eh xa ruuk' i junk'uhl chi xijab' inkik'ayej i neb'aa'.

⁷Eh ma' mponik ta panaq'kiwach inkiye'q' panak'al taqe i neb'aa', ma' korik ta wach kik'ux kuuk' i ma' nimaq ta kiwach, eh re' irixooq i ajaab'ees irixoqb'eej wo' chik ak'uunb'ees. Ruuk' taqe i inki a'n re' re' inkesaj i wajaawriik.

⁸Ma' k'isiin itz'ihy inkimol wach re' inkahnik kuuk' xa chi riij k'aas, kiokik haa' chi wi'k noq kilooqjiik taqe i tiyoox. Eh ruuk' i tumiin inkesaj reh i xama' xta wo' kimahk inkiloq' i k'ah laj ha' inkuk'ej chupaam i rupaat i kitiyoox.

⁹Eh ma' nk'ulik ta chik pankik'ux noq xwesaj taqe reje pan kiye'aab' i aj amorreo, eh xnusach kiwach, atoob' ta chi xanimaq chik kooq, je' ninqaal kooq chee' chakaltee', eh kowlaj winaq taqe je' kikab' i tz'inuj.

¹⁰Eh re' taq i hat aj Israel, re' hin xineesanik taq chaaweh Egipto, ka'winaq haab' xat nub'esaj taq chaloq chupaam i ye'aab' chiq yuuq', reh chi xnuyeew taq aweh i kiye'aab' i aj amorreo.

¹¹Re' hin korik taq i nuq'or aweh chi chaxilak taq i hat wilik i xnukoj chi jalal nuq'oral. Eh xnusik' kiwach i k'ijolaq chi xi kahnik panukamaj chi ma' yok'ooj taj i rismaal kinaah, inki i QaJaaw Dios.

¹²Eh re' taq i hat xamin taqe i k'ijool re' re' chi ruuk'jiik i k'ah laj ha' inxohk'risanik, eh ma' xayeew ta taq q'ab' keh i jalal nuq'oral chi xkiq'or rib'iral i nub'ihnaal.

¹³Ruum taq i xa a'n re' re' naa nuye'em taq i ti' k'axik cha naah, naa taq aqahb'aniik ruum i ruti'kiil je' rukab' i choqik i rub'an i kareta noq ahl i trigo rihqaam.

¹⁴Eh re' neerumol chi elik xama' naa ta wo' ruko'leem riib', eh re' i kow riib' naa rukahniik chi ma' xta raansil. Eh re' i kow riib' xama' naa ta wo' ruko'leem riib' chuwach i ti'.

¹⁵Eh ni xata re' inchol peleto ruuk' i flecha naa ruko'leem riib', ni xata re' i kow inajiminik, eh ni xata re' inarumolom chi elik chi riij i kawayú naa ruko'leem riib'.

¹⁶Chupaam taqe i q'iij re' re', re' i soldado q'e' kow riib' chi q'aq'inik naa ruq'eb'em kahnoq i ruch'ihch' reh q'aq'inik noq naa rumolom chi elik, inki i Dios.